މި ސަރުކާރުގައި ކަރަންޓްގެ އަގު ހެޔޮކުރެވިފައިވަނީ އެންމެ ފަހަރަކު!
ކަރަންޓްގެ ޚަރަދު ކުޑަކުރުމަށްޓަކައި އެންވަޔަރުމަންޓް މިނިސްޓްރީން މަސައްކަތް ކުރަމުންދާ ކަމަށް ވިދާޅުވި
ސްޓެލްކޯ
މި ސަރުކާރު އައިފަހުން ކަރަންޓްގެ އަގު ދަށްކުރެވިފައިވަނީ އެންމެ ފަހަރަކު ކަމަށް މޯލްޑިވްސް އެނަރޖީ އޮތޯރިޓީގެ ޑިރެކްޓަރ މުއާވިޔަތު ޝަރީފް ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން މުއާވިޔަތު ވިދާޅުވީ ކަރަންޓްގެ އަގުތައް ރިވިއު ކުރުމަކީ އަބަދުވެސް ކުރަމުންދާ ކަމެއް ކަމަށާއި ކުރިއަށް މިއޮތް މަދު ދުވަސްކޮޅެއްގެ ތެރޭގައި ރިވިއު ކުރުމުގެ މަސައްކަތްތައް ކުރިއަށްދާނެ ކަމަށެވެ. ރިވިއު ކުރުމުން އޭގެ ނަތީޖާތަކަށް ބެލުމަށްފަހު މުސްތަގުބަލުގައި އަގު ދަށްކުރެވިގެންދާނެ ކަމަށް އޭނާ ވިދާޅުވިއެވެ.
މުއާވިޔަތު ވިދާޅުވީ މިހާރުވެސް ގްރޭޓަރ މާލެ ސަރަހައްދުގައި އާންމުންނަށް ކަރަންޓް ވިއްކާވަރު ވަނީ ދަށް ބޭންޑްތަކުން އިންޓެކް އުފައްދަން ކުރަންޖެހޭ ޚަރަދަށްވުރެ ދަށްކޮށްފައި ކަމަށެވެ. މިސަރުކާރުގެ ވައުދުގެ ތެރެއިން ޚާއްސަކޮށް ޑޮމެސްޓިކް ބޭންޑަށް އަދި ވިޔަފާރިތަކަށް އަގު ކުޑަކުރެވިފައިވާ ކަން އޭނާ ފާހަގަ ކުރެއްވިއެވެ.
ކަރަންޓްގެ ޚަރަދު ކުޑަކުރުމަށްޓަކައި އެންވަޔަރުމަންޓް މިނިސްޓްރީން މަސައްކަތް ކުރަމުންގެދާ ކަން ވެސް އޭނާ ފާހަގަ ކުރެއްވިއެވެ.
ޕްރޮގްރާމުގައި ވާހަކަ ދައްކަވަމުން މިނިސްޓްރީ އޮފް އެންވަޔަރަމަންޓްގެ ޑިރެކްޓަރ ޖެނެރަލް އަހުމަދު އަލީ ވިދާޅުވީ މީގެ ކުރިން ވަނީ އެކި އެކި ރަށްތަކާއި އެކި ސަރަހައްދުތަކަށް އެކި ރޭޓްތައް ކަނޑައަޅާފައި ކަމަށެވެ. ނަމަވެސް 01 މާރޗް 2019 އިން ފެށިގެން ރާއްޖޭގެ ހުރިހާ ޑޮމެސްޓިކް ކަސްޓަމަރުންނަށް އެއް ރޭޓެއް ކަނޑައަޅާފައިވާ ކަމަށެވެ.
އޭނާ އިތުރަށް ވިދާޅުވީ ކަރަންޓު އުފެއްދުމަށް ކުރާ ޚަރަދުގެ 80 ޕަސެންޓަކީ ތެލަށް ކުރާ ޚަރަދު ކަމަށާއި ތެލަށް ބަރޯސާވާ މިންވަރު ކުޑަކުރަން ޖެހޭ ކަމަށެވެ. ރާއްޖެއިން ލިބެންހުރި އިއާދަކުރަނިވި ހަކަތައިގެ ބޭނުން ކުރެވޭ މިންވަރު އިތުރުކުރަން ޖެހޭކަން އަހުމަދު ވަނީ ފާހަގަ ކުރައްވާފައެވެ.
ހއ. ތުރާކުނުން ފެށިގެން އައްޑޫ ސިޓީއާ ހަމައަށް އެކި ޕްރޮޖެކްޓްތައް ރޭވި ތަންފީޒީ މަރުހަލާގައި އޮތް ކަމަށާއި ކުރިއަށްއޮތް ދެ އަހަރެއްހާ ދުވަހުގެ ތެރޭގައި މި ޕްރޮޖެކްޓްތައް ނިމިގެން ދިއުމުން ތެލަށް ކުރާ ޚަރަދު ކުޑަވެ އޭގެ ރަނގަޅު އަސަރު ކުރާނެ ކަމަށް އޭނާ ވިދާޅުވިއެވެ.
