އެންމެ ކަޅު ދުވަސްވަރު އާސެނަލްގައި މަޑު ކުރުން އެއީ މޮޔަ ކަމެއް ކަމަށާއި، އޭނާއަކީ ޕިއޭ-އެމެރިކް އޮބަމަޔަން ނަމަ އާސެނަލްގައި އިތުރަށް މަޑު ނުކުރާނެ ކަމަށް އާސެނަލްގެ ކުރީގެ މިޑްފީލްޑަރު އެމަނުއަލް ޕެޓީ ބުނެފިއެވެ.

އާސެނަލްގެ ކެޕްޓަން އޮބަމަޔަންއަކީ އެ ކްލަބުގެ ތާރީޚުގައި ގަތް އެންމެ އަގު ބޮޑު ކުޅުންތެރިޔާއެވެ. ޖަރުމަންގެ ބްރޫޝިއާ ޑޯޓުމުންޑަށް ކުރިން ކުޅުނު ފޯވާޑުގެ ސޮއި އާސެނަލުން ހޯދީ 56 މިލިއަން ޕައުންޑަށެވެ.

އާސެނަލްގެ ކުރިމަގާއި ބެހޭ ގޮތުން ޕެޓީ ބުނީ އޭނާއަށް ފެންނަ ގޮތުގައި އާސެނަލްގެ ކުރިމަގު ބަނަ ކަމަށާއި، މިހާރު މި ދާވަރުން ދާކަމަށްވަނީ ނަމަ މުސްތަގުބަލުގައި އާސެނަލް ވާނީ އާދައިގެ ކްލަބަކަށް ކަމަށެވެ.

އާސެނަލްގެ ކުރިމަގާއި ބެހޭ ގޮތުން ސުވާލު އުފެދެނީ އެ ކްލަބަށް ކުޅޭ ކުޅުންތެރިންގެ ސަބަބުން ކަމަށް ބުނަމުން ޕެޓީ ބުނީ އެ ކްލަބުގައި މިހާރު ތިބި ކުޅުންތެރިންގެ ތެރެއިން 75 އިންސައްތަ ކުޅުންތެރިންނަކީ ކްލަބު ލޯބި ނެތް ކުޅުންތެރިންތަކެއް ކަމަށާއި، އެ ކުޅުންތެރިންނަށް އާސެނަލްގެ ޖާޒީ ލުން ހައްގު ނޫން ކަމަށެވެ.

ކޮރޯނާވައިރަސް (ކޮވިޑް-19) ގުޅިގެން ސީޒަން މެދުކެނޑުމުގެ ކުރިން އުންމީދުކުރީ ކްލަބުގެ ހާލަތު ރަނގަޅުވާނެ ކަމަށް ކަމަށާއި، އެކަމަކު އަލުން ކުޅުނު ދެ މެޗުން ބަލިވުމުގެ ފަހަތުގައި ވަނީ ކުޅުންތެރިން ކަމަށް ޕެޓީ ބުންޏެވެ. އެ ދެ މެޗުން ބަލިވުމުގެ ޒިންމާ ފުރިހަމައަށް ކުޅުންތެރިން ނަގަންޖެހޭ ކަމަށް ބުނަމުން ޕެޓީ ބުނީ ކުޅުންތެރިންގެ ފަރާތުން މޮޅުވުމަށް ލާންޖެހޭ ހިތްވަރު ދެ މެޗުގައިވެސް ނުފެންނަ ކަމަށެވެ.

އޮބަމަޔަންގެ ކުރިމަގާ މެދު ޕެޓީ ސުވާލު އުފެއްދިއިރު، ދާދި ފަހުން އޮބަމަޔަން ވަނީ އާސެނަލްގައި މަޑުކުރުމާމެދު އަދި ވަކިގޮތެއް ނުނިންމާ ކަމަށް ބުނެފައެވެ. އަދި އެ ނިންމުން ވެގެންދާނީ އޭނާގެ ކެރިއަރުގެ އެންމެ މުހިންމު ނިންމުމަށް ކަމަށްވެސް ބުންޏެވެ. އޮބަމަޔަން މި ވަގުތު އާސެނަލްގެ އެއްބަސްވުމުގައި ހުރީ 2021 ވަނަ އަހަރުގެ ހޫނު މޫސުމުގެ ނިޔަލަށެވެ.

މީގެ ކުރިން ގެބެނީސް ފުޓްބޯލް ފެޑެރޭޝަނުގެ ރައީސް ޕިއޭ އެލައިން މޯންގުއެންގިއުވެސް ވަނީ އާސެނަލްގައި އޮބަމަޔަން ފެއިލްވަމުންދާތީ ކްލަބު ބަދަލުކުރަން ގޮވާލައްވާފައެވެ.

އޮބަމަޔަން ހޯދަން ޗެލްސީއާއި ބާސެލޯނާއިންވެސް މަސައްކަތް ކުރަމުން އަންނައިރު، މިފަހަރުގެ ފިނި މޫސުމުގެ ޓްރާންސްފާ ބާޒާރުގައި އޮބަމަޔަން ހޯދަން ބާސާއިން ކުރި މަސައްކަތް ވަނީ ނާކާމިޔާބުވެފައެވެ. އެކަމަކު އޮބަމަޔަންއަށް ބާސާއިން އަދިވެސް ޝައުގުވެރިވާ ކަމަށާއި، މި ސީޒަން ނިމުމުން އޮބާމަޔަން ހޯދަން 50 މިލިއަން ޔޫރޯގެ ބިޑެއް ކުރަން ބާސާ އޮތީ ތައްޔާރަށް ކަމަށް ރިޕޯޓުތައް ބުނެއެވެ.

މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯއަށް އާސެނަލަށް ސޮއިކުރި އޮބަމަޔަން ވަނީ މިހާތަނަށް އެޓީމަށް ކުޅެދިން 99 މެޗުގައި 61 ލަނޑު ޖަހާފައެވެ.