ދިރިއުޅެން ކަމުނުދާ ތަންތަނުގައި 21،000 އާއިލާ ދިރިއުޅެމުންދޭ، އެއާއިލާތަކަށް ބޯހިޔާވަހިކަން ދިނުން ޓާގެޓަކީ: އަސްލަމް

މާލޭގައި ދިރިއުޅެން ކަމުނުދާ ތަންތަނުގައި 21،000 އާއިލާއެއް ދިރިއުޅެމުންދާ ކަމަށާއި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރު ނިމޭއިރު، އެފަރާތްތަކަށް ބޯހިޔާވަހިކަން ފޯރުކޮށްދެއްވާނެ ކަމަށް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓަރަކްޗަރ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.

ރައީސް ޞާލިހުގެ ސަރުކާރުގެ ބޯހިޔާވަހިކަމުގެ ސިޔާސަތާ ގުޅޭގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި، ޕްލޭނިންގ އެންޑް ހައުސިންގ މިނިސްޓަރ އަސްލަމް ވިދާޅުވީ، މާލޭގައި ވަރަށް ދަތި ހާލުގައި މީހުން އުޅެމުން އަންނަ ކަމަށާއި އެގޮތުން 600 އަކަ ފޫޓަށް ވުރެ ކުޑަ ތަންކޮޅެއްގެ ތެރޭގައި 21،013 އާއިލާއެއް އުޅެމުންދާ އަންނަ ކަމަށެވެ.

އަސްލަމް ވިދާޅުވީ މިސަރުކާރުގެ ޓާގެޓަކީ 21،000 އާއިލާއަށް ބޯހިޔާވަހިކަން ފޯރުކޮށްދިނުން ކަމަށާއި، އެއީ ކޮންމެހެން އަލަށް މިސަރުކާރުން ފަށާ މަޝްރޫއުގެ ތެރެއިން ނޫންކަމަށާއި، މިއަދުގެ ހާލަތުގައި ބޯހިޔާވަހިކަން އެންމެ ބޭނުންވާ 21،000 އާއިލާއަށް ބޯހިޔާވަހިކަން ފޯރުކޮށްދިނުން ކަމަށެވެ.

އަސްލަމް ވިދާޅުވީ، މާލޭގެ އާބާދީގައި ފޯރުންތެރިކަންވެސް ހުރީ އެކި މިންވަރަށް ކަމަށާއި އެގޮތުން 15 ޕަސެންޓް އާއިލާއަކީ ފަގީރު އާއިލާތައް ކަމަށެވެ. އޭގެ މާނައަކީ އާއިލާގެ ކޮންމެ މީހެއްގެ ބޮލަކަށް ދުވާލަކަށް 74ރ ނުޖެހޭ 15 ޕަސެންޓް އާއިލާ މާލޭގައި ދިރިއުޅޭ ކަމަށާއި އެއީ 3152 އާއިލާ ކަމަށްވެސް އަސްލަމް ވިދާޅުވި އެވެ. އަދި އެއީ ކައުންސިލް ހައުސިންގއަށް ވަންނަންޖެހޭ އާއިލާތައް ކަމަށާއި ކައުންސިލް ހައުސިންގއަކީ، މީހުން މަގުމަތި ވިޔަ ނުދިނުމަށްޓަކައި ވަންނަން ދައްކާ ބޯހިޔާވަހިކަމެއް ކަމަށެވެ.

އަސްލަމް ވިދާޅުވީ، 24 ޕަސެންޓް އާއިލާތައް ކޮންމެވެސް މިންވަރެއްގެ އާމްދަނީއެއް ލިބި، ހައުސިންގއިން ނަގާ ފްލެޓަށް ފައިސާ ދެއްކުމުގެ ފުދުންތެރިންކަން އެބަހުރި ކަމަށެވެ. މެދު ފަންތީގައި 33 ޕަސެންޓް އާއިލާ އުޅޭ ކަމަށާއި 28 ޕަސެންޓް ތަނަވަސް އާއިލާ އެބައުޅޭ ކަމަށްވެސް އަސްލަމް ވިދާޅުވި އެވެ.

އަސްލަމް ވިދާޅުވީ، ދިރިއުޅެން ކަމުނުދާ ތަންތަނުގައި ދިރިއުޅޭ 21،000 އާއިލާގެ ތެރޭގައި ކުރިން ފާހަގަކޮށްފައިވާ ހުރިހާ ގިންތިއެއްގެ އާއިލާތައް ދިރިއުޅެމުންދާ ކަމަށެވެ.