ކުޅިވަރު ދަނޑުތައް އަލުން ހުޅުވާލައިފި

ކޮރޯނާވައިރަސް (ކޮވިޑް-19) އާ ގުޅިގެން ބަންދުކުރި ކުޅިވަރު ކުޅޭ ތަންތަން އަލުން ހުޅުވާލައިފިއެވެ.

ކޮވިޑް-19 އާ ގުޅިގެން ކުޅިވަރާ ބެހޭ ވުޒާރާއިން މާލޭ ސަރަހައްދުގައި ގާއިމުކޮށްފައިވާ ކުޅިވަރު ކުޅޭ ތަންތަން ބަންދުކުރީ މާޗު މަހުގެ 15 ވަނަ ދުވަހެވެ.

ބުދަ ދުވަހު އެ ވުޒާރާއިން ނެރުނު ބަޔާނެއްގައި ބުނީ ކޮވިޑް-19 އާ ގުޅިގެން ކުޅިވަރުގެ ހަރަކާތްތައް މެދުކަނޑާލުމަށްފަހު، އައު އާންމު ހާލަތުގެ މަރުހަލާގައި ބުދަ ދުވަހުން ފެށިގެން ކުޅިވަރު ކުޅުމުގެ ހުއްދަ، ހެލްތު ޕްރޮޓެކްޝަން އެޖެންސީ (އެޗްޕީއޭ) ން ދީފައިވާ ކަމަށެވެ. އެހެންކަމުން، ކުޅިވަރު ކުޅުމުގެ ފުރުސަތު ލިބުމާއިއެކު، ބުދަ ދުވަހުން ފެށިގެން ކުޅިވަރު ކުޅޭ ތަންތަން ހުޅުވިފައި ހުންނާނެ ކަމަށް ވަނީ ބުނެފައެވެ.

އަދި މި ބަޔާނުގައި ވަނީ ކުޅިވަރު ކުޅުމުގައި އަމަލުކުރުމަށް، އެ ވުޒާރާ އާއި އެޗްޕީއޭއިން އެކުލަވާލާފައިވާ، "ކުޅިވަރު ކުޅުމުގައިއަމަލުކުރާނެ އާންމު އުސޫލު" ށް އަމަލުކުރުމަށް އަންގާފައެވެ. އަދި ކުޅިވަރު ކުޅުމުގެ ފުރުސަތު ހުޅުވާލެވިފައިވީ ނަމަވެސް، ކޮވިޑް-19 ގެ ހާލަތަށް ބަލައި ކޮންމެ ވަގުތެއްގައިވެސް ކުޅިވަރު ކުޅޭ ތަންތަން ބަންދު ކުރަންޖެހުމުގެ ފުރުސަތު އޮތްކަން ކުޅިވަރާ ބެހޭ ވުޒާރާއިން ނެރުނު ބަޔާނުގައި ވަނީ ފާހަގަކޮށްފައެވެ.

ބުދަ ދުވަހުން ފެށިގެން ކުޅިވަރު ކުޅުމުގެ ހުއްދަ ދިނުމާއެކު، ބައެއް ކުޅިވަރުތަކުގެ ގައުމީ ޓީމުތަކުން ވަނީ ފަރިތަކުރުންތައް ފަށާފައެވެ. ބުދަ ދުވަހުގެ ވަގުތެއްގައި ގައުމީ ބެޑްމިންޓަން ޓީމުން ފަރިތަކުރުންތައް ފެށިއިރު، މީގެ ކުރިން ޓޭބަލް ޓެނިހާއި ކްރިކެޓްގެ ގައުމީ ޓީމުން ވަނީ ފަރިތަކުރުންތައް ފަށާފައެވެ.

މި މަހުން ފެށިގެން ރާއްޖެއިން ލޮކްޑައުނަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއް ދިންއިރު، މިހާތަނަށް ކޮވިޑް-19 ޖެހިގެން ރާއްޖެއިން ނުވަ މީހަކު ވަނީ މަރުވެފައެވެ.