ކުރީގެ ސަރުކާރުގެ އިސްވެރިން ހައްދަވަނީ އިތުރުފުޅެއް، 11،000ރ އަށްވުރެ ކުޑަކޮށް ފްލެޓެއް ނުދެވޭނެ: އެޗްޑީސީ

ފްލެޓްތަކުގެ އަގާ ގުޅިގެން، ކުރީގެ ރައީސް އަބްދުﷲ ޔާމީންގެ ސަރުކާރުގެ އިސްވެރިން، ހާއްސަކޮށް، ކުރީގެ ހައުސިންގ މިނިސްޓަރ ޑރ. މުހައްމަދު މުއިއްޒު ހައްދަވަނީ އިތުރުފުޅު ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ބުނެފި އެވެ.

ރައީސް ޔާމީންގެ ވެރިކަމުގައި ފެށި "ހިޔާ" މަޝްރޫއުގެ ފްލެޓްތަކާ ގުޅޭގޮތުން ރައްޔިތުންގެ މެދުގައި އެކިގޮތްގޮތަށް ވާހަަކަ ފެތުރެމުންދާތީ، މީޑިއާތަކަށް ހިޔާ މަޝްރޫއުގެ ދަށުން އިމާރާތް ކޮށްފައިވ 25 ބުރީގެ 16 ޓަވަރާއި، އަދި އެޓަވަރުތަކުގައި ހަދާފައިވާ ޔުނިޓްތައް ނުވަތަ ފްލެޓްތައް ދައްކާލުމަށްފަހު، ނޫސްވެރިންނަށް މައުލޫމާތު ދެއްވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ، ފްލެޓްތަކުގެ އަގާ ގުޅޭ ސިޓީއެއް މީގެކުރިން ސޯސަލް މީޑިއާގައި ދައުރުވި ކަމަށެވެ. އަދި ސިޓީއަކީ އެޗްޑީސީއަށް އައިސްފައިވާ ސިޓީއެއް ނޫން ކަމަށާއި އެއީ ރައީސް އޮފީހުން ހައުސިންގ މިނިސްޓްރީއަށް ފޮނުވާފައިވާ ސިޓީއެއް ކަމަށެވެ. އެސިޓީގައި އަގުގެ ގޮތުގައި އޮތް އަދަދަކީ ފްލެޓްތައް ދެވޭނެ އަދަދު ނޫން ކަމަށްވެސް ސުހައިލް ވިދާޅުވި އެވެ.

ކުރީގެ ހައުސިންގ މިނިސްޓަރ މުއިއްޒު މިދިއަ އަހަރުގެ ޖޫން 25ގައި ކުރައްވާފައިވާ ޓްވީޓެއްގައި ބައެއް ލިޔެކިޔުންތަކާއެކު ވިދާޅުވެފައިވަނީ، ކޮންމެ މަހަކު 5600ރ އަށް، 20 އަހަރު ދުވަހުގެ ތެރޭގައި ދެއްކާ ހަލާސް ކުރާގޮތަށް ރައީސް ޔާމީން ނިންމަވާފައިވާ ކަމަށެވެ. އަދި އެކަން އެގޮތަށް ރައީސް ޔާމީން ނިންމަވާފައިވަނީ، 2018 ވަނަ އަހަރުގެ އޮކްޓޯބަރު މަހުގެ 17 ވަނަ ދުވަހު ކަމަށްވެސް މުއިއްޒު ވިދާޅުވި އެވެ. އެތާރީހަށް ބަލާއިރު، އެއީ ރިޔާސީ އިންތިހާބުގައި ރައީސް ޔާމީން ނާކާމިޔާބުވެ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރިޔާސީ އިންތިހާބު ކާމިޔާބު ކުރެއްވިފަހުން ރައީސް ޔާމީން އިއުލާންކުރެއްވި ކުރެއްވުމެއް ކަމަށް ވެއެވެ. ރިޔާސީ އިންތިހާބު ބާއްވާފައިވަނީ 23 ސެޕްޓެމްބަރު 2018 ވަނަ ދުވަހު އެވެ.

އެޗްޑީސީގެ މެނޭޖިންގ ޑިރެކްޓަރ ސުހައިލް ވިދާޅުވީ، ކުރީގެ ސަރުކާރުން އެވިދާޅުވާ އަގަށް ފްލެޓްގެ މަހު ކުއްޔެއްގެ ގޮތުގައި ދިނުމަކީ ވާނެކަމެއް ނޫންކަމަށެވެ. އަދި 20 އަހަރަށް ބަހާލައިގެން ފްލެޓްގެ ކުލީގެ ގޮތުގައި ކޮންމެ މަހަކު 11،000ރ އަށްވުރެ ކުޑަ އަދަދެއް ނަގައިގެން، ފްލެޓްތައް އަޅަން ނެގި ލޯނު ދެއްކުމަކީ ކުރެވޭނެ ކަމެއް ނޫން ކަމަށް ވެސް ސުހައިލް ވިދާޅުވި އެވެ.

ސުހައިލް ވިދާޅުވި ގޮތުގައި 25 ބުރީގެ 16 ޓަވަރުގައި 7000 ފްލެޓް އެޅުމަށް ކުރީގެ ސަރުކާރުން ނިންމިއިރު، ބޮޑަށް ވިސްނާފައިވަނީ ފްލެޓްތަކުގެ އަދަދު އިތުރުކުރުން ކަމަށެވެ. އެގޮތުން ފްލެޓްތަކުގައި ހުރި ކޮޓަރިތައް ކުޑަކަން ސުހައިލް ވެސް ވަނީ ފާހަގަކުރައްވާފަ އެވެ.

ކޮންމެ ޓަވަރެއްގައި 2000 މީހުން ދިރިއުޅޭނެ ކަމަށް ގަބޫލްކުރެވޭއިރު، ކޮންމެ ޓަވަރެއްގައި ގިނަ ވެގެން އެއްފަހަރާ 14 މީހުންނަށް އަރާފޭބޭ، 3 ލިފްޓް ހުރިނަމަވެސް، މިކަމުގައި ވެސް ކުރިއަށް އޮތްތާނގައި ގޮންޖެހުންތަކާ ކުރިމަތިވާނެ ކަމަށް ސުހައިލް ވިދާޅުވި އެވެ. އެއީ އެއިން އެންމެ ލިފްޓެއްގައި މައްސަލަޖެހި، ނުވަތަ މަރާމާތު ކުރަން ޖެހިއްޖެ ހާލަތެއްގައި މީހުން އަރާ ފޭބުމަށް ބޮޑެތި ގޮންޖެހުންތަކެއް ދިމާވާނެ ކަމަށްވެސް ސުހައިލް ވިދާޅުވި އެވެ.