ގްރާސް ރޫޓް އަދި އެކަޑަމީތައް ފަށަން އަހަރެއް ނަގާނެ: ބައްސާމް
ހަރަކާތްތައް ފަށާއިރު އެންމެ ބޮޑު އިސްކަމަކަށް ވެގެންދާނީ ކޮންމެ ކުއްޖެއްގެ ސިއްހަތު
އެފްއޭއެމްގެ ގްރާސް ރޫޓް ހަރަކާތުގެ ތެރެއިން: އެފްއޭއެމް އިން ބުނަނީ ކުޑަކުދިންގެ ހަރަކާތްތައް ފަށަން އަދި އަހަރެއް ނަގާނެ ކަމަށް
ކޮރޯނާވައިރަސް (ކޮވިޑް-19) އާ ގުޅިގެން ފުޓްބޯޅައަށް އައިސްފައިވާ މަޑުޖެހުމާއެކު، ކުޑަކުދިންގެ ހަރަކާތްތަކާއި ގްރާސްރޫޓް އަދި އެކަޑަމީގެ ޕްރޮގްގްރާމުތައް ފަށަން އަދި އަހަރެއް ނަގާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަވަމުން ބައްސާމް ވިދާޅުވީ ކުޑަކުދިންގެ ފުޓްބޯޅަ ހަރަކާތްތައް ފަށާއިރު އެންމެ ބޮޑު އިސްކަމަކަށް ވެގެންދާނީ ކޮންމެ ކުއްޖެއްގެ ވެސް ސިއްހަތު ކަމަށާއި އެ ކުދިންގެ ސިއްހަތު ކަށަވަރު ކުރެވިގެން ނޫން ގޮތައް ގްރާސްރޫޓް އަދި އެކަޑަމީގެ ހަރަކާތްތައް ފެށިގެން ނުދާނެ ކަމަށެވެ.
އެފްއޭއެމްގެ އެންމެ ބޮޑު އެއް މަސައްކަތަކަށް ޑިވަލޮޕްމަންޓްގެ މަސައްކަތް ހަދާފައިވާއިރު، އެ މަސައްކަތަށް އެއް އަހަރުގެ މަޑުޖެހުމެއް އައުމަކީ ލިބިގެންދާނެ ވަރަށް ބޮޑު ގެއްލުމެއް ކަމަށް ބައްސާމް ވިދާޅުވިއެވެ.
ރާއްޖެޓީވީގެ ކުޅިވަރު ފައިލް ޕްރޮގްރާމްގައި ރާއްޖޭގެ ލީގުގެ ތަސައްވުރާއި ބެހޭ ގޮތުން ވެސް ބައްސާން ވަނީ ވާހަކަ ދައްކަވާފައެވެ. ދިވެހި ޕްރިމިއާ ލީގަށް ޓީމުތައް އިތުރު ކުރުމަށް މީގެ ކުރިން ތާއިދުކުރި ނަމަވެސް، މިހާރުގެ ހާލަތާއެކު ޓީމުތައް އިތުރު ކުރުމަކީ އެންމެ ރަނގަޅު ގޮތްތޯ ޓެކްނިކަލް ޑިޕާޓްމަންޓާއި މަޝްވަރާ ކުރާނެ ކަމަށް ބައްސާމް ވިދާޅުވިއެވެ.
މި އަހަރުގެ ފުޓްބޯޅަ ސީޒަން ނިމިގެންދިޔައިރު ގިނަ ކްލަބުތަކުގެ މުސާރައިގެ މައްސަލަތަކެއް އެފްއޭއެމަށް ހުޅައެޅިފައިނުވާ ކަމަށާއި، އެހެން ކަމުން އައު ސީޒަނާއި ކުރިމަތިލާއިރު، ބޮޑެތި މައްސަލަތަކެއް ކުރިމަތި ނުވާނެ ކަމަށް ބައްސާމް ވިދާޅުވިއެވެ.
ކްލަބުތައް ހަރުދަނާ ކުރުމަށް މިހާރު ފަށާފައިވާ މަސައްކަތާއެކު، ކުރިއަށް އޮތް ދުވަސްތަކުގައި އެފްއޭއެމުން ކްލަބުތަކަށް ވިޔަފާރި ކުރެވޭނެ ބިން ދޫކުރާނެ ކަމަށާއި އެއާއެކު ކްލަބުތައް ވިޔަފާރި އުސޫލުން ހިނގަން ފަށާނެ ކަމަށް ބައްސާމް ވިދާޅުވިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއެކު ކުރެވޭ މަޝްވަރާތަކަށް ފަހު ކުރިއަށް އޮތް ފުޓްބޯޅަ ސީޒަން ސެޕްޓެމްބަރު ނޫނީ އޮކްޓޯބަރު މަހު ފެށުމާއި މެދު ގޮތެއް ނިންމާނެ ކަމަށާއި ފަހަރުގައި އާ ސީޒަން ކުރުކޮށްލުމަށް ފަހު އަންނަ އަހަރުގެ ޖޫންގައި އަނެއްކާ ވެސް އަނެއް އަހަރުގެ ސީޒަން ފަށަން ނިންމުމަކީ ވެސް ވެދާނެ ކަމެއް ކަމަށް ބައްސާމް ވިދާޅުވިއެވެ.
