ކޮވިޑް ޖެހުނު މީހުންގެ 82 އިންސައްތަ މީހުން ރަނގަޅުވެއްޖެ
1769 މީހުން ވަނީ ބަލިން ރަނގަޅުވެފައި
ކޮވިޑަށް ސާމްޕަލް ނަގައިގެން ޓެސްޓް ކުރުމުގެ މަސައްކަތް ކުރަނީ؛ ރާއްޖޭގައި ބަލި ޖެހުނު މީހުންގެ 82 އިންސައްތަ މީހުން ވަނީ ރަނގަޅުވެފައި
ރާއްޖޭގައި ކޮވިޑް-19 ޖެހުނު މީހުންގެ ތެރެއިން 82 އިންސައްތަ މީހުން ބަލިން ރަނގަޅުވެއްޖެއެވެ.
މިހާތަނަށް އެޗްޕީއޭއިން އާންމުކޮށްފައިވާ މައުލޫމާތުތައް ދައްކާގޮތުން 1769 މީހުން ވަނީ ބަލިން ރަނގަޅުވެފައެވެ. މިއީ 82.28 އިންސައްތައެވެ. ރާއްޖޭގައި ކޮވިޑް-19 ޖެހުނު މީހުންގެ އަދަދަކީ 2150 އެވެ. ހުކުރު ދުވަހު ކޮވިޑް-19ށް ޕޮޒިޓިވްފައިވަނީ 13 މީހެކެވެ.
ރާއްޖޭގައި 1769 މީހަކު ބަލިން ފަސޭހަވެފައިވާ އިރު، މިހާރު ފަރުވާ ދެމުން އަންނަނީ 371 މީހުންނަށެވެ. މިއީ ބަލިޖެހުނު މީހުންގެ 17.26 އިންސައްތައެވެ. މީގެ ތެރެއިން 5 މީހަކަށް އަންނަނީ އެޑްމިޓްކޮށްގެން ފަރުވާ ދެމުންނެވެ. އެއީ ބަލި ޖެހުނު މީހުންގެ 1.35 އިންސައްތައެވެ.
ވަކިވަކި ގައުމުތަކުގެ ނިސްބަތަށް ބަލާއިރު، ރާއްޖޭގައި ޕޮޒިޓިވްވި މީހުންގެ ތެރެއިން އެންމެ ގިނަ އަދަދަކަށް ބަލިޖެހިފައިވަނީ ބަންގުލަދޭޝް މީހުންނަށެވެ. އެއީ 1134 މީހުންނެވެ. މިއީ ބަލި ޖެހުނު މީހުންގެ 52.74 އިންސައްތައެވެ. ބަލި ޖެހުނު ދިވެހިންގެ އަދަދު ވަނީ 740ށް އަރާފައެވެ. މިއީ ބަލި ޖެހުނު މީހުންގެ 34.42 އިންސައްތައެވެ.
އިންޑިއާގެ 200 މީހަކު ވަނީ ކޮވިޑް-19 ޖެހިފައެވެ. އެއީ ބަލި ޖެހުނު މީހުންގެ 9.30 އިންސައްތައެވެ. މީގެ އިތުރުން ނޭޕާލްގެ 42 މީހަކު ކޮވިޑަށް ޕޮޒިޓިވްވެފައިވާ އިރު މިއީ ބަލި ޖެހުނު މީހުންގެ 1.95 އިންސައްތައެވެ. ސްރީލަންކާގެ 12 މީހަކަށް އަދި އިޓަލީގެ 11 މީހަކަށް ކޮވިޑް ޖެހިފައިވާ އިރު ޕާކިސްތާނުގެ 3 މީހަކު ވަނީ ކޮވިޑް-19ށް ޕޮޒިޓިވްވެފައެވެ.
މީގެ އިތުރުން އެހެނިހެން ގައުމުތަކަށް ނިސްބަތްވާ 8 މީހަކު ކޮވިޑް-19 ޖެހިގެން ރިޕޯޓްކޮށްފައި ވެއެވެ. މި 8 މީހުންގެ ތެރޭގައި ހިމެނެނީ އިންޑޮނޭޝިއާ، ތުރުކީ، ސައުތް އެފްރިކާ، ޖަރުމަންވިލާތް، އިނގިރޭސީވިލާތް އަދި ފިލިޕީންސްގެ މީހުންނެވެ.
ރާއްޖޭގައި ކޮވިޑް-19 ޖެހިގެން ނިޔާވެފައިވަނީ 8 މީހެކެވެ. އެއީ ބަލި ޖެހުނު މީހުންގެ 0.37 އިންސައްތައެވެ. މި 8 މީހުންގެ ތެރޭގައި ހިމެނެނީ 4 ދިވެހިންނާއި 4 ބިދޭސީންނެވެ. ކޮވިޑް ޖެހިގެން މަރުވި މީހުންގެ ތަފްސީލުތަކަށް ބަލާއިރު، ބަލިޖެހިގެން ނިޔާވި 4 ދިވެހިންގެ ތެރޭގައި ހިމެނެނީ 83 އަހަރުގެ އަންހެނަކާއި، 88 އަހަރުގެ ފިރިހެނަކާއި، 80 އަހަރުގެ ފިރިހެނެއްގެ އިތުރުން 89 އަހަރުގެ އަންހެނެކެވެ. ބިދޭސީންގެ ތެރޭގައި ހިމެނެނީ ބަންގުލަދޭޝްގެ 46 އަހަރުގެ ފިރިހެނަކާއި، 38 އަހަރުގެ ފިރިހެނަކާއި، 22 އަހަރުގެ ފިރިހެނެކެވެ. އަދި އުމުރު ކަށަވަރު ނުވާ ބިދޭސީ މީހަކު މީގެ ތެރޭގައި ހިމެނެއެވެ.
މިހާތަނަށް 39،665 ސާމްޕަލް ވަނީ ނަގާފައެވެ. އައިސޮލޭޝަން ފެސިލިޓީގައި 302 މީހަކު ތިބި އިރު، ކަރަންޓީން ފެސިލިޓީތަކުގައި 156 މީހަކު އެބަތިއްބެވެ.
