ޖެހިޖެހިގެން އަށްވަނަ ފަހަރަށް ޖަރުމަން ލީގުގެ ޗެމްޕިއަންކަން ބަޔާން މިއުނިކް ހޯދައިފިއެވެ.

ޖަރުމަން ލީގުގެ ޗެމްޕިއަންކަން ބަޔާން ހޯދީ އަންގާރަ ދުވަހުގެރޭ ކުޅުނު މެޗުގައި ވާޑާ ބްރެމެން އަތުން 1-0 ން މޮޅުވެގެންނެވެ. ލީގު ޗެމްޕިއަންކަން ބަޔާނުން ކަށަވަރު ކުރިއިރު، ލީގުގައި ބާކީ އެޓީމަށް އަދި ދެ މެޗު އެބައޮތެވެ.

ލީގު ތާވަލުގެ އެއްވަނައިގައި ބަޔާން އޮތީ 11 ޕޮއިންޓުގެ ލީޑަކާއެކުއެވެ. ކުޅުނު 32 މެޗުން 76 ޕޮއިންޓު ބަޔާނަށް ލިބިފައިވާއިރު، ދެވަނައިގައި އޮތް ބޮރޫޝިއާ ޑޯޓްމުންޑަށް 31 މެޗުން ލިބިފައިވަނީ 66 ޕޮއިންޓެވެ.

ބްރެމެންގެ ދަނޑުގައި އަންގާރަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފު ނިމުމުގެ ކުރިން ބަޔާނުން ވަނީ ލީޑު ނަގާފައެވެ. ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ޖެރޯމް ބޯޓެންގެ އެހީއާއެކު ބަޔާނަށް ލީޑު ނަގައިދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ފޯވާޑް ރޮބަޓް ލެވަންޑޯސްކީއެވެ. މިއީ މި ސީޒަނުގެ ޖަރުމަން ލީގުގައި ލެވަންޑޯސްކީ ކާމިޔާބުކުރި 31 ވަނަ ލަނޑެވެ.

ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ބަޔާންގެ ޑިފެންޑަރު އެލްފޮންސޯ ޑޭވީސްއަށް ރެފްރީ ވަނީ ރަތް ކާޑެއް ދައްކާފައެވެ. އޭނާއަށް ރަތް ކާޑު ދެއްކީ ދެ ރީނދޫ ކާޑު ހަމަވުމުންނެވެ.

ޖެހިޖެހިގެން އަށްވަނަ ފަހަރަށް ޖަރުމަން ލީގުގެ ޗެމްޕިއަންކަން ބަޔާން ހޯދިއިރު، އެޓީމުން މިހާރު ވަނީ ލީގު ޗެމްޕިއަންކަން ޖުމްލަ 29 ފަހަރު ހޯދާފައެވެ. ބަޔާނަކީ ޖަރުމަން ލީގުގެ އެންމެ ކާމިޔާބު ޓީމެވެ.

މީގެ އިތުރުން ޖަރުމަން ލީގުގެ ޗެމްޕިއަންކަން ޖެހިޖެހިގެން އަށްވަނަ ފަހަރަށް ހޯދައި ބަޔާނުން ވަނީ އިޓަލީގެ ޔުވެންޓަސްއިން ގާއިމުކޮށްފައިވާ ޔޫރަޕްގެ ރެކޯޑަކާ ހަމަކޮށްފައެވެ. ޔޫރަޕްގެ ބޮޑު ފަސް ލީގުގެ ތެރެއިން ޖެހިޖެހިގެން އަށް ފަަހަރު ލީގުގެ ޗެމްޕިއަންކަން ހޯދުމުގެ ރެކޯޑް އޮތީ މީގެ ކުރިން ޔުވެންޓަސް އަތުގައި އެކަންޏެވެ. ބަޔާނަކީ އެ ރެކޯޑް ގާއިމްކުރި ދެވަނަ ޓީމެވެ.