އެނބުރި ބަޔާނަށް ދިޔުމަކީ ނުވާނެ ކަމެއް: ރޮބެން

އަލުން އެނބުރި ބަޔާން މިއުނިކަށް ދިޔުމަކީ ނުވާނެ ކަމެއް ކަމަށް ނެދަލެންޑްސްގެ ކުރީގެ ކުޅުންތެރިޔާ އާރްޔެން ރޮބެން ބުނެފިއެވެ.

ރޮބެން ވަނީ 2018-2019 ވަނަ އަހަރުގެ ސީޒަނަށް ފަހު، ބަޔާން އާއެކު ހަދާފައިވާ އެއްބަސްވުން ހަމަވުމުން ކުޅުން ހުއްޓާލާފައެވެ.

އެކަމަކު އޭޕްރީލް މަހުގެ ތެރޭގައި ދިން އިންޓަވިއުއެއްގައި ރޮބެން ބުނީ ކުޅުން ހުއްޓަލިތާ މާގިނަ ދުވަސްތަކެއް ނުވަނީސް އަލުން ކުޅުމުގެ ތެރެއަށް އަންނަން ވިސްނި ކަމަށާއި މިހާރުވެސް އެ ޚިޔާލު ގެންގުޅޭ ކަމަށެވެ. އަދި ކޮރޯނާވައިރަހުގެ ހާލަތު ރަނގަޅުވެ ފުޓްބޯޅަ އަލުން ފަށާއިރު، ވާނެ ގޮތެއް ބުނަން ނޭނގޭ ކަމަށްވެސް އޭނާ ބުންޏެވެ.

އެކަމަކު ދާދި ފަހުން ދިން އިންޓަވިއުއެއްގައި ރޮބެން ވަނީ އަލުން ކުޅުމުގެ ތެރެއަށް އައި ނަމަވެސް، އެނބުރި ބަޔާނަށް ދިޔުމަކީ 100 އިންސައްތަ ނުވާނެ ކަމެއް ކަމަށް ބުނެފައެވެ. ނަމަވެސް، ބަޔާންއާ އަބަދު ވެސް ގުޅުން އޮންނާނެ ކަމަށް ރޮބެން ވަނީ ބުނެފައެވެ.

ރޮބެން، ފުޓްބޯޅަ ކެރިއަރު ފެށީ 2000 ވަނަ އަހަރު ނެދަލެންޑްސްގެ ގްރޮނިންގެން އިންނެވެ. ނެދަލެންޑްސްގެ ހުރިހާ އުމުރުފުރައެއްގެ ގައުމީ ޓީމަށް ކުޅެ ސީނިއާ ޓީމުގެ ކެޕްޓަންކަން ވެސް ކުރި ރޮބެން ވަނީ ޗެލްސީގައި ތިން އަހަރު ހޭދަކޮށްފައެވެ. އޭގެ ފަހުން ރެއާލް މެޑްރިޑަށްވެސް ކުޅުނު ރޮބެން އެންމެ ބޮޑަށް ވިދާލީ ބަޔާން މިއުނިކުންނެވެ. އެގޮތުން 2013 ވަނަ އަހަރު ބަޔާނުން ސީޒަނުގެ ތިން ތަށި ކާމިޔާބުކުރިއިރު، ރޮބެން ވަނީ ބަޔާންގައި މޮޅު ކުޅުމެއް ދައްކާފައެވެ.

ރޮބެން ވަނީ އޭނާގެ ކްލަބު ކެރިއަރުގައި 28 ތަށި އުފުލާލާފައެވެ. ނެދަލެންޑްސް ގައުމީ ޓީމަށް 2003ން 2017ށް ކުޅެދިން ރޮބެން ވަނީ އެ ޓީމަށް 96 މެޗުން 37 ލަނޑު ޖަހާދީފައެވެ.