މަސްވެރިންނަށް ނުދެވި 5 މިލިއަން ރުފިޔާ އެބަހުރި: މިފްކޯ
ލޮކްޑައުންއާއި ގުޅިގެން ގިނަ ގޮންޖެހުންތަކެއް ކުރިމަތިވި ކަމަށް މިފްކޯއިން ބުނޭ
މަސްވެރިކަމުގައި މަސްވެރިންތަކެއް ހަރަކާތްތެރިވަނީ - ބަނާ މަހަށް ހަމައަގު ނުލިބުމާއި، ވަގުތުން ފައިސާ ނުލިބުމުގެ ޝަކުވާއަކީ އަބަދުވެސް މަސްވެރިން ކުރަމުން އަންނަ ޝަކުވާއެއް
މަސްވެރިންނަށް ނުދެވި ހުރި 5 މިލިއަން ރުފިޔާ އެބަހުރި ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ މިހާރު މަސްވެރިންނަށް ނުދެވި ހުރި ފައިސާގެ އަދަދަކީ ފަސް މިލިއަން ރުފިޔާ ކަމަށެެވެ.
ބަނާ މަހަށް ހަމައަގު ނުލިބުމާއި، ވަގުތުން ފައިސާ ނުލިބުމުގެ ޝަކުވާއަކީ އަބަދުވެސް މަސްވެރިން ކުރަމުން އަންނަ ޝަކުވާއެކެވެ.
މިކަމާއި ގުޅިގެން ފައުޒީ ވިދާޅުވީ ފާއިތުވި 7 އަހަރު މަސް ގަންނަމުން ދިޔައީ މަހުގެ އަގު އެއްވަރެއްގައި ހިފަހައްޓައިގެން ކަމަށެވެ. އަދި މަސްވެރިންގެ އަތުން ގަތް ހުރިހާ މަހަކަށް ފައިސާ ދެމުންދިޔަ ކަމަށެވެ. އެހެންނަމަވެސް ކޮވިޑް-19ގެ ހާލަތާއި ގުޅިގެން، ވަރަށް ގިނަ ދަތިތަކެއް ދިމާވިކަން ފާހަގަކުރެއްވިއެވެ.
ފައުޒީ ވިދާޅުވީ މިދިޔަ އަހަރަކީ ފާއިތުވި 14 ނުވަތަ 16 ވަރަކަށް އަހަރު ތެރެއިން، މިފްކޯއަށް އެންމެ ރަނގަޅަށް މަސްލިބުނު އަހަރު ކަމަށެވެ. އެގޮތުން އެއަހަރު 48،000 ޓަނުގެ މަސް ގަނެވުނުކަމަށެވެ. ފައުޒީ ވިދާޅުވީ މިދިޔަ އަހަރުގެ މި މުއްދަތާއި މިއަހަރުގެ މި މުއްދަތަށް ބަލާއިރު މަސް ގަނެވުނީ 6000 ޓަނު މަދުން ކަމަށެވެ.
އިންފްލޭޝަން މާކެޓުގައި މިހާރު މަހުގެ އަގަކީ 1300 ޑޮލަރުކަން ފާހަގަކުރައްވާ ފައުޒީ ވިދާޅުވީ މަސްގަނެ އެކްސްޕޯޓުކުރުމަށް ދަތިނުވާހާ ހިނދަކު މިފްކޯގެ އޮޕަރޭޝަންތައް ކުރިއަށް ދާނެ ކަމަށެވެ.
މިހަފްތާ ތެރޭގައިވެސް އޮންލައިންކޯށް ވަރަށް ގިނަ މަސްވެރިންނަށް ފައިސާ ދިންކަން ފާހަގަކޮށް ފައުޒީ ވިދާޅުވީ ބޭންކުތަކާއި ގުޅިގެން މަސްވެރިންގެ ހައްގު ފައިސާ ދިނުމުގެ މަސައްކަތްތައް ކުރެވެމުންދާ ކަމަށެވެ.
