ފައިނު ފުޓްސަލް ދަނޑުގެ މަސައްކަތް ނިންމާލައިފި
18 ޖޫން 2020 | ބުރާސްފަތި 09:52މި ދަނޑަކީ ޗައިނާ ސަރުކާރުގެ އެހީގައި އެޅި ދަނޑެއް
ރ. ފައިނުގެ ފުޓްސަލް ދަނޑު: މިއީ ޗައިނާ ސަރުކާރުގެ އެހީގައި އެޅި ދަނޑެއްް
ޗައިނާ ސަރުކާރުގެ އެހީގައި އެޅި ރ. ފައިނުގެ ފުޓްސަލް ދަނޑުގެ މަސައްކަތް ނިންމާލައިފިއެވެ.
ޗައިނާ ސަރުކާރުގެ އެހީގެ ދަށުން ރާއްޖޭގެ އާބާދީ ކުޑަ ރަށްރަށަށް އަމާޒުކޮށްގެން 21 ފުޓްސަލް ދަނޑެއް އަޅާނެކަން ކުޅިވަރާ ބެހޭ ވުޒާރާއިން އިއުލާން ކުރީ މިދިޔަ އަހަރުގެ މާޗު މަހުގެ ތެރޭގައެވެ.
ބުދަ ދުވަހު ކުޅިވަރާ ބެހޭ ވަޒީރު އަޙްމަދު މަހުލޫފް ކުރެއްވި ޓްވީޓެއްގައި ވިދާޅުވީ ފައިނަކީ ފުޓްސަލް ދަނޑެއް ބޭނުންވެގެން އެދުނު އެންމެ ފުރަތަމަ އެއް ރަށް ކަމަށާއި، ޗައިނާގެ އެހީގައި ފައިނުގައި އަޅާފައިވާ ފުޓްސަލް ދަނޑުގެ މަސައްކަތް ނިމި، އެ ދަނޑުގެ ބޭނުން އެ ރަށުގެ ޒުވާނުން ހިފަމުން އަންނާތީ އުފާކުރައްވާ ކަމަށެވެ.
ޗައިނާއިން ރާއްޖެއަށް ކަނޑައަޅާފައި ހުންނަ ސަފީރު ޖަންގް ލީޖޮންގް ވިދާޅުވީ ދަނޑުތަކުގައި ޒުވާނުން ކުޅޭތަން ފެނުމުން އުފާކުރައްވާ ކަމަށެވެ.
ޗައިނާގެ އެހީގައި ރާއްޖޭގައި 21 ފުޓްސަލް ދަނޑެއް އަޅާއިރު، މިހާރު ނުނިމި ހުރީ މަދު ދަނޑުތަކެއް ކަމަށް ކުޅިވަރާ ބެހޭ ވުޒާރާއިން ވަނީ ބުނެފައެވެ. އަދި އެ ދަނޑުތަކުގެ މަސައްކަތްތައް ވަރަށް އަވަސް މުއްދަތެއްގެ ތެރޭގައި ނިންމާލެވޭނެ ކަމަށްވެސް ކުޅިވަރާ ބެހޭ ވުޒާރާއިން މައުލޫމާތުދެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެވަޑައިގެންފައިވާ ރިޔާސީ ވައުދުތަކުގެ ތެރޭގައި ހިމެނޭ ރަށްރަށުގައި ދަނޑުތައް އެޅުމުގެ ވައުދުގެ ދަށުން ކުޅިވަރާ ބެހޭ ވުޒާރާއިން އަންނަނީ ރާއްޖޭގެ އެކި ކަންކޮޅުތަކުގައި ފުޓްސަލް ދަނޑުތަކާއި ޓާފް ފުޓްބޯޅަ ދަނޑުތައް އަޅަމުންނެވެ.
އެގޮތުން ދާދި ފަހުން ކުޅިވަރާ ބެހޭ ވަޒީރު ވަނީ ގއ. ކަނޑުހުޅުދޫ ފުޓްސަލް ދަނޑާއި ހަމަ އެ އަތޮޅު ކޮނޑޭގައި ފުޓްސަލް ދަނޑުގެ މަސައްކަތް ނިމުނުކަން ވެސް އިއުލާން ކުރައްވާފައެވެ.
