ހާއްސަ އިހުތިޔާރެއް ލިބޭ ގޮތަށް ގަތަރުގެ އަލް ސާދުގެ އެއްބަސްވުން ޒަވީ ހެނާންޑޭސް އާކޮށްފިއެވެ.
އަލް ސާދުގެ އެއްބަސްވުން ޒަވީ އާކޮށްފައިވަނީ އަންނަ އަހަރުގެ ޖުލައި މަހުގެ ނިޔަލަށެވެ. މި އެއްބަސްވުމުގައި ވަނީ ޒަވީއަށް ހާއްސަ އިހުތިޔާރެއްގެ ދަށުން ވަކި މުއްދަތެއްގެ ނޯޓިސް އެއް ދިނުމަށްފަހު އޭނާ ބޭނުންވާ ކްލަބަކަށް ބަދަލުވެވޭނެކަން ހިމަނާފައެވެ.
ހާއްސަ އިހުތިޔާރެއް ލިބޭ ގޮތަށް އަލް ސާދުގެ އެއްބަސްވުން ޒަވީ އާކުރިއިރު، ބާސެލޯނާގެ ކޯޗަކަށް ޒަވީ ހަމަޖެއްސުމަށް އެ ކްލަބުން މަސައްކަތް ކުރަމުން އަންނަ ކަމަށް ރިޕޯޓުތައް ވަނީ ބުނެފައެވެ.
މިދިޔަ ޖެނުއަރީ މަހުވެސް ބާސާގެ ކޯޗުގެ މަގާމުން އާނެސްޓޯ ވަލްވޭޑޭ ވަކިކޮށް ޒަވީ ގެންދަން އެޓީމުން މަސައްކަތްކުރިއެވެ. އެކަމަކު އެފަހަރު ޒަވީ ހުށަހެޅި ކަންތައްތަކަށް ކްލަބުގެ ވެރިން އެއްބަސް ނުވުމުން، ޒަވީ ވަނީ އެ ހުށަހެޅުމަށް ނޫނެކޭ ބުނެފައެވެ.
އަންނަ ސީޒަނުގައި ބާސާގެ ކޯޗުގެ މަގާމަށް ޒަވީ ހަމަޖައްސަން އުޅޭ ކަމަށް ރިޕޯޓުތައް ބުނިއިރު، ބާސާގެ ކޯޗުގެ މަގާމާ މި ސީޒަނުގެ މެދުތެރެއިން ހަވާލުވި ކިކޭ ސެޓިއެން، މި ސީޒަން ނިމުމުން މަގާމުން ދުރުކުރާނެ ކަމަށްވެސް ރިޕޯޓުތައް ވަނީ ބުނެފައެވެ. އެގޮތުން މި ސީޒަނުގައި ކުރިއަށް ހުރި މެޗުތަކުގައި ބާސާގެ މެނޭޖްމަންޓުން ބޭނުންވާ ފަދަ ކުޅުމެއް އެޓީމުގެ ފަރާތުން ނުފެނިއްޖެ ނަމަ، ސެޓިއެން މަގާމުން ވަކި ކުރުމަށް ނިންމާފައިވާ ކަމަށް ރިޕޯޓުތައް ބުނެއެވެ.
އަލް ސާދާއެކު އެއްބަސްވުން އައު ކުރުމަށް ފަހު ޒަވީ ބުނީ އެ ޓީމަށް ކާމިޔާބު ހޯދައިދޭން އިތުރު އަހަރެއް ލިބުމަކީ ހިތްހަމަޖެހުމެއް ކަމަށާއި، ކުޅުންތެރިއެއްގެ ގޮތުގައި ކުރި ޚިދުމަތަށް ވުރެން ކޯޗެއްގެ ގޮތުގައި ކާމިޔާބު މަސައްކަތެއް ކުރަން ބޭނުންވާ ކަމަށެވެ.
ސްޕެއިންގެ އިތުރުން ދުނިޔޭގައި އުފެދުނު އެންމެ މޮޅު އެއް މިޑްފީލްޑަރު ޒަވީ އަލް ސާދަށް ބަދަލުވީ 2015 ވަނަ އަހަރެވެ. އެ ޓީމަށް ކުޅެދިނުމަށް ފަހު ޒަވީ ކޯޗެއްގެ ރޯލުގައި އެ ޓީމާ ހަވާލުވީ މިދިޔަ އަހަރުގެ ޖުލައި މަހުގައެވެ. ޒަވީގެ އިރުޝާދުގެ ދަށުން އަލް ސާދު ވަނީ ގަތަރު ކަޕާއި ގަތަރު ސުޕަ ކަޕްގެ ތަށި އުފުލާލާފައެވެ.
