ކޮރޯނާވައިރަސް ޖެހިގެން އިރާގުގެ ފުޓްބޯޅަ ލެޖެންޑެއް މަރުވެއްޖެ

ކޮރޯނާވައިރަސް (ކޮވިޑް-19) ޖެހިގެން އިރާގުގެ ފުޓްބޯޅަ ލެޖެންޑެއް ކަމަށްވާ އަޙްމަދު ރަދީ މަރުވެއްޖެއެވެ.

އުމުރުން 56 އަހަރުގެ ރަދީ މަރުވިކަން އިރާގުގެ ހެލްތު މިނިސްޓްރީން ވަނީ ޔަގީންކޮށްދީފައެވެ. ރިޕޯޓުތައް ބުނާ ގޮތުން ކޮވިޑް-19 ޖެހިގެން ރަދީ ވަނީ މިދިޔަ ހަފުތާގައި ހޮސްޕިޓަލްގައި އެޑްމިޓް ކޮށްފައެވެ. އަދި މި ބަލީގައި އޭނާ މަރުވީ އިތުރު ފަރުވާއަށް އުރުދުންއަށް ފުރުވާލަން ތައްޔާރުވަމުން ދަނިކޮށް އާދީއްތަ ދުވަހުގެ ވަގުތެއްގައެވެ.

އިރާގު ގައުމީ ޓީމުގެ ކުރީގެ ފޯވާޑް ރަދީ އަކީ 1986 ވަނަ އަހަރު މެކްސިކޯގައި ބޭއްވި ފީފާ ވޯލްޑް ކަޕްގައި އިރާގުން ކާމިޔާބުކުރި ހަމައެކަނި ލަނޑު ޖަހައިދިން ކުޅުންތެރިޔާއެވެ. އެ މުބާރާތުގެ ގްރޫޕް ސްޓޭޖުގައި ބެލްޖިއަމާ ދެކޮޅަށް ކުޅުނު މެޗުން އިރާގު ބަލިވީ 2-1 ންނެވެ. އެފަހަރުގެ މުބާރާތުން އިރާގު ކަޓާފައިވަނީ ޕޮއިންޓެއް ނުލިބިއެވެ.

މީގެ އިތުރުން ރަދީ ވަނީ އިރާގު ގައުމީ ޓީމާއެކު 1984 ވަނަ އަހަރާއި 1988 ވަނަ އަހަރުގެ ގަލްފް ކަޕް ކާމިޔާބުކޮށްފައެވެ. އަދި އިރާގަށް އޭޝިއަން ގޭމްސް އާއި، އަރަބް ގޭމްސްގެ އިތުރުން އަރަބް ކަޕް ކާމިޔާބުކޮށްދިނުމުގައި ރަދީ ވަނީ މުހިންމު ދައުރެއް އަދާކޮށްފައެވެ. އަދި އިރާގުގެ ފޯވާޑް ވަނީ 1988 ވަނަ އަހަރުގެ އޭޝިއާގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމުވެސް ހޯދާފައެވެ.

ކޮވިޑް-19 ޖެހިގެން އިރާގުގެ ފުޓްބޯޅަ ލެޖެންޑެއް މަރުވިއިރު، މި ވައިރަސް އަންނަނީ އެ ގައުމުގައި ހަލުވިކަމާއެކު ފެތުރެމުންނެވެ. އެގޮތުން މިހާތަނަށް އިރާގުން 29،200ށް ވުރެ ގިނަ މީހުންނަށް ކޮވިޑް-19 ޖެހުނުއިރު، ވައިރަސް ޖެހިގެން އެ ގައުމުން 1،000ށް ވުރެ ގިނަ މީހުން ވަނީ މަރުވެފައެވެ.