މަޔޯކާ ބަލިކޮށް ރެއާލް އަނެއްކާވެސް އެއްވަނައަށް

ސްޕެނިޝް ލީގުގައި ފަސޭހަކަމާއެކު މަޔޯކާ ބަލިކޮށް، ރެއާލް މެޑްރިޑް އަނެއްކާވެސް ލީގު ތާވަލުގެ އެއްވަނައަށް ޖެހިލައިފިއެވެ.

ރެއާލް މެޑްރިޑްގެ ދަނޑުގައި ބުދަ ދުވަހުގެރޭ ކުޅުނު މެޗު އެޓީމުން ކާމިޔާބުކުރީ 2-0 ގެ ނަތީޖާއަކުންނެވެ.

މި މެޗު ފަށައިގެން ރެއާލުން މަޔޯކާގެ ހާފަށް ނުރައްކާކޮށް ގިނަ ހަމަލާތަކެއް ވަނީ ފޮނުވާލާފައެވެ. އެގޮތުން ރެއާލްގެ އެންމެ ކުރިއަށް ކުޅުނު ތިން ކުޅުންތެރިން ކަމަށްވާ ގެރެތު ބޭލް އާއި، އެޑެން ހަޒާޑް އަދި ކަރިމް ބެންޒެމާގެ އިތުރުން ވިނީޝިއަސް ޖޫނިއާއަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

މެޗުގައި ރެއާލުން ކާމިޔާބުކުރި ފުރަތަމަ ލަނޑު މެޗުގެ 19 ވަނަ މިނެޓުގައި އެޓީމަށް ކާމިޔާބު ކޮށްދިނީ ޒުވާން ފޯވާޑް ވިނީޝިއަސްއެވެ.

މި ލަނޑާއެކު މެޔޯކާއިން އެޓީމުގެ ކުޅުން ރަނގަޅުކޮށް ރެއާލްގެ ގޯލަށް ވަނީ ނުރައްކާ ކޮށްފައެވެ. އެގޮތުން އެޓީމުގެ ޒުވާން ފޯވާޑް ޓޭކް ކޫބޯއަށް ވަނީ ލަނޑު ޖަހަން ރަނުގެ ދެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ދެ ހަމަލާވެސް ގޯލާ އަމާޒުނުވެ ދިޔައީ ބޭރަށެވެ.

މެޗުގައި ރެއާލުން ލީޑު ފުޅާކުރީ ކެޕްޓަން ސާޖިއޯ ރާމޯސް ކާމިޔާބުކޮށްދިން ހިލޭ ޖެހުމަކުންނެވެ. މި ލަނޑާއެކު ސާޖިއޯ ރާމޯސް ވަނީ މި ސީޒަނުގައި ރެއާލަށް ދެވަނައަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާގެ މަގާމު ހޯދާފައެވެ.

މި ނަތީޖާއާއެކު ރެއާލުން ތާވަލުގެ އެއްވަނައަށް އަލުން އެރީ ކުޅުނު 31 މެޗުން ކާމިޔާބުކުރި 68 ޕޮއިންޓާއެކުގައެވެ. ތާވަލުގެ ދެވަނައިގައި އޮތް ބާސެލޯނާއަށްވެސް 31 މެޗުން 68 ޕޮއިންޓު ވަނީ ލިބިފައެވެ. ރެއާލަށް އެއްވަނަ ލިބެނީ ހެޑް ޓު ހެޑުން ކުރި ލިބޭތީއެވެ. ލީގު ތާވަލުގެ ތިންވަނައިގައި އޮތް އެތުލެޓިކޯ މެޑްރިޑަށް 31 މެޗުން ލިބިފައިވަނީ 55 ޕޮއިންޓެވެ.