ގަލޮޅު ދަނޑުގެ މަސައްކަތް މި އަހަރު ނުފެށޭނެ: ވަޒީރު

ރާއްޖޭގެ ރަސްމީ ފުޓްބޯޅަ ދަނޑު ކަމަށްވާ ގަލޮޅު ދަނޑުގެ މަސައްކަތް މި އަހަރު ނުފެށޭނެ ކަމަށާއި އެހެން ކަމުން މިހާރު އޮތް ހައްލަކީ ހުރި ގޮތަށް އެ ސްޓޭޑިއަމް ބޭނުން ކުރުން ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ގަލޮޅު ދަނޑުގެ މަސައްކަތް މި އަހަރު ފެށިދާނެތޯ ކުރެވުނު ސުވާލަކަށް ޖަވާބު ދެމުން ވަޒީރު ވިދާޅުވީ ކުރިން ޕްލޭނުކޮށްފައި އޮތީ ދަނޑުގެ މަސައްކަތް ކުރިއަށް ގެންދަން ކަމަށާއި އެކަމަށް ހުއްދަވެސް ރައީސް އޮފީހުން ލިބިފައިވާ ކަމަށެވެ. އެކަމަކު މިހާރު ކުރިމަތިވެފައިވާ ހާލަތާއެކު ބޮޑު ހޭދައެއްކޮށް, އެ މަސައްކަތް ނުކުރެވޭނެކަން ޔަގީންވާ ކަމަށެވެ.

ގަލޮޅު ދަނޑަކީ ދިވެހިންގެ ހިތާއި ގުޅިފައިވާ ފުޓްބޯޅައިގެ ހުރިހާ ހަނދާންތަކެއް އެ ތަނެއްގައިވާ ތަނަކަށްވުމާއެކު އެތަނުގައި އަބަދުވެސް ފުޓްބޯޅަ ކުޅޭތަން ފެންނަން ބޭނުންވާ ކަމަށާއި އެހެން ނަމަވެސް ބައިނަލްއަގުވާމީ މެޗުތައް މިހާރު ކުޅެން ޖެހުނަސް އެކަން ކުރަން ޖެހޭނީ އެއޮތް ހާލަތުގައި ކަމަށް ވަޒީރު ވިދާޅުވިއެވެ.

ހުޅުމާލޭ ސިންތެޓިކް ޓްރެކުގައި އޮތް ވިނަގަނޑު ތަރައްގީކޮށް ލައިޓިން ސިސްޓަމެއް ގާއިމު ކުރުމަށް 25 މިލިޔަން ރުފިޔާ ޚަރަދުވާ ކަމަށާއި ހަމައެކަނި ލައިޓިންނަށް އެކަނިވެސް 12 މިލިޔަން ޚަރަދުވާއިރު، މިހާރުގެ ހާލަތުން އެ މަސައްކަތް ނުކުރެވޭނެކަން ޔަގީންވާ ކަމަށް ވަޒީރު ވިދާޅުވިއެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން ކުރިން ބުނެފައިވަނީ އައު ސީޒަނުގެ މެޗުތައް ދެ ދަނޑެއްގައި ކުޅެން ނިންމާފައިވާ ކަމަށެވެ. އެ ގޮތުން ގަލޮޅު ދަނޑުގެ އިތުރުން ހުޅުމާލެ ދަނޑުގައި މެޗުތައް ކުޅުމަށް ނިންމާފައިވީ ނަމަވެސް، ކޮރޯނާވައިރަސް (ކޮވިޑް-19) އާ ގުޅިގެން ސަރުކާރުގެ ޚަރަދުތައް ކުޑަކުރުމުގެ ވިސްނުން ގެންގުޅޭއިރު، ހުޅުމާލެ ދަނޑުގެ މަސައްކަތް ކުރެވޭނެ ކަމަށް ނުބެލެވޭ ކަމަށް ދެވަނަ ދައުރަކަށް އިންތިޚާބުވުމަށް ފަހު އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވިއެވެ.

