އެފްއޭއެމްގެ އިންތިޚާބު ބޭއްވީ ގަވާއިދާ ޚިލާފަށް: އާޒިމް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން އިންތިޚާބު ބޭއްވީ ސަރުކާރަށް ގޮންޖަހާފައި ގަވާއިދާ ޚިލާފަށް ކަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަދި އެފްއޭއެމްގެ ކުރީގެ ރައީސް އަލީ އާޒިމް ވިދާޅުވެއްޖެއެވެ.

އެފްއޭއެމުން އެ އިދާރާގެ އިންތިޚާބު ބޭއްވީ ބުރާސްފަތި ދުވަހު ބޭއްވި ކޮންގްރެސްގައެވެ. ބުރާސްފަތި ދުވަހު އެފްއޭއެމްގެ އިންތިޚާބު ބޭއްވިއިރު، އިންތިޚާބު ފަސްކޮށްދިނުމަށް ރައްޔިތުންގެ މަޖިލީހުގެ އިޖުތިމާޢީ ކޮމިޓީން ވަނީ ކުޅިވަރާ ބެހޭ ވުޒާރާގައި އެދިފައެވެ. އެއާއެކު އެ ވުޒާރާއިން ވަނީ އިންތިޚާބު ފަސްކުރުމަށް އެދި އެފްއޭއެމަށް ސިޓީއެއްވެސް ފޮނުވާފައެވެ.

ރައްޔިތުންގެ މަޖިލީހުގެ އިޖުތިމާޢީ ކޮމިޓީން އެފްއޭއެމްގެ އިންތިޚާބު ފަސްކޮށްދިނުމަށް އެދުނީ އެފްއޭއެމްއާ ދޭތެރޭގައި ފިޔަވަޅު އަޅައިދިނުމަށް އެދި ރައްޔިތުންގެ މަޖިލީހަށް މެންބަރު އާޒިމް ހުށަހެޅި ކުއްލި މައްސަލަ އިތުރަށް ދިރާސާ ކުރަމުން އަންނާތީއެވެ.

އެކަމަކު ބުރާސްފަތި ދުވަހު އެފްއޭއެމްގެ އިންތިޚާބު ބޭއްވިއިރު، ފީފާއިން ވެސް ވަނީ އެފްއޭއެމްގެ އިންތިޚާބު ބޭއްވޭނެ ކަމަށް އަންގާފައެވެ.

އެފްއޭއެމްގެ އިންތިޚާބާ ގުޅިގެން އާޒިމް ކުރެއްވި ޓްވީޓެއްގައި ވިދާޅުވީ ސަރުކާރަށް ގޮންޖަހާފައި އެފްއޭއެމްގެ އިންތިޚާބު ބޭއްވީ ޤާނޫނާއި ޤާނޫނުން ބާރު ލިބިގެން ހަދާފައިވާ ގަވާއިދާ ޚިލާފަށް ކަމަށެވެ. އެހެންކަމުން އެފްއޭއެމްގެ އިންތިޚާބަކީ ބާތިލު އިންތިޚާބެއްކަން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވާން ޖެހޭ ކަމަށާއި، ރައްޔިތުން ބޭނުންވަނީ ޤާނޫނީ ދައުލަތެއް މިގައުމުގައި ހިނގަން ކަމަށް އާޒިމް ވިދާޅުވިއެވެ.

ރައްޔިތުންގެ މަޖިލީހުން އެފްއޭއެމްގެ މައްސަލަ ބަލަމުން ދަނިކޮށް އެފްއޭއެމްގެ އިންތިޚާބު ބޭއްވިއިރު، އެފްއޭއެމްގެ އިންތިޚާބުގައި ރައީސްގެ މަގާމަށް ކުރިމަތިލެއްވީ ބައްސާމް އަދީލް ޖަލީލް އެކަންޏެވެ. ބައްސާމާއި އޭނާ ހުށަހެޅުއްވި ހިންގާ ކޮމިޓީއަށް އިތުރު ކެންޑިޑޭޓެއް ކުރިމަތިލާފައި ނެތުމުން، ބައްސާމުގެ ޓީމުގެ އިންތިޚާބުކޮށްފައިވަނީ ވޯޓަކާނުލައެވެ. އިތުރު ކެންޑިޑޭޓަކު ކުރިމަތިލާފައި ނެތިއްޖެނަމަ، ވޯޓަކާ ނުލާ އިންތިޚާބު ކުރާ ގޮތަށް އަސާސީ ގަވާއިދަށް ބަދަލު ގެނައީ ބުރާސްފަތި ދުވަހުގެ ކޮންގްރެސްގައި، ހުރިހާ މެމްބަރުންގެ އިއްތިފާގުންނެވެ.

އެފްއޭއެމްގެ މައްސަލައެއް ރައްޔިތުންގެ މަޖިލީހުން ބަލަމުން އަންނައިރު، ތިންވަނަ ފަރާތަކުން ނުފޫޒު ފޯރުވާނަ ރާއްޖެ ސަސްޕެންޑް ކުރަން ޖެހިދާނެ ކަމުގެ އިންޒާރެއް ފީފާއިން ވަނީ ބުދަ ދުވަހު ދީފައެވެ. މިއީ ރާއްޖެއަށް ދެ އަހަރުގެ ތެރޭގައި ކުރިމަތިވި މިފަދަ ދެވަނަ އިންޒާރެވެ.