ރޭޕް މައްސަލައިގައި ތުހުމަތުކުރެވޭ މީހުން ހައްޔަރުގައި ނެތީ މެންބަރެއްގެ ނުފޫޒުން ކަމަށް ނުދެކުމަށް ރައީސް ނަޝީދު އެދިވަޑައިގެންފި
ނުފޫޒުފޯރުވުމަކީ ރަނގަޅުކަމެއް ނޫން: މަޖިލިސް ރައީސް
ށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ހުޅުމާލެ ފަޅުގައި އަޅާފައި އޮތް ސަފާރީއެއްގައި އަންހެނަކު ރޭޕް ކުރި މައްސަލައިގައި ތުހުމަތުކުރެވޭ މީހުން ހައްޔަރުގައި ނެތީ އެއްވެސް މެންބަރެއްގެ ނުފޫޒުން ކަމަށް ނުދެކުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފިއެވެ.
ހޯމަ ދުވަހުގެ ޖަލްސާގައި މިކަމާއި ގުޅޭގޮތުން ހުށަހެޅުނު ކުއްލި މައްސަލައަށް ވަނީ ބަހުސް ކޮށްފައެވެ. ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ މި މައްސަލަ ހުށަހަޅުއްވަމުން ވިދާޅުވެފައިވަނީ މި މައްސަލަ ތަހުގީގު ކުރުމުގައި ސިޔާސީ ގޮތުން ބާރުވެރި ފަރާތްތަކެއްގެ ނުފޫޒު ފޯރުވަމުންދާތީ މި މައްސަލަ ތަހުގީގު ކުރެވިދާނެ ކަމަށް ނުބެލެވޭ ކަމަށެވެ.
މި މައްސަލައިގައި ތުހުމަތު ކުރެވޭ މީހަކު ހައްޔަރުނުކޮށް ދޫކޮށްލާފައި ވަނީ އޭނާ އަކީ މަޖިލީހުގެ މެމްބަރެއްގެ ފިރިކަލެއް ކަމަށްވާތީ ކަމަށް، މަޖިލީހުގެ އެހެން މެމްބަރުން ވިދާޅުވަމުން ގެންދަވާކަން ފާހަގަކުރައްވާ މަޖިލީހުގެ ރައީސް ވިދާޅުވީ ފުލުހުން ބުނެފައިވަނީ މި މައްސަލައިގައި ތުހުމަތުކުރެވޭ މީހުން ދޫކޮށްލާފައިވަނީ އެއިރަށް ތަހުގީގު ކުރަން ޖެހޭ ވަރަށް ކުރުމަށްފަހު ކަމަށެވެ. އަދި އެގޮތަށް ކަން ހިނގާ ދިޔައީ އެއްވެސް މެމްބަރެއްގެ ބާރާއި ނުފޫޒުން ކަމަށް ނުދެކުމަށް އެދިވަޑައިގަންނަވާ ކަމަށެވެެ.
އެމަނިކުފާނު ވިދާޅުވީ މަޖިލީހުގެ އެއްވެސް މެމްބަރަކު އެއްވެސް އިދާރާއަކުން ތަހުގީގުކުރަމުންދާ މައްސަލަތަކަށް ނުފޫޒު ފޯރުވުމަކީ ރަނގަޅުކަމެއް ނޫން ކަމަށެވެ. އަދި އެއީ މަޖިލީހުން އެއްވެސް ގޮތަކަށް ބަލައިގަންނާނެ ކަމެއް ނޫން ކަމަށެވެ.
ހުޅުމާލެ ފަޅުގައި އަޅާފައި އޮތް ސަފާރީއެއްގައި ދިވެހިރާއްޖޭގައި މަސައްކަތް ކުރާ އުމުރުން 27 އަހަރުގެ ބިދޭސީ އަންހެނަކަށް ގަދަކަމުން ޖިންސީ ގޯނާކުރި މައްސަލަ ފުލުހުންނަށް ހުށަހަޅާފައިވަނީ ހުކުރު ދުވަހުގެ ފަތިހު ފަހެއް ޖެހިހާއިރު އެވެ.
އާދީއްތަ ދުވަހު މި މައްސަލައާއި ގުޅިގެން ފުލުހުން ނެރުނު ބަޔާނެއްގައި ބުނެފައިވަނީ މި މައްސަލައިގައި އެއްވެސް ނުފޫޒެއް ނެތި ފުރިހަމަ ތަހުގީގެއް ހިންގައި އަޅަންޖެހޭ އެންމެހައި ފިޔަވަޅުތައް އަޅަމުންގެންދާނެ ކަމުގެ ޔަގީންކަން އަރުވާ ކަމަށެވެ. އަދި ތަހުގީގަށް ނުފޫޒު ނުފޯރާނެ ކަމަށް ފުލުހުން ބުނެފައިވާއިރު ހައްޔަރުކުރި ދެ މީހުން ދޫކޮށްލުމުގައި، އެ މުއައްސަސާއަށް ސިޔާސީ ނުފޫޒު ފޯރާފައިވާ ކަމަށް ގިނަ ފަރާތްތަކުން ދަނީ ތުހުމަތު ކުރަމުންނެވެ.
