ތ. ވިލުފުށީގައި ސަރުކާރުން އެޅުމަށް ހަމަޖެހިފައިވާ ޓާފް ފުޓްބޯޅަ ދަނޑުގެ މަސައްކަތް ދެ މަސް ތެރޭގައި ނިންމާލެވޭނެ ކަމަށް ކުޅިވަރާ ބެހޭ ވަޒީރު އަޙްމަދު މަހުލޫފް ވިދާޅުވެއްޖެއެވެ.

ވިލުފުށީ ޓާފް ދަނޑުގެ މަސައްކަތް ލަސްވުމުގެ ސަބަބުން އެ ރަށުގެ ގިނަ ޒުވާނުން ވަނީ ކަންބޮޑުވުން ފާޅު ކޮށްފައެވެ.

އެންމެ ފުރަތަމަ އެ ދަނޑުގެ ބިން އެއްވަރުކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިކް ކޮމްޕެނީ (އެމްޓީސީސީ) އާ ހަވާލުކޮށްފައިވަނީ މިދިޔަ އަހަރުގެ އޮގަސްޓް މަހުގެ 21 ވަނަ ދުވަހެވެ. އެމްޓީސީސީއާ މަސައްކަތް ހަވާލުކުރީ 60 ދުވަހުގެ ތެރޭގައި މަސައްކަތް ނިންމާ ގޮތަށެވެ.

އެމްޓީސީސީން ހަވާލުވެ، އިތުރު ފަރާތަކަށް ސަބް ކޮންޓްރެކްޓަށް ދޫކުރެވިގެން ކުރެވުނު ވިލުފުށީގެ ޓާފް ދަނޑުގެ ބިން އެއްވަރުކުރުމުގެ މަސައްކަތް ނިމިފައިވާ ކަމަށް މިދިޔަ މާޗު މަހުގެ 31 ވަނަ ދުވަހު އެމްޓީސީސީން ވަނީ އަންގާފައެވެ.

އެކަމަކު މަސައްކަތް ކޮށްފައި ހުރިގޮތުން އެ ދަނޑާ މެދު ރަށުގެ ޒުވާނުން ހިތްހަމަނުޖެހި، ނުރުހުން ފާޅުކުރުމުން، ދާދި ފަހުން ކުޅިވަރާ ބެހޭ ވަޒީރު އަޙްމަދު މަހުލޫފް ވަނީ ވިލުފުށީ ޓާފް ދަނޑުގެ ބިން އެއްވަރުކުރުމުގައި ނުނިމު ހުރި މަސައްކަތް ނިންމުމަށް އެމްޓީސީސީން އަންގާރަ ދުވަހު އެ ރަށަށް އަރާނެ ކަމަށް ވިދާޅުވެފައެވެ. އަދި އެ ދަނޑުގައި ޓާފް އަޅުމަށް މިހާރު ބަޔަކާ ހަވާލުކޮށްފައިވާ ކަމަށާއި، އިތުރު ހުރަހެއް ދިމާނުވާނަމަ 2 މަސް ދުވަސް ތެރޭގައި ދަނުގެ މަސައްކަތް އެއްކޮށް ނިންމާލެވޭނެ ކަމަށްވެސް ވިދާޅުވި އެވެ.

ވިލުފުށީ ޓާފް ދަނޑުގެ އަމަލީ މަސައްކަތް ފެށިގެންދާއިރު، މީގެ ކުރިން އެރަށަށް ޓާފް ވަނީ ގެންގޮސްފައެވެ.

މީގެ އިތުރުން ޅ. ހިންނަވަރުގައި އެޅުމަށް ހަމަޖެހިފައިވާ ޓާފް ފުޓްބޯޅަ ދަނޑުގެ މަސައްކަތް ކުރުމަށްވެސް ވަނީ އެހެން ބަޔަކާއި ހަވާލު ކޮށްފައެވެ. މި ދަނޑުގެ ބިން އެއްވަރުކުރުމުގެ މަސައްކަތްތައް ކުރުމަށް ކުޅިވަރާ ބެހޭ ވުޒާރާގެ ފަރާތުން ހަވާލުކޮށްފައިވަނީ އައިޑެޓިން ޕްރައިވެޓް ލިމިޓެޑާއެވެ.

މަހުލޫފް ކުރެއްވި ޓްވީޓެއްގައި ވިދާޅުވީ އެ މަސައްކަތް ހަވާލުކުރި ފުރަތަމަ ކުންފުންޏަށް އެ މަސައްކަތް ކުރިއަށް ގެންދެވިފައިނުވާތީ، އެ ކުންފުންޏާއެކު ހަދާފައިވާ އެއްބަސްވުން ބާތިލް ކުރުމަށްފަހު އެހެން ކުންފުންޏަކާއި އެ މަސައްކަތް ހަވާލު ކޮށްފައިވާ ކަމަށެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހުގެ ރިޔާސީ ވައުދުފުޅުގެ ތެރޭގައި ހިމެނޭ ރާއްޖޭގެ އެކި ކަންކޮޅު ތަކުގައި ފުޓްބޯޅަ ދަނޑުތައް އެޅުމުގެ ވައުދުފުޅުތަކުގެ ތެރެއިން މިހާރުވެސް 39 ދަނޑެއްގެ އަމަލީ މަސައްކަތް އަންނަނީ ކުރަމުންނެވެ. މިހާތަނަށް ނިންމާލެވުނީ ފ. ނިލަންދޫ ޓާފް ދަނޑުގެ އިތުރުން ނ. ހޮޅުދޫ ޓާފް ދަނޑުގެ މަސައްކަތެވެ.

ސަރުކާރުން ދަނޑުތައް އެޅުމަކީ، ހޯމް އެންޑް އަވޭ އުސޫލަށް ރާއްޖޭގެ ފުޓްބޯޅަ ސިސްޓަމް ބަދަލުކުރަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ރާވާފައިވާ ރޭވުމަށް ލިބުނު ކުރިއެރުމެކެވެ.