ރިސޯޓުތަކުގެ މެދުގައި ބާއްވާ އެންމެ ބޮޑު ކުޅިވަރު މުބާރާތް ފަށަން ތައްޔާރުވެއްޖެ

ރިސޯޓުތަކުގެ މެދުގައި ބާއްވަމުން އެންމެ ފޯރިގަދަ އަދި އެންމެ ބޮޑު ކުޅިވަރު މުބާރާތް ކަމުގައިވާ ރިސޯޓު ލީގު 2020 މާޗު މަހުގެ އެއްވަނަ ދުވަހު 42 ޓީމާއެކު ފަށަން ނިންމައިފިއެވެ.

ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދާނީ ޒޯން ތަކަށް ބަހާލައިގެން ނެވެ. އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު ވެސް 5 ޒޯނަކުން 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ. އެއީ ދ. ޒޯން، ނޯތު މާލެ ޒޯން، ބ. ޒޯން، ސައުތު އަރި ޒޯން އަދި ސައުތު މާލެ ޒޯން އެވެ.

މުބާރާތުގައި ފުރަތަމަ ކުޅުން ފެށުމަށް ހަމަޖެހިފައި ވަނީ 6 ޓީމު ވާދަކުރާ ދ. ޒޯންގައެވެ. ދެވަނައަށް ކުޅުން ފެށުމަށް ހަމަޖެހިފައި ވަނީ މާޗު މަހުގެ 13 ވަނަ ދުވަހު، 13 ޓީމު ވާދަކުރާ ނޯތު މާލެ ޒޯން ގައެވެ. ދެވަނައަށް ކުޅުން ފަށާނީ 15 މާޗުގައި، 8 ޓީމު ވާދަކުރާ ބ. ޒޯންގައެވެ. އެއަށްފަހު އޭޕްރީލް 1 ގައި، 7 ޓީމު ވާދަކުރާ ސައުތު އަރި ޒޯންގައި ކުޅުން ފެށުމަށް ހަމަޖެހިފައިވާއިރު، 8 ޓީމު ވާދަކުރާ ސައުތު މާލެ ޒޯންގައި ކުޅުން ފަށާނީ އޭޕްރީލް މަހުގެ 12 ވަނަ ދުވަހު އެވެ.

މޯލްޑިވްސް ރިސޯޓު ފުޓްސަލް ލީގު އިންތިޒާމުކުރާ ފަރާތުން ވިދާޅުވި ގޮތުގައި މުބާރާތަށް އެފަރާތުން ވަނީ ވަރަށް ފުރިހަމައަށް ތައްޔާރުވެފައެވެ. މުބާރާތުގެ 8 އަހަރުވީ ތާރީހުގައި ރިސޯޓުތަކުން މި މުބާރާތަށް ވަރަށް ފުރިހަމައަށް ތައްޔާރުވެފައިވާއިރު، މުބާރާތަށް ވަރަށް ބޮޑު ތަރުހީބެއް ލިބިފައިވާ ކަމަށް އިންތިޒާމުކުރާ ފަރާތުން ބުނެއެވެ.

ރިސޯޓު ލީގަކީ ރިސޯޓުތަކުގައި ވަޒީފާ އަދާކުރާ މުވައްޒަފުންނަށް އަމާޒުކޮށް ރިސޯޓުތަކުގައި ބާއްވާ މިފަދަ އެންމެ ބޮޑު މުބާރާތެވެ. މި މުބާރާތަށް ރިސޯޓުތަކުން ދުރާލާ ތައްޔާރުވަމުންދާއިރު، މުބާރާތުގައި ވާދަކުރާ ރިސޯޓުތައް އަންނަނީ ކޮންމެ އަހަރަކު ވެސް އިތުރު ވަމުންނެވެ. އަދި މުޅިން އަލަށް ކޮންމެ އަހަރަކު ވެސް ގިނަ ރިސޯޓުތަކުން މުބާރާތުގައި ވާދަކުރެއެވެ.

މިހާތަނަށް ފޯރި އާއެކު 7 އަހަރު މި މުބާރާތް ބާއްވާފައިވާއިރު، އެކި ޒޯންތައް ހިމެނޭ ގޮތަށް 28 މުބާރާތް ވަނީ ބާއްވާފައެވެ. 2019 ވަނަ އަހަރު ވެސް ފޯރި އާއެކު މުބާރާތް ކުރިޔަށްގެންގޮސްގައިވާއިރު، އެ އަހަރުގެ ޗެމްޕިއަންކަން ޓީމުތަކަކީ ނޯތު މާލެ ޒޯނުން ވަން އެންޑް އޮންލީ ރީތި ރަށާއި، ސައުތު މާލެ ޒޯނުން ހޮލިޑޭ އިން ކަނޑޫމާ މޯލްޑިވްސް އާއި، ބ. ޒޯނުން ސޮނެވާފުއްޓާއި، ސައުތު އަރި ޒޯނުން ކޮންރަޑް މޯލްޑިވްސް ރަންގަލި އައިލެންޑް އަދި ދ. ޒޯނުން ނިޔާމަ ޕްރައިވެޓް އައިލެންޑް އެވެ.

މުބާރާތުގެ އެންމެ ކާމިޔާބު ޓީމަކީ ބަނޑޮސް މޯލްޑިވްސް އާއި ކޮންރަޑް މޯލްޑިވްސް ރަންގަލި އައިލެންޑް އެވެ. މިއިން ކޮންމެ ރިސޯޓެއް ހަތަރު ފަހަރު ޗެމްޕިއަންކަން ހޯދާފައިވާއިރު، ސޮނެވާފުއްޓާއި ވަން އެންޑް އޮންލީ ރީތި ރަށް މޯލްޑިވްސް ވަނީ ތިން ފަހަރު ޗެމްޕިއަންކަން ހޯދާފައެވެ. ހޮލިޑޭ އިން ކަނޑޫމާ މޯލްޑިވްސް އާއި ފިހާޅޮހި އައިލެންޑް ރިސޯޓާއި ސަން އައިލެންޑާއި ނިޔާމަ ޕްރައިވެޓް އައިލެންޑް، މިއިން ކޮންމެ ރިސޯޓެއް ވަނީ ދެ އަހަރު ޗެމްޕިއަންކަން ހޯދާފައެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ.