އިންޑިއާގެ ވިޔަފާރި މަރުކަޒީ ރަށް މުމްބާއީން ކޮވިޑް-19ށް ޕޮޒިޓިވްވީ މީހުންގެ ޢަދަދު 50،000ށްވުރެ މައްޗަށް އަރައިފި އެވެ.

މުމްބާއީ މުނިސިޕަލް ކޯޕަރޭޝަނުން އަންގާރަ ދުވަހުގެރޭ ޢާންމުކުރި ޑޭޓާތަކަށް ބަލާއިރު، މުމްބާއީން އަންގާރަ ދުވަހު 1،015 މީހުން ވައިރަސްއަށް ޕޮޒިޓިވްވެ، މިހާރު ޖުމުލަ އަދަދު ވަނީ 50،878ށް އަރާފަ އެވެ. އަންގާރަ ދުވަހު މުމްބާއީން ކޮވިޑް-19 ޖެހިގެން 58 މީހުން މަރުވެ، މަރުވީ މީހުންގެ ޢަދަދު މިހާރު ވަނީ 1،758ށް އަރާފަ އެވެ.

މުމްބާއީގައި މިހާރުވެސް 26،178 މީހުން ދަނީ ފަރުވާ ހޯދަމުންނެވެ. އަދި ފަރުވާ ދީގެން 22،942 މީހުން ވަނީ ރަނގަޅުވެފަ އެވެ. މުމްބާއީއަކީ މަހާރާޝްތުރާ ސްޓޭޓްގެ ވެރި ރަށެވެ.

މުޅި އިންޑިއާގައި ވައިރަސް ފެތުރެމުންދާ ޒާތައް ބަލާއިރު، އެންމެ ގިނަ ޢަދަދެއްގެ މީހުން ވައިރަސްއަށް ޕޮޒިޓިވްވަމުން ދަނީ މަހާރާޝްތުރާ ސްޓޭޓުގަ އެވެ. އެ ސްޓޭޓުގައި އިއްޔެ އެކަނިވެސް 2،259 މީހުން ވައިރަސްއަށް ޕޮޒިޓިވްވެ، ވައިރަސްއަށް ޕޮޒިޓިވްވީ މީހުންގެ ޢަދަދު 90،000ށް ވަނީ އަރާފަ އެވެ.

އިންޑިއާގައި ދެވަނަޔަށް އެންމެ ގިނައިން މީހުން ވައިރަސްއަށް ޕޮޒިޓިވްވީ ދެކުނު ޓެމިލްނާޑޫ ސްޓޭޓުންނެވެ. އެސްޓޭޓުން އިއްޔެ އެކަނިވެސް 1،685 މީހުން ވައިރަސްއަށް ޕޮޒިޓިވްވި އެވެ. އެއާއެކު ވައިރަސްއަށް ޕޮޒިޓިވްވީ މީހުންގެ ޢަދަދު ވަނީ 34،914ށް އަރާފަ އެވެ.

ތިންވަނަ އަށް އެންމެ ގިނަ މީހުން ވައިރަސްއަށް ޕޮޒިޓިވްވީ ވެރިރަށް ނިއު ދިއްލީންނެވެ. ނިއު ދިއްލީން މިހާތަނަށް 27،654 ޕޮޒިޓިވްވެ، 761 މީހުން ވަނީ މަރުވެފަ އެވެ.

އިންޑިއާގެ ފެޑެރަކް ހެލްތު މިނިސްޓްރީގެ އެންމެ ފަހުގެ ޑޭޓާތަކަށް ބަލާއިރު މުޅި އިންޑިއާއިން ފާއިތުވެދިޔަ 24 ގަޑީއިރު، 9،987 މީހުން ވައިރަސްއަށް ޕޮޒިޓިވްވެ، 331 މީހުން މަރުވި އެވެ. އިންޑިއާގައި ވައިރަސްއަށް ޕޮޒިޓިވްވީ މީހުންގެ މިހާރުގެ ޖުމުލަ ޢަދަދަކީ 276،146އެެވެ. އަދި މަރުވީ މީހުންގެ ޢަދަދު ވަނީ 7،750ށް އަރާފަ އެވެ.

މިހާރުވެސް އެޤައުމުގައި 133,726 މީހުން ފަރުވާ ހޯދަމުންދާއިރު، އޭގެތެރެއިން، 8,944 މީހުންގެ ޙާލު ސީރިއަސްކަމަށް ޚަބަރު ލިބެއެވެ. އަދި މިހާތަނަށް ފަރުވާ ދީގެން 276،1460 މީހުން ވަނީ ރަނގަޅުވެފަ އެވެ.