ކުޅުން ހުއްޓާލަން ނިންމި ރޮބެން ގްރޮނިންގެންގެ ޖާޒީގައި

މިދިޔަ ސީޒަނަށް ފަހު ކުޅުން ހުއްޓާލި ނެދަލެންޑްސް ފޯވާޑް އާޔެން ރޮބެން، އޭނާ ކެރިއަރު ފެށި ކްލަބު ކަމަށްވާ ނެދަލެންޑްސްގެ ގްރޮނިންގެންއަށް ސޮއިކޮށްފިއެވެ.

ރޮބެން ވަނީ 2018-2019 ވަނަ އަހަރުގެ ސީޒަނަށް ފަހު، އޭނާގެ އެންމެ ފަހުގެ ކްލަބު ބަޔާން މިއުނިކާއެކު ހަދާފައިވާ އެއްބަސްވުން ހަމަވުމުން ކުޅުން ހުއްޓާލާފައެވެ.

އެކަމަކު އޭޕްރީލް މަހުގެ ތެރޭގައި ދިން އިންޓަވިއުއެއްގައި ރޮބެން ވަނީ ކުޅުން ހުއްޓަލިތާ މާގިނަ ދުވަސްތަކެއް ނުވަނީސް އަލުން ކުޅުމުގެ ތެރެއަށް އަންނަން ވިސްނި ކަމަށާއި މިހާރުވެސް އެ ޚިޔާލު ގެންގުޅޭ ކަމަށް ބުނެފައެވެ.

އެއާއެކު ދާދި ފަހުން ނެދަލެންޑްސްގެ ގްރޮނިންގެންއިން ވަނީ އުމުރުން 36 އަހަރުގެ ރޮބެން އެޓީމަށް ސޮއިކުރިކަން ހާމަކޮށްފައެވެ.

ރޮބެން، ފުޓްބޯޅަ ކެރިއަރު ފެށީ 2000 ވަނަ އަހަރު ގްރޮނިންގެންއިންނެވެ. ގްރޮނިންގެންގެ އެކަޑަމީން ތަމްރީނުވި ރޮބެން ވަނީ އެ ކްލަބުގެ ސީނިއާ ޓީމަށް ދެ އަހަރު ކުޅެދީފައެވެ. މި މުއްދަތުގައި ރޮބެން ވަނީ އެޓީމަށް ކުޅެދިން 52 މެޗުގައި 12 ލަނޑު ކާމިޔާބުކޮށްފައެވެ.

އޭގެ ފަހުން ނެދަލެންޑްސްގެ ޕީއެސްވީ އާއި އިންގްލެންޑުގެ ޗެލްސީ އާއި ސްޕެއިންގެ ރެއާލް މެޑްރިޑަށް ކުޅުމަށް ފަހު ކެރިއަރުގެ ބޮޑުބައި ހޭދަކުރީ ޖަރުމަންގެ ބަޔާން މިއުނިކުގައެވެ. އެގޮތުން 2013 ވަނަ އަހަރު ބަޔާނުން ސީޒަނުގެ ތިން ތަށި ކާމިޔާބުކުރިއިރު، ރޮބެން ވަނީ ބަޔާންގައި މޮޅު ކުޅުމެއް ދައްކާފައެވެ.

ރޮބެން ވަނީ އޭނާގެ ކްލަބު ކެރިއަރުގައި 28 ތަށި އުފުލާލާފައެވެ. އަދި ނެދަލެންޑްސްގެ ހުރިހާ އުމުރުފުރައެއްގެ ގައުމީ ޓީމަށް ކުޅެފައިވާ ރޮބެން ވަނީ ނެދަލެންޑްސް ސީނިއާ ގައުމީ ޓީމަށް 2003ން 2017ށް ކުޅެ، 96 މެޗުގައި 37 ލަނޑު ޖަހާފައެވެ.