އެވަޓަނުން ލިވަޕޫލް ހިފެހެއްޓިއިރު، ޗެލްސީން މުހިންމު މޮޅެއް ހޯދައިފި

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އެވަޓަން އާއި ލިވަޕޫލް ބައްދަލުކުރި ޑާބީ މެޗު އެއްވަރުވެއްޖެއެވެ.

30 އަހަރަށްފަހު ލީގު ޗެމްޕިއަން ކަމަށް އަމާޒުހިފާފައިވާ ލިވަޕޫލުން ރޭ އެވަޓަންއާ އެއްވަރުވެ، ލީގު ޗެމްޕިއަންކަން ކަށަވަރުކުރަން އިތުރު އިންތިޒާރެއް ވަނީ ކުރަން ޖެހިފައެވެ. ލީގު ޗެމްޕިއަންކަން ހޯދަން ލިވަޕޫލަށް އަދި ފަސް ޕޮއިންޓު ބޭނުންވެއެވެ.

ލީގުގެ އެއްވަނައިގައި ލިވަޕޫލް އޮތީ 23 ޕޮއިންޓުގެ ލީޑަކާއެކުއެވެ. އެއީ 30 މެޗުން 83 ޕޮއިންޓު ހޯދައިގެންނެވެ. ދެވަނައިގައި އޮތް މެންޗެސްޓާ ސިޓީއަށް 30 މެޗުން ލިބިފައިވަނީ 60 ޕޮއިންޓެވެ.

އެވަޓަންގެ ދަނޑުގައި އާދީއްތަ ދުވަހުގެރޭ ކުޅުނު މެޗުގެ ކުރީކޮޅުގައި އެވަޓަންގެ ރިޗާލިސަންއަށް ވަނީ ލީޑު ނަގަން ރަނގަޅު ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާ ގޯލުގެ ދަނޑިކައިރިން ބޭރުންނެވެ. މި ހާފުގައި ލިވަޕޫލަށް އެންމެ ރަނގަޅު ފުރުސަތެއް ލިބުނީ ޑިފެންޑަރު ޖޮއެލް މަޓިޕްއަށެވެ. އެކަމަކު ބޮލުން އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗު ނިމެން ގާތްވެފައި ވަނިކޮށް އެވަޓަންއަށް ވަނީ ހުސް ފުރުސަތެއް ލިބިފައެވެ. މެޗު ނިމެން 10 މިނިޓަށް ވެފައި ވަނިކޮށް އެވަޓަންގެ ޓޮމް ޑޭވިސް ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މީގެ އިތުރުން ލީގުގައި އާދީއްތަ ދުވަހުގެރޭ ފަހަތުން އަރައި އެސްޓަން ވިލާ އަތުން 2-1 އިން މޮޅުވެ ޗެލްސީން ވަނީ ހަތަރުވަނައިގައި ފަސް ޕޮއިންޓުގެ ލީޑެއް ނަގާފައެވެ.

އެސްޓަން ވިލާގެ ދަނޑުގައި ކުޅުނު މެޗުގެ ފުރަތަމަ ހާފުގައި އެޓީމުން ވަނީ ލީޑު ނަގާފައެވެ. ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް އެސްޓަން ވިލާއަށް ލީޑު ނަގައިދިނީ ކޯޓްނީ ހޯސްއެވެ.

ދެވަނަ ހާފުގައި ޗެލްސީން ކުޅުން ރަނގަޅުކުރިއިރު، އެޓީމުން ނަތީޖާ އަނބުރާލީ ދެ މިނެޓުގެ ތެރޭގައެވެ. އެގޮތުން މެޗުގެ 60 ވަނަ މިނެޓުގައި ސެޒާ އަޒްޕިލިކުއޭޓާގެ އެހީއާއެކު ކްރިސްޓިއަން ޕުލިސިޗް ޗެލްސީއަށް ނަތީޖާ އެއްވަރުކޮށްދިންއިރު، އޭގެ ދެ މިނެޓު ފަހުން ސެޒާ އަޒްޕިލިކުއޭޓާގެ އެހީއާއެކު ޗެލްސީއަށް ލީޑު ނަގައިދިނީ އޮލިވިއޭ ޖިރޫޑެވެ.

މި ނަތީޖާއާއެކު ޗެލްސީ ހަތަރުވަނައިގައި އޮތީ 30 މެޗުން 51 ޕޮއިންޓާއެކުއެވެ. ފަސްވަނައިގައި އޮތް މެންޗެސްޓާ ޔުނައިޓެޑަށް 30 މެޗުން ލިބިފައިވަނީ 46 ޕޮއިންޓެވެ.

ރެލިގޭޝަންގެ ބިރު ބޮޑުވެފައިވާ އެސްޓަން ވިލާ އޮތީ ލީގުގެ 19 ވަނައިގައެވެ. އެ ޓީމަށް 30 މެޗުން ލިބިފައިވަނީ 26 ޕޮއިންޓެވެ.