އަދި މިހާރުގެ ހާލަތަށް ބަލާއިރު ހުޅުމާލޭ އޮންނަ ދަނޑު އަވަސް ކޮށްލައިގެން ތައްޔާރުކުރުން މަޖުބޫރު ނޫން ކަމަށާއި، ޑިސެމްބަރު މަސް އަންނަންވާއިރަށް ވިލިމާލޭގައި ހަދަމުންދާ ދަނޑު ނިމޭނެ ކަމަށް ބެލެވޭއިރު ސީޒަނުގެ ބައެއް މެޗުތައް ވިލިމާލޭ ދަނޑުގައި ކުޅުމުގެ ފުރުސަތު ލިބިގެންދާނެ ކަމަށް ބައްސާމް ވިދާޅުވިއެވެ.

ދަނޑުގެ ދެކުނު ފަރާތް (ސަހާރާ ފަޅި) އަދި އިރުމަތީ ފަރާތުގެ (ބޮޑުގޭޓު ފަޅި) ބޭނުންކުރުން ރައްކާތެރި ނޫން ކަމަށް ޕްލޭނިންގ މިނިސްޓްރީން އަންގާފައިވާތީ، މިދިޔަ އަހަރު އެތަން ބަންދުކުރުމާއި ގުޅިގެން ބައިނަލްއަގުވާމީ މެޗުތައް ކުޅެފައި ވަނީ ވެސް މަދު އަދަދެއްގެ ޓިކެޓު ވިއްކައިގެންނެވެ.

ބަންދުކުރި ދެ ސިޑިބަރީގެ ތެރެއިން ސަހަރާ ފަޅީގެ ސިޑިބަރި އެއްކޮށް ހަދާނިމިފައި ވަނީ 90ގެ އަހަރުތަކުގެ ކުރީކޮޅުއެވެ. ސަހަރާ ފަޅީގެ ސިޑިބަރި ދަށުގައި، އެކޮމަޑޭޝަން ބްލޮކުގެ ކޮޓަރިތަކާއި ހޭންޑްބޯލް އެސޯސިއޭޝަނާއި ކެރަމް އެސޯސިއޭޝަނުގެ އޮފީސް އަދި ކެރަމް ހޯލް ހުންނައިރު، ކުޅިވަރާ ބެހޭ ވުޒާރާގެ ބައެއް ގުދަން ވެސް ހުރެއެވެ.

1947 ވަނަ އަހަރު ކުޅެން ފެށި ގަލޮޅު ދަނޑަކީ އޭރު މާލޭގައި ހަތަރު އަވަށުގެ ހަތަރު ކްލަބަށް ގާއިމު ކުރެވުނު ދަނޑުތަކުގެ ތެރެއިން ދަނޑެކެވެ. މި ގޮތުން ގަލޮޅު ދަނޑާއެކު މިހާރު އޭޑީކޭ ހޮސްޕިޓަލް ހުންނަ ސަރަހައްދުގައި އޭރުގެ ވައިލެޓް ފެހި އެއީ ހެންވޭރު ދަނޑު ކަމުގައި ހަމަޖެހުނުއިރު، ޖަމާލުއްދީން ސްކޫލް ހުރި ތާނގައި މައްޗަންގޮޅި ދަނޑު އަދި މާފަންނު ބިސްބުރު އިރުން މާފަންނު ދަނޑު ހެދިގެން ދިޔައެވެ. އޭރުގެ ރަސްމީ ފުޓްބޯޅަ ދަނޑަކީ މިހާރުގެ ހެންވޭރު ދަނޑެވެ. ގަލޮޅު ދަނޑު ރަސްމީ ފުޓްބޯޅަ ދަނޑަކަށް ހަމަޖައްސާފައި ވަނީ 1974 ވަނަ އަހަރުއެވެ. އެހެންކަމުން ގަލޮޅު ދަނޑު ރަސްމީ ފުޓްބޯޅަ ދަނޑުގެ ގޮތުގައި އޮންނަތާ މިހާރު 46 އަހަރު ވަނީ ވެފައެވެ.