ދިވެހި ފުޓުބޯޅަ ސީޒަން ޖޫން މަހު ފަށަން އެފްއޭއެމްގެ ކުރީގެ ވެރިންވެސް ބޭނުންވި ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ޓީވީއެމްގެ ދިވެހި ފުޓުބޯޅަ ޕްރޮގްރާމްގައި ވާހަކަދައްކަވަމުން ބައްސާމް ވިދާޅުވީ، ޖޫން މަހު ސީޒަން ފަށަން ނިންމި ނިންމުމަކީ މި ދައުރުގައި ފެށުނު ކަމެއް ނޫން ކަމަށާއި، އެފްއޭއެމްގެ ކުރީގެ ވެރިންވެސް އެކަން އެގޮތަށް ކުރުމަށް މީގެ ކުރިން ނިންމާފައިވާ ކަމަށެވެ. އެގޮތުން ބައްސާމް ވިދާޅުވީ، ޖޫން މަހު ސީޒަން ފަށަން މީގެކުރިންވެސް މަޝްވަރާ ކުރެވުނު ކަމަށާއި، އެކަން އެގޮތަށް ނުކުރެވި އޮތީ ގޮތެއް ނުނިމިގެން ކަމަށެވެ. އަދި ބައްސާމް ވިދާޅުވީ، ޖޫން މަހު ސީޒަން ފަށަން ނިންމި ނިންމުމާއެކު، ފުޓުބޯޅަ ސީޒަން ވަރަށް ފޯރިގަދަވާނެ ކަމަށް ބެލެވޭ ކަމަށެވެ.

މީގެއިތުރުން ބައްސާމް ވިދާޅުވީ، ރާއްޖޭގެ ކުލަބުތަކަށް މި އަހަރުގެ އޭއެފްސީ ކަޕުން ފުރުސަތު ގެއްލުމަކީ ޖޫން މަހު ސީޒަން ފަށަން ވާންޖެހޭ އެންމެހާ ތައްޔާރީތައްވުމަށްފަހު ސީޒަން ފަށަން ލިބިގެންދާ ވަރަށް ބޮޑު އެހީތެރިކަމެއް ކަމަށެވެ.

ބައްސާމް ވިދާޅުވީ ކުޅުންތެރިންގެ ކޮންޓްރެކްޓްތައް ވަކިގޮތަކަށް ފައްތައި، ކޯޗުން ތަމްރީނު ކުރެވި އަދި ބޭނުންވާ އެނޫން ވެސް ކަންކަން ސީޒަން ފެށުމުގެ ކުރިން ފުރިހަމަކުރާނެ ކަމަށެވެ.

މިހާރު ނޫހަށް ދިން އިންޓަވިއުއެއްގައި އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް ވިދާޅުވީ، ޖޫން މަހު ސީޒަން ފެށުމަށް ނިންމީ ކްލަބްތައް އެކަމަށް ބޭނުންވާތީ ކަމަށާއި، އެކަމަށް ދިވެހި ޕްރިމިއާ ލީގުގެ ކްލަބްތަކުގެ މެޖޯރިޓީ ތާއީދު ލިބުނު ކަމަށެވެ.

ޖަވާޒް މިހެން ވިދާޅުވެފައިވާއިރު، ރާއްޖެއެމްވީއަށް މައުލޫމާތު ލިބިފައިވާ ގޮތުގައި ޖޫން މަހު ސީޒަން ފެށުމަށް މާޒިޔާ ސްޕޯޓްސް އެންޑް ރެކްރިއޭޝަން ފިޔަވާ ފުރަތަމަ ޑިވިޝަންގެ ހުރިހާ ކްލަބަކުން ވަނީ ތާއީދުކޮށްފައެވެ.

އެފްއޭއެމުން އިއުލާންކޮށްފައިވާ ގޮތުން މިއަހަރު ސީޒަން ފަށާނީ ޗެރިޓީ ޝިލްޑް މެޗުންނެވެ. އެގޮތުން މިއަހަރު ޗެރިޓީ ޝިލްޑް މެޗު ހޯމް އެންޑް އަވޭ އުސޫލަށް ބަދަލުކޮށް، އެ މެޗުގައި ބައްދަލުކުރާނީ މިނިވަން ޗެމްޕިއަންޝިޕްގެ ޗެމްޕިއަން ތ.ތިމަރަފުށި އަދި ލީގު ޗެމްޕިއަން ޓީސީ ކަމަށް އެފްއޭއެމުން ވަނީ ކަނޑައަޅާފައެވެ.