ޖުލައި މަސް ނިމެންދެން މުއްދަތު ހަމަވެފައިވާ އައިޑީ ކާޑު ބޭނުން ކުރެވޭނެ
މިގޮތަށް އަމަލު ކުރަމުން ގެންދާނީ 2020 ޖުލައި 31 ވަނަ ދުވަހުގެ ނިޔަލަށް
ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން- އައިޑީ ކާޑު ހެއްދުމުގެ ޚިދުމަތް ވަނީ ވަގުތީ ގޮތުން މެދުކަނޑާލާފައި | ޓްވިޓަރ/ބިންޖަނާބް
ޖެނުއަރީ 1 ގެ ފަހުން މުއްދަތު ހަމަވެފައިވާ އައިޑީކާޑުގެ ނަންބަރަށް ބެލުމަށްފަހު ހިދުމަތްދެވޭ ގޮތަށް އޮތް އޮތުމުގެ މުއްދަތު އިތުރުކޮށްފިއެވެ.
ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ނެރުނު އިއުލާނެއްގައި ބުނީ، ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ސަރުކާރުން މުހިންމު ފިޔަވަޅުތަކެއް އަޅަމުން ގެންދާ މިދަނޑިވަޅުގައި އައިޑީކާޑު ހެދުމުގެ ޚިދުމަތް މެދުކަނޑާލާފައިވާ ކަމަށެވެ. އަދި މިގޮތުން، އައިޑީކާޑު ނެތުމުން، އައިޑީކާޑު މެދުވެރިކޮށް ދެވޭ އެކިއެކި ޚިދުމަތްތައް ނުލިބުމުގެ ޝަކުވާ ލިބިފައިވާތީ، އިތުރު ގޮތްތަކެއް ހަމަޖައްސާދީފައިވާ ކަމަށް ޑީއެންއާރުން ބުނެއެވެ.
އެގޮތުން އަލަށް އުފަންވާ ކުއްޖެއްނަމަ ނުވަތަ އައިޑީކާޑު ގެއްލިފައިވާނަމަ ނުވަތަ މުއްދަތު ހަމަވެފައިވާނަމަ، އުފަންދުވަހުގެ ސެޓްފިކެޓް، ޕާސްޕޯޓް، ޑްރައިވިންގް ލައިސަންސް ނުވަތަ 2020 ޖެނުއަރީ 1 ވަނަ ދުވަހުގެ ފަހުން މުއްދަތު ހަމަވެފައިވާ އައިޑީ ކާޑު ނަންބަރަށް ބަލާ ޚިދުމަތް ފޯރުކޮށްދިނުމަށް މީގެ ކުރިން ވަނީ ހަމަޖައްސާފައެވެ. އަދި އެ މުއްދަތު އަންނަ ޖުލައި މަހުގެ ނިޔަލަށް މިހާރު ވަނީ އިތުރުކޮށްފައެވެ.
ޑީއެންއާރުން ބުނީ މިގޮތަށް އަމަލު ކުރަމުން ގެންދާނީ 2020 ޖުލައި 31 ވަނަ ދުވަހުގެ ނިޔަލަށް ކަމަށެވެ.
