އިތުރު 22 މީހަކު ޕޮޒިޓިވްވެ ޖުމްލަ އަދަދު 2260ށް

ރާއްޖެއިން ކޮވިޑް-19ށް އިތުރު 22 މީހަކު ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ޕޮޒިޓިވްވި 22 މީހުންގެ ތެރޭގައި ގިނައީ ބަންގުލަދޭޝް މީހުންގެ ކަމަށެވެ. އެގޮތުން ބަންގުލަދޭޝްގެ 13 މީހަކު ޕޮޒިޓިވްވެފައިވާ އިރު، 8 ދިވެހިންނާއި އިންޑިއާ މީހަކު ހިމެނެއެވެ. މިއާއެކު ރާއްޖޭގައި ކޮވިޑް-19 ޖެހުނު މީހުންގެ އަދަދު ވަނީ 2260ށް އަރާފައެވެ.

އެޗްޕިއޭއިން ބުދަ ދުވަހު އާންމުކުރި މައުލޫމާތުތައް ދައްކާ ގޮތުން މިދިޔަ 24 ގަޑި އިރު ތެރޭގައި ބަލިން ރަނގަޅުވީ އިތުރު 10 މީހުންނެވެ. މިއާއެކު ބަލިން ފަސޭހަވި މީހުންގެ އަދަދު ވަނީ 1839ށް އަރާފައެވެ.

ކޮވިޑް-19 ޖެހި ރަނގަޅުވާ މީހުންގެ އަދަދު ދަށްވުމާއި ގުޅިގެން ފަރުވާދެމުން އަންނަ މީހުންގެ އަދަދު ވަނީ އިތުރުވެފައެވެ. އެގޮތުން އަންގާރަ ދުވަހު މި އަދަދު ހުރީ 396 ގައެވެ. ނަމަވެސް ބުދަ ދުވަހުގެ ތަފާސްހިސާބުތައް ދައްކާގޮތުން 408 މީހަކަށް ދަނީ ފަރުވާ ދެމުންނެވެ.

ކޮވިޑަށް ފަރުވާދެމުން އަންނަ 408 މީހުންގެ ތެރެއިން 3 މީހަކަށް އަންނަނީ އެޑްމިޓްކޮށްގެން ފެސިލިޓީތަކުގައި ފަރުވާ ދެމުންނެވެ.