އިނގިރޭސި ޕްރިމިއާ ލީގު އަލުން ފަށާއިރު، ސަޕޯޓަރުން ދަނޑުތަކާ ދުރުގައި ތިބުމަށް ޕްރިމިއާ ލީގުގެ ޗީފް އެގްޒެކްޓިވް ރިޗަޑް މާސްޓާސް އިލްތިމާސް ކުރައްވައިފިއެވެ.

ކޮރޯނާވައިރަސް (ކޮވިޑް-19) އާ ގުޅިގެން މާޗު މަހު މެދުކަނޑާލި ޕްރިމިއާ ލީގުގެ ކުޅުން އަލުން ފެށުމަށް ހަމަޖެހިފައިވަނީ ބުދަ ދުވަހުގެރޭއެވެ. އެގޮތުން ބުދަ ދުވަހުގެރޭ ދެ މެޗެއް ކުޅެން ތާވަލުކޮށްފައިވާއިރު، ފުރަތަމަ މެޗުގައި ބައްދަލުކުރާނީ އެސްޓަން ވިލާ އާއި ޝެފީލްޑް ޔުނައިޓެޑެވެ. އަދި އެރޭ ކުޅޭ ދެވަނަ މެޗުގައި އެންމެ ފަހުގެ ޗެމްޕިއަން މެންޗެސްޓާ ސިޓީ ނުކުންނާނީ އާސެނަލާ ދެކޮޅަށެވެ.

ސަޕޯޓަރުން ނުވައްދާ މެޗުތައް ކުޅޭ ގޮތަށް ޕްރިމިއާ ލީގު އަލުން ފަށަން ނިންމި ނަމަވެސް، ދަނޑު ބޭރުގައި ސަޕޯޓަރުން އެއްވެ، އިޖުތިމާއީ ގައިދުރުކަމުގެ އުސޫލުތަކާ ޚިލާފުވާ ގިނަ ކަންތައްތަކެއް ހިނގައިފާނެ ކަމަށް ފެންނާތީ އިނގިރޭސިވިލާތުގެ ފުލުހުން ވަނީ ފަސް މެޗެއް "ނިއުޓްރަލް" ދަނޑެއްގައި ކުޅެން ލަފާދީފައެވެ.

އެ ފަސް މެޗަކީ އެވަޓަން އާއި ލިވަޕޫލް ކުޅޭ މެޗާއި، މެންޗެސްޓާ ސިޓީ އާއި ލިވަޕޫލް ކުޅޭ މެޗާއި، މެންޗެސްޓާ ސިޓީ އާއި ނިއުކާސަލް ކުޅޭ މެޗާއި، މެންޗެސްޓާ ޔުނައިޓެޑާއި ޝެފީލްޑް ޔުނައިޓެޑް ކުޅޭ މެޗުގެ އިތުރުން ނިއުކާސަލް އާއި ލިވަޕޫލް ބައްދަލުކުރާ މެޗު ކަމަށް ރިޕޯޓުތައް ބުނެއެވެ.

އެކަމަކު ދާދި ފަހުން ލިވަޕޫލްގެ ސޭފްޓީ އެޑްވައިޒަރީ ގްރޫޕުންނާއި ފުލުހުން އަދި ޕްރިމިއާ ލީގުން ބޭއްވި މަޝްވަރާތަކަށް ފަހު ވަނީ ލިވަޕޫލް ޑާބީ މެޗު އެވަޓަންގެ ދަނޑުގައި ކުޅެން ނިންމާފައެވެ.

ބީބީސީއަށް ދިން އިންޓަވިއުއެއްގައި ޕްރިމިއާ ލީގުގެ ޗީފް އެގްޒެކްޓިވް ރިޗަޑް މާސްޓާސް ވިދާޅުވީ ލީގު އަލުން ފަށާއިރު، ސަޕޯޓަރުން ދަނޑުތަކާ ދުރުގައި ތިބުމަށް އިލްތިމާސް ކުރާ ކަމަށެވެ.

އެގޮތުން ކަނޑައަޅާފައިވާ އުސޫލުތަކާ ޚިލާފުވެއްޖެނަމަ، ހުރިހާ އެންމެން ނުރައްކަލުގެ ތެރެއަށް ލުމުގެ ބިރު އެބައޮތް ކަމަށް އޭނާ ވިދާޅުވިއެވެ. އަދި ވިދާޅުވީ މި ސީޒަނުގައި ދަނޑުތައް ސަޕޯޓަރުންނަށް ހުޅުވާނުލި ނަމަވެސް، އަންނަ ސީޒަނުގައި ފިޔަވަހި ތަކަކަށް ބަހާލައިގެން ނަމަވެސް ސަޕޯޓަރުން ވެއްދޭނެ ކަމުގެ އުއްމީދު އެބައޮތް ކަމަށެވެ.

ޕްރިމިއާ ލީގު އަލުން ފަށާއިރު، މިހާތަނަށް ޕްރިމިއާ ލީގުން ޖުމްލަ 16 މީހަކު ވަނީ ކޮވިޑް-19ށް ޕޮޒިޓިވް ވެފައެވެ.