ޕާކިސްތާން ގައުމީ ކްރިކެޓް ޓީމުގެ 10 ކުޅުންތެރިއަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

ޕާކިސްތާން ކްރިކެޓް ޓީމުގެ 10 ކުޅުންތެރިއަކު ކޮވިޑް-19ށް ޕޮޒިޓިވް ވިއިރު، އޮގަސްޓް މަހު އިންގްލަންޑުގައި ކުޅުމަށް ހަމަޖެހިފައިވާ ތިން ޓެސްޓު މެޗާއި، ޓީ20 ތިން މެޗުގައި ޕާކިސްތާން ކްރިކެޓް ޓީމު ވާދަކުރާނެއެވެ. މި މެޗުތައް ކުޅުމަށް ޕާކިސްތާން ޓީމު އިންގްލެންޑަށް ފުރާނީ މި މަހުގެ 28 ވަނަ ދުވަހެވެ.

ޕާކިސްތާން ކްރިކެޓް ބޯޑުގެ ޗީފް އެގްޒެކުޓިވް ވާސިމް ޚާން ވިދާޅުވީ ކްރިކެޓް ޓީމުގެ 10 ކުޅުންތެރިއަކު ކޮވިޑް-19ށް ޕޮޒިޓިވްވި ނަމަވެސް، އިންގްލެންޑުގައި ކުޅުމަށް ހަމަޖެހިފައިވާ މެޗުތަކުގައި ޕާކިސްތާން ކްރިކެޓް ޓީމު ވާދަކުރާނެ ކަމަށެވެ. އެގޮތުން އިންގްލެންޑަށް ފުރާނީ ދެ ފަހަރުގެ މަތިން ކޮވިޑް-19ށް ޓެސްޓު ކޮށް، ނެގެޓިވްވާ ކުޅުންތެރިން ކަމަށްވެސް އޭނާ ވިދާޅުވި އެވެ.

ކޮވިޑް-19ށް ޕޮޒިޓިވްވި ޕާކިސްތާން ކްރިކެޓް ޓީމުގެ 10 ކުޅުންތެރިން މިހާރު އައިސޮލޭޝަނަށް ބަދަލުކޮށްފައިވާއިރު، އެއިން އެއްވެސް ކުޅުންތެރިއެއްގެ ގައިން ވައިރަހުގެ އެއްވެސް އަލާމާތެއް ނުފެންނަ ކަމަށް ރިޕޯޓުތައް ބުނެއެވެ.

ކްރިކެޓް ޓީމުގެ ގިނަ ކުޅުންތެރިންތަކެއް ކޮވިޑް-19ށް ޕޮޒިޓިވް ވުމާއެކު، ބުދަ ދުވަހާއި ބުރާސްފަތި ދުވަހުވެސް ކްރިކެޓް ޓީމުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރާނެކަން ޕާކިސްތާން ކްރިކެޓް ބޯޑުން ވަނީ ހާމަކޮށްފައެވެ.

ޕާކިސްތާނުގައި ކޮވިޑް-19 ހަލުވިކަމާއެކު ފެތުރެމުން އަންނައިރު، މީގެ ކުރިން ޕާކިސްތާންގެ ކުރީގެ ކުޅަދާނަ އޯލްރައުންޑާ ޝާހިދު އަފްރީދީވެސް ވަނީ ކޮވިޑް-19ށް ޕޮޒިޓިވް ވެފައެވެ.

އަދި އެ ގައުމުން މިހާތަނަށް 188،900 ށްވުރެ ގިނަ މީހުން ކޮވިޑް-19ށް ޕޮޒިޓިވް ވިއިރު، މި ވައިރަސް ޖެހިގެން އެ ގައުމުން 3،755 މީހަކު ވަނީ މަރުވެފައެވެ.