ކުރީގެ ރައީސް މުހައްމަދު ނަޝީދުގެ ވެރިކަން ފުލުހުންނާއި ސިފައިން ވެގެން ބަދަލުކޮށް، ޖެހިގެންއައި ދުވަހު އޭރު ރައްޔިތުންގެ މަޖިލީހުގެ މެމްބަރު އަދި މިހާރުވެސް މަޖިލިސް މެމްބަރަކަށް ހުންނެވި، އިބްރާހީމް ރަޝީދުއަށް ފުލުހުން އަނިޔާކުރި ވީޑިއޯ ޖަލްސާގައި ދެއްކުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނާއިބު ރައީސް އީވާ އަބްދުﷲ އެދިލައްވައިފި އެވެ.
އެވީޑިއޯއަކީ، 7 ފެބްރުއަރީ 2012 ގައި ރައީސް ނަޝީދުގެ ވެރިކަން ބަދަލުކޮށް، ޖެހިގެން އައި 8 ވަނަ ދުވަހު އެމްޑީޕީއާއި އެމްޑީޕީއަށް ސަޕޯޓްކުރާ އެތައްހާސްޔަބަކު މަގުމަށްޗަށް ނިކުމެ، މުޒާހަރާ ކުރުމުން، ފުލުހުންނާއި ސިފައިން، ދިވެހިރައްޔިތުންނަށް ކުރި އަނިޔާގެ މަންޒަރު ފެންނަ ވީޑިތޯތަކުގެ ތެރެއިން އާންމުވި އެއް ވީޑިއޯ އެވެ. މިވީޑިއޯގައި އޭރުވެސް، އަދި މިހާރު ހިނގަމުންދާ 19 ވަނަ ރައްޔިތުންގެ މަޖިލީގެ މާފަންނު މެދުދާއިރާގެ މެމްބަރު އިބްރާހީމް ރަޝީދު (ބޮންޑާ)އަށް ފުލުހުން ވަރަށް ބޮޑަަށް އަނިޔާކުރާ މަންޒަރު ފެނެއެވެ.
ސަރުކާރުގެ ފަރާތުން، ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، ދިވެހި ފުލުހުންގެ ޚިދުމަތުގެ ބިލަށް އަންގާރަ ދުވަހުގެ ޖަލްސާގައި ބަހުސް ކުރައްވަމުން އީވާ ވިދާޅުވީ، އެވީޑޯ ބަލަން ބޭނުންވާ ސަބަބަކީ، އެކަންކަމަށް، އަނިޔާކުރި މީހުންނަށް، އަނިޔާކުރިކަން، ރަސްމީ ސިފައެއްގައި 'އެކްނޮލެޖް' ނޮކޮށްލާހާހިނދަކު ނުވަތަ އެކަންކަމަށް މާފަށް ނޭދޭހާ ހިނދަކު، އެއީ ހަމަ ނުވާކަމަކަށް ހަދައިގެން ގައުމެއްގެ ގޮތުގައި ތިބޭތީ ކަމަށެވެ. އީވާ ވިދާޅުވީ ރާއްޖޭގެ ޖަލުތަކުގައި ފުލުހުން ކުރިހާ އަނިޔާ، މަގުމަތީގައި ފުލުހުން ކުރަމުންދިޔަކަމަށާއި މިއީ ދިވެހިރާއްޖޭގެ ސަގާފަތަކަށް ވެފައިވާ ކަމެއްކަމަށެވެެ.
އެ އަނިޔާތަކަށް ރަސްމީ ސިފައެއްގައި މައާފަށް ނޭދޭހާ ހިނދަކު، އަޅުގަނޑުމެން މިތިބެނީ އެކަންކަން، އެއީ ނުވާކަމަކަށް ހަދައިގެން. ބިލް، ފުލުހުންގެ މުއައްސަސާ ރިފޯމްކުރުން، އެކަމަށް ދެބަސްވާނެ ދިވެހިރައްޔިތަކުން ހުންނާނެ ހެނެއް ހިޔެއް ނުވޭ. ކުޑައެއްބޮޑެއް، އަންހެނެއް ފިރިހެނެއް، އެމްޑީޕީއެއް، ޕީޕީއެމެއް، ޑީއާރުޕީއެއް، އެހެން ޕާޓީއެއް އަދި އެހެން ޕާޓީތަކުންވެސް، އަޅުގަނޑަކަށް ހިޔެއްނުވޭ މިކަމަށް ދެބަސްވާނެ ހެނެއް.ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ
އީވާ ވަނީ މިހާރު އެމެރިކާގައި ފެންމަތިވެގެން އުޅޭ މައްސަލައަށްވެސް އަލި އަޅުވާ ލައްވާފަ އެވެ. އެގޮތުން، އެމެރިކާގައި ފުލުހުން އަނިޔާކޮށް މަރާލި މީހާގެ މައްސަލާގައި އަދި ފުލުހުން ކުރާ އަނިޔާއާ ދެކޮޅަށް އެމެރިކާގެ ވެރިކަން ކުރާ ޕާޓީއާއި އިދިކޮޅު ޕާޓީގެ އިސްބޭފުޅުން ނުކުމެވަޑައިގަންނަވާފައިވާ ކަމަށެވެ. މުޒާހަރާ އަށްވެސް ނިކުންނަވާފައިވާ ކަމަށާއި އަދި ފުލުހުންގެ އަނިޔާ ހުއްޓުވުމަށް ގާނޫނު އިސްލާހު ކުރުމުގެ ކަންކަންވެސް ކުރަމުންދާ ކަމަށެވެ.
އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑުގެ މަރަށް އިންސާފު ހޯދައިދިނުމަށް ގޮވާލައި، އަދި ފުލުހުންގެ އަނިޔާއާ ދެކޮޅަށް ދުނިޔޭގެ ގިނަ ގައުމުތަކުގައި މުޒާހަރާކޮށް، ފުލުހުންގެ އަނިޔާ ހުއްޓުވުމަށް ގައުމުތަކުން ދަނީ މަސައްކަތް ކުރަމުން ނެވެ.
އީވާ ވިދާޅުވީ، ދިވެހި ފުލުހުގެ މުއައްސަސާއާމެދު ރައްޔިތުންގެ މެދުގައި އިތުބާރު އުފެއްދުމަށްޓަކައި އެންމެން އެކުގައި މަސައްކަތް ކުރަންