ފުލުހުން އެކަށީގެންވާ ވަރަށް ތަހުޤީޤު ނުކުރާ ކަމަށް ބުނެ ހުށައެޅިފައިވާ މައްސަލަތަކެއް ޕީޖީން ދިރާސާ ކުރަނީ
1 ޖުލައި 2020 | ބުދަ 14:13މައްސަލައެއް ހުށައަޅައިގެން ނުބަލާ ކަމުގެ ޝަކުވާއެއް އޮތް ނަމަ، އެކަން ޕީޖީއަށް ހުށައެޅޭނެ
ޕީޖީ ހުސައިން ޝަމީމް- ޕީޖީ ވިދާޅުވީ، ހުށައެޅޭ މައްސަލަތައް ކޯޓަށް ހުށައެޅުމަށް ނަގާ މުއްދަތު ކުޑަ ކުރެވިފައިވާ ކަމަށް
ޖިންސީ މައްސަލަތަކުގައި ފުލުހުން އެކަށީގެންވާ ވަރަށް ތަހުޤީޤު ނުކުރާ ކަމުގެ ތުހުމަތު ކުރެވިގެން ހުށައެޅިފައިވާ މައްސަލަތަކެއް ފާހަގަވެފައިވާ ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
ބުދަ ދުވަހު އޮތް ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ، މިހާރު ދިމާވަމުންދާ މައްސަލަތަކުގައި ފުލުހުން އެކަށީގެންވާ ވަރަށް ތަހުޤީޤު ނުކުރާ ކަމުގެ ޝަކުވާ ޕީޖީއަށް ވެސް ހުށައެޅިފައިވާ ކަމަށާއި، ޤާނޫނާއި ޤަވާއިދުތަކާ އެއްގޮތަށް ތަހުޤީޤު ކުރިއަށްދޭތޯ ބެލުމަކީ ޤާނޫނުން ޕީޖީގެ މައްޗަށް ލާޒިމުވާ ކަމެއް ކަމަށެވެ. އަދި ފުލުހުންގެ މައްޗަށް އެފަދަ ތުހުމަތުތަކެއް ކުރެވޭ "ދެތިން ހަތަރު" މައްސަލައެއް ހުށައެޅިފައިވާ ކަމަށް ޕީޖީ ވިދާޅުވިއެވެ.
ޕީޖީ ވިދާޅުވީ، މައްސަލައެއް ހުށައަޅައިގެން ނުބަލާ ކަމުގެ ޝަކުވާއެއް އޮތް ނަމަ، އެކަން ޕީޖީއަށް ހުށައެޅުއްވުމަށް އެދިވަޑައިގަންނަވާ ކަމަށެވެ. އަދި އެފަދަ މައްސަލައެއް ހުށަހެޅިއްޖެނަމަ އެކަން ބަލާނެ ކަމުގެ ޔަޤީންކަން ޕީޖީ ވަނީ ދެއްވާފައެވެ.
އޭގެ އިތުރުން، ހިނގާ ހާދިސާތަކާ ގުޅިގެން ކޭސްތައް ރިޕޯޓް ކުރެވޭ މިންވަރު އިތުރުވެގެންދާކަން ފާހަގަ ކުރައްވައި ޝަމީމް ވިދާޅުވީ، ޖެނުއަރީ މަހު ގއ. ކަނޑުހުޅުދޫގައި ހިނގި ރޭޕްގެ މައްސަލައާއި، މިފަހުން ހިނގި ސަފާރީ ކޭސްއާ ގުޅިގެން އެފަދަ މައްސަލަތައް ހުށައެޅޭ މިންވަރު އިތުރުވެފައިވާ ކަމަށެވެ.
މިފަދަ މައްސަލަތަކުގައި ހެކި ހޯދުމުގައި ހުރި ދަތިތައް ފާހަގަ ކުރައްވައި ޕީޖީ ވިދާޅުވީ، އެފަދަ ހާދިސާއެއް ހިނގުމުން ވީހާވެސް އަވަހަށް ކަމާބެހޭ ފަރާތްތަކަށް ރިޕޯޓްކޮށް، ހެކި ރައްކާތެރިވާނެ ގޮތަކަށް ޢަމަލު ކުރުން މުހިއްމު ކަމަށެވެ.
އޭގެ އިތުރުން ޚާއްސަ އުސޫލުތަކަށް ޢަމަލު ކުރުމުގެ ޤާނޫނުގެ މަޤްސަދުތައް ދާދިފަހުން ސުޕްރީމް ކޯޓުން ނިންމި ނިންމުމެއްގައި ތަފްސީލު ކުރައްވާފައިވާކަން ފާހަގަ ކުރައްވައި ޕީޖީ ވިދާޅުވީ، ހެދިފައިވާ ޤާނޫނުތަކާއެކު، ކޯޓަށް ހުށައެޅޭ މައްސަލަތަކުގެ ޝަރީއަތްތައް ދިގުދެމިގެންދިޔަ ނުދީ މައްސަލަތައް އަވަސް ކުރުމަށް މުއައްސަސާތަކާ ގުޅިގެން ގިނަ މަސައްކަތްތަކެއް ކުރެވެމުންދާ ކަމަށެވެ.
މިދިޔަ އަހަރު ހުށައެޅުނު ޖިންސީ ކުށުގެ މައްސަލަތަކުގެ 122 މައްސަލަތައް ކޯޓަށް ހުށައެޅުމަށް އެވްރެޖްކޮށް ނަގާފައިވަނީ 76 ދުވަސް ކަމަށް ޕީޖީ ވިދާޅުވިއެވެ. އަދި މި އަހަރު 106 މައްސަލަ ހުށައެޅުނުއިރު، މައްސަލަ ކޯޓަށް ވެއްދުމަށް ނަގާފައިވަނީ 39 ދުވަސްކަން ފާހަގަ ކުރައްވައި ޕީޖީ ވިދާޅުވީ، މިއީ ލިބިވަޑައިގެން ކުރިއެރުމެއް ކަމަށެވެ.
