އިތުރު 13 މީހަކު ޕޮޒިޓިވްވެ ޖުމްލަ އަދަދު 2337ށް
30 ޖޫން 2020 | އަންގާރަ 01:50ހޯމަ ދުވަހު ޕޮޒިޓިވްވި މީހުންގެ ތެރޭގައި 5 ދިވެހިންނާއި ބަންގުލަދޭޝްގެ 7 މީހުން
އެކްޓިވް ސަރވައިލެންސްގެ ތެރެއިން މަގުމަތިން ދިޔަ މީހެއްގެ ސާމްޕަލް އާރުއާރު ޓީމުން ނަގަނީ
ރާއްޖެއިން ކޮވިޑް-19ށް އިތުރު 13 މީހަކު ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ޕޮޒިޓިވްވި 13 މީހުންގެ ތެރޭގައި ގިނައީ ބަންގުލަދޭޝް މީހުންގެ ކަމަށެވެ. އެގޮތުން ބަންގުލަދޭޝްގެ 7 މީހަކު ޕޮޒިޓިވް ވެފައިވާއިރު، 5 ދިވެހިންނާއި އިންޑިއާ މީހަކު ހިމެނެއެވެ. މިއާއެކު ރާއްޖޭގައި ކޮވިޑް-19 ޖެހުނު މީހުންގެ އަދަދު ވަނީ 2337ށް އަރާފައެވެ.
އެޗްޕިއޭއިން ހޯމަ ދުވަހު އާންމުކުރި މައުލޫމާތުތައް ދައްކާ ގޮތުން މިދިޔަ 24 ގަޑިއިރު ތެރޭގައި ބަލިން ރަނގަޅުވީ އިތުރު 13 މީހުންނެވެ. މިއާއެކު ބަލިން ފަސޭހަވި މީހުންގެ އަދަދު ވަނީ 1927ށް އަރާފައެވެ.
ކޮވިޑް-19 ޖެހި ރަނގަޅުވާ މީހުންގެ އަދަދު ދަށްވުމާއި ގުޅިގެން ފަރުވާދެމުން އަންނަ މީހުންގެ އަދަދު ވަނީ އިތުރުވެފައެވެ. އެގޮތުން އާދީއްތަ ދުވަހު މި އަދަދު ހުރީ 400 ގައެވެ. ނަމަވެސް ހޯމަ ދުވަހުގެ ތަފާސްހިސާބުތައް ދައްކާގޮތުން 397 މީހަކަށް ދަނީ ފަރުވާ ދެމުންނެވެ.
ކޮވިޑަށް ފަރުވާދެމުން އަންނަ 397 މީހުންގެ ތެރެއިން 3 މީހަކަށް އަންނަނީ އެޑްމިޓްކޮށްގެން ދަރުމަވަަންތަ ހޮސްޕިޓަލުގެ ޑީއެޗް-11 ގައި ފަރުވާ ދެމުންނެވެ.
