މާލޭގައި އަރބަން ގާޑަންތައް ގާއިމުކުރަން ހުށަހެޅުމުގެ ފުރުސަތު ހުޅުވާލައިފި
14 ޖޫން 2020 | އާދީއްތަ 13:10މިއީ ސަރުކާރުގެ ކާނާގެ ޔަގީންކަން ޕްރޮގްރާމުގެ ތެރެއިން ފަށާފައިވާ ޕްރޮގްރާމެއް
މާލޭގެ ގިނަ އުސް އިމާރާތްތަކުގައި ޓެރަސްތައް ހުރޭ
ސަރުކާރުގެ "ކާނާގެ ޔަގީންކަން" ކަށަވަރުކުރުމުގެ ސިޔާސަތުގެ ދަށުން މާލޭގައި އަރބަން ގާޑަންތައް ގާއިމުކުރަން ބޭނުންވާ ފަރާތްތަކަށް އެ ފުރުސަތު ހުޅުވާލައިފިއެވެ.
މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޖަރއިން ނެރުނު އިއުލާނެއްގައި ވަނީ، މާލޭގައި ހުންނަ ޓެރަސް ނުވަތަ ހުސްބިންތަކުގައި މިފަދަ "އަރބަން ގާޑެނިން" މޮޑެލްއެއް ތައާރަފުކުރުމަށް ނިންމާފައިވާ ކަމަށެވެ. އަދި މި މޮޑެލް ބިނާ ވާނީ ހުށަހަޅާ ތަނެއްގެ ކުޑަ ބޮޑުމިނަށް ބެލުމަށް ފަހުގައި ކަމަށް މިނިސްޓްރީން ވަނީ މައުލޫމާތު ދީފައެވެ.
މި ޕްރޮގްރާމުގެ ތެރެއިން ގާޑަން ގާއިމުކުރުމަށް ބޭނުންވާ ހުރިހާ ތަކެއްޗެއް ފޯރުކޮށްދޭނީ މިނިސްޓްރީންނެވެ. މި ގާޑަންތަކުގައި ގަސްކާނާގެ ގޮތުގައި ބާރުގަދަ ބޭސް ބޭނުންކުރުމުގެ ބަދަލުގައި ބޭނުންކުރާނީ، އޯގާނިކް ކޮމްޕޯސްޓުގެ ބާވަތްތަކެވެ. އޭގެ ތެރޭގައި، ގޭބިސީތަކުން އުކާލަ ކުނިން އުފައްދާ ގަސްކާނާ ހިމެނެއެވެ.
އަރބަން ގާޑަން ޕްރޮގްރާމުގައި ބައިވެރިވުމަށް ޝައުގުވެރިވެލައްވާ ފަރާތްތަކަށް އެ ފުރުސަތު ހުޅުވާލާފައިވާއިރު، ބޭނުންކުރާނެ ބިން ނުވަތަ ޓެރަސްތައް ހިޔާރުކުރުމުގައި ބަލާ ކަންކަމުގެ ލިސްޓެއް ވެސް މިނިސްޓްރީން ވަނީ އާންމުކޮށްފައެވެ. މިނިސްޓްރީއަށްފޯމުހުށައެޅުމުގެ ސުންގަޑިއަކީ ޖޫން މަހުގެ 25 ވަނަ ދުވަހެވެ.
އަރބަން ގާޑްނިން ކޮންސެޕްޓަކީ މިހާރު ދުނިޔޭގެ އެކި ކަންކޮޅުތަކުގައި ކާމިޔާބުކަމާއިއެކު ކުރަމުން އަންނަ ކަމެކެވެ. ހާއްސަކޮށް، މާލެ ކަހަލަ ބިމުގެ ޖާގައިގެ ދަތިކަން ހުންނަ ބޮޑެތި ސިޓީތަކުގައި މި މަސައްކަތް ބާރަށް ކުރަމުން އަންނަކަން ފާހަގަކުރެވެއެވެ. އޭގެ ތެރޭގައި އުތުރު އެމެރިކާ، ޔޫރަޕާއި، އިރުމަތީ އޭޝިއާ އަދި އޮސްޓްރަލޭޝިއާ ބައްރުގެ ގައުމުތައް ހިމެނެއެވެ.
އދ ގެ ފުޑް އެންޑް އެގްރިކަލްޗަރ އޯގަނައިޒޭޝަނުން އެންމެ ފަހުން ހިއްސާކޮށްފައިވާ ތަފާސްހިސާބުތަކަށް ބަލާއިރު، ދުނިޔޭގައި އުފައްދާ ކާބޯތަކެތީގެ ތެރެއިން 15 އިންސައްތަ އުފައްދަނީ އަރބަން (ގިނަ އަދަދެއްގެ ބަޔަކު އުޅޭ ބިމުގެ ޖާގަ މަދު) ސަރަހައްދުތަކުގައެވެ. މިފަދަ ގާޑަންތަކުގައި އުފައްދާ ކާނާއިން މިހާރު ވެސް 700 މިލިއަން މީހުންނަށް ބޭނުންވާ ކާބޯތަކެތި ފޯރުކޮށްދެވެއެވެ.
