މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަނެއްކާ ވެސް އެ ޕާޓީގެ ނޫސް މަޖައްލާ "ޚަބަރު ސިޓީ" ނެރެން ފަށައިފިއެވެ.
އެމްޑީޕީގެ 15 ވަނަ އަހަރީ ދުވަހާ ގުޅުވައިގެން "ޚަބަރު ސިޓީ" އަލުން ނެރެން ފަށާފައިވާއިރު، މި ނޫހުގެ އެޑިޓަރު މުހައްމަދު އަބްދުﷲ ޝަފީގު ވިދާޅުވީ މި މަޖައްލާގެ ފުރަތަމަ އަދަދު ޚާއްސަކޮށްފައިވަނީ އެމްޑީޕީގެ އަމާޒާއި ޕާޓީ އުފެއްދުމަށް ކުރި މަސައްކަތްތަކާއި ވެދިޔަގޮތުގެ މައްޗަށް ކަމަށެވެ.
މި މަޖައްލާ ނެރެފައި މިވަނީ ވަރަށް ޚާއްސަ ލިޔުންތެރިންގެ ލިޔުންތަކާއި އެކުގައި ކަން ވަނީ ފާހަގަ ކުރައްވާފައެވެ. 1990 ވަނަ އަހަރު ނުކުތް މަޝްހޫރު "ސަންގު” މަޖައްލާގައި ހިމަނާފައިވާ ރައީސް އިބްރާހިމް މުހައްމަދު ސާލިޙާއި، ރައީސް މުހައްމަދު ނަޝީދު ލިޔުއްވާފައިވާ ލިޔުންތައް މި އަދަދުން ފެނިގެންދާނެ ކަމަށެވެ.
މީގެ އިތުރުން އެމްޑީޕީގެ ޗެއާޕާސަން އަލްއުސްތާޛު ޙަސަން ލަތީފް ލިޔުއްވާފައިވާ ޤާނޫނީ ދާއިރާއާ ގުޅުންހުރި ގިނަ ލިޔުންތައް ވެސް ފެނިގެންދެއެވެ. މި މަޖައްލާ ނެރުމުގެ މަޤްސަދަކީ ޕާޓީގެ ޚަބަރާއި މައުލޫމާތު ރަސްމީކޮށް އާންމު ކުރުމެވެ.
މި މަޖައްލާގައި ޕާޓީގެ ގުނަންތަކުން ކުރާ މަސައްކަތުގެ މައުލޫމާތު ހާމަކުރެއެވެ. އަދި އެކި ކަންކަމުގައި އާންމު މެންބަރުން ދެކޭ ގޮތް ފާޅުކުރުމަށް ފުރުސަތު ވަނީ ދީފައެވެ.
މީގެ އިތުރުން ސަރުކަރާއި ރައްޔިތުންގެ މަޖިލީހުން ކުރާ ކަންކަމުގެ މައުލޫމާތާއި ޕާޓީގެ ސެކްރެޓެރިއޭޓުންނާއި ވަޒީރުންނާއި، މަޖިލިސް މެންބަރުންނާއި، ގައުމީ މަޖިލީހުގެ މެންބަރުންނާއި، ކައުންސިލަރުންނާއި، ޕާޓީގެ އަންހެނުންގެ ރޫޚާއި، ޒުވާނުންގެ ހިތްވަރާއި، ކޮމިޓީތަކާއި، ކޮންގްރެސްގެ މެންބަރުން އެކި މައުޟޫއުތަކަށް ލިޔުއްވާ އިލްމީ، ތާރީޚީ އަދި ސިޔާސީ ލިޔުންތައް ޝާއިއު ކުރެވޭނެއެވެ.
އަދި ސޯޝަލް މީޑިއާއިން ފާހަގަކުރެވޭ ޚިޔާލްތަކާއި ފާޑުކިއުންތަކާއި ލިޔުންތައްވެސް ހިމެނިގެންދެއެވެ. މި މަސައްކަތް ކުރިއަށްދަނީ އެމްޑީޕީގެ "ޒުވާނުންގެ ހިތްވަރު" ގެ ޚާއްސަ އެހީތެރިކަމާއި އެކުގައެވެ.
"ޚަބަރު ސިޓީ" ގެ ނަމުގައި އެމްޑީޕީގެ ޚަބަރާއި މައުލޫމާތު ފެތުމުގެ މަސައްކަތް ފުރަތަމަ ފަށާފައިވަނީ 1 ޑިސެމްބަރު 2003 ގައެވެ. އެގޮތުން އެއީ ރާއްޖޭގައި އެމްޑީޕީ ރަޖިސްޓްރީ ކުރުމަށް ކުރި ގިނަ މަސައްކަތްތަކަށް ސަރުކާރުން ހުރަސް އަޅައި އެމަސައްކަތް ކުރާނެ އެއްވެސް ފުރުސަތެއް ނުދިނުމުން 10 ނޮވެމްބަރު 2003 ގައި ސްރީލަންކާގެ ކޮލޮމްބޯގައި ޕާޓީ އިއުލާން ކުރުމަށް ފަހުއެވެ.
