ޗިލްވެލްގެ ސޮއި ހޯދަން ޗެލްސީގެ އިތުރުން ސިޓީ

ލެސްޓާ ސިޓީގެ ޑިފެންޑަރު ބެން ޗިލްވެލްއަށް ޗެލްސީގެ އިތުރުން މެންޗެސްޓާ ސިޓީން ފާރަލަމުން އަންނަ ކަމަށް ރިޕޯޓުތައް ބުނެފިއެވެ.

ލެސްޓާއަށް ކުޅެމުން އަންނަ އިނގިރޭސި ޑިފެންޑަރު ޗިލްވެލް ހޯދުމަށް ޗެލްސީން މީގެ ކުރިން މަސައްކަތް ފަށާފައިވާއިރު، މެންޗެސްޓާ ސިޓީންވެސް އޭނާއަށް ފާރަލަމުން އަންނަ ކަމަށް ސްކައި ސްޕޯޓްސްއިން ދާދި ފަހުން ވަނީ ރިޕޯޓުކޮށްފައެވެ.

އުމުރުން 23 އަހަރުގެ ޗިލްވެލް ލެސްޓާ އާއެކު ހަދާފައިވާ އެއްބަސްވުމުގައި ބާކީ ހަތަރު އަހަރު އޮތްއިރު، އޭނާގެ އެއްބަސްވުން އުވާލަން ދައްކަން ޖެހޭ ފީ އެއް ހިމަނާފައެއް ނުވެއެވެ. އެހެންކަމުން ޗިލްވެލް ގަތުމަށް ޗެލްސީ އާއި ސިޓީއަށް ވެސް އުނދަގޫތަކަކާ ކުރިމަތިވާނެ ކަމަށް ރިޕޯޓުތައް ބުނެއެވެ.

ލެސްޓާއިން މިހާތަނަށް ޗިލްވެލްއަށް އަގެއް ކަނޑައަޅާފައިވާ ނުވި ނަމަވެސް، ރިޕޯޓުތައް ބުނާ ގޮތުން ލެސްޓާއިން އޭނަ ވިއްކާނީ ބޮޑު އަގެއްގައެވެ.

2015 ވަނަ އަހަރުގެ އޮކްޓޯބަރު މަހު ލެސްޓާއިން ކެރިއަރު ފެށި ޗިލްވެލް އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން މިހާތަނަށް އޭނާ ވަނީ ލެސްޓާއަށް ކުޅެދިން 118 މެޗުގައި ތިން ލަނޑު ކާމިޔާބުކޮށްފައެވެ. އަދި ޒުވާން ޑިފެންޑަރު ވަނީ މިހާތަނަށް އިންގްލެންޑް ގައުމީ ޓީމަށް 11 މެޗު ކުޅެދީފައެވެ.

ޗިލްވެލްއަށް ޗެލްސީން ފާރަލަމުން އަންނައިރު، ދާދި ފަހުން ބީބީސީން ވަނީ ޖަރުމަންގެ ލެއިޕްޒީގަށް ކުޅެމުން އަންނަ ފޯވާޑް ޓިމޯ ވާނާގެ ސޮއި ޗެލްސީން ހޯދާފައިވާ ކަމަށް ރިޕޯޓު ކޮށްފައެވެ. އެކަމަކު ލެއިޕްޒީގުން ވަނީ އެކަން ދޮގު ކޮށްފައެވެ.

މި މަހުގެ 17 ވަނަ ދުވަހު އިނގިރޭސި ޕްރިމިއާ ލީގު އަލުން ފަށާއިރު، ލެސްޓާ އޮތީ ތާވަލުގެ ތިންވަނައިގައި 29 މެޗުން 53 ޕޮއިންޓާއެކު އެވެ. އަދި ލެސްޓާގެ ފުލުން ހަތަރުވަނައިގައި އޮތް ޗެލްސީއަށް 29 މެޗުން ލިބިފައިވަނީ 48 ޕޮއިންޓެވެ. އަދި އެންމެ ފަހުގެ ޗެމްޕިއަން މެންޗެސްޓާ ސިޓީ އޮތީ ތާވަލުގެ ދެވަނައިގައި 28 މެޗުން 57 ޕޮއިންޓާއެކު އެވެ.