ބީއެމްއެލްގެ ބްރާންޗުތަކުން ފޯރުކޮށްދޭނީ އޮންލައިންކޮށް ނުވަތަ އޭޓީއެމްއިން ނުލިބޭ ޚިދުމަތްތައް
ޚިދުމަތް ދިނުމަށް ހަމަޖެހިފައިވަނީ އެޕޮއިންޓްމަންޓް އުސޫލުން
އައު އާންމު ހާލަތުގެ ދަށުން ބީއެމްއެލްގެ ބްރާންޗެއްގައި ޚިދުމަތް ދެނީ
މި ހަފުތާގެ ނިޔަލަށް ބޭންކް އޮފް މޯލްޑިވްސް (ބީއެމްއެލް) ގެ ބްރާންޗުތަކާއި ސާވިސް ސެންޓަރުތަކުން ދެމުންދާނީ އޮންލައިން އަދި ސެލްފް ސާވިސް ބޭންކިންގ މެދުވެރިކޮށް ލިބެން ނުހުންނަ ޚިދުމަތްތައް ކަމަށް އެ ބޭންކުން ހާމަކޮށްފިއެވެ.
އެގޮތުގެ މަތިން، މާލެ ސަރަހައްދުން ބީއެމްއެލްގެ ޚިދުމަތް ހޯދާ ފަރާތްތަކަށް ޚިދުމަތް ދިނުމަށް ހަމަޖެހިފައިވަނީ އެޕޮއިންޓްމަންޓް އުސޫލުންނެވެ. ބީއެމްއެލްގެ އެޕޮއިންޓްމަންޓް ޕޯޓަލް ނުވަތަ އެސްއެމްއެސް މެދުވެރިކޮށް އެޕޮއިންޓްމަންޓަށް އެދުމަށް އެއް ދުވަސް ކުރިން ހުޅުވާލެވޭނެއެވެ.
ބީއެމްއެލްގެ ގިނަ ޚިދުމަތްތަކެއް ބޭންކުގެ ބްރާންޗުތަކަށާއި ސާވިސް ސެންޓަރުތަކަށް ނުގޮސް ލިބޭނެ ގޮތް ހަމަޖައްސާފައިވަނީ ބޭންކުގެ ކަސްޓަމަރުންނާއި މުވައްޒަފުންގެ ރައްކާތެރިކަމަށްޓަކައެވެ. ބީއެމްއެލްއިން ވަނީ ގޭގައި ތިބެގެން ބޭންކިންގ ޚިދުމަތް ބޭނުންކޮށް، އޮންލައިންކޮށް ލިބެން ހުންނަ ޚިދުމަތްތައް ބޭނުންކުރުމަށް ބޭންކުގެ ކަސްޓަމަރުން ގާތު އެދިފައެވެ.
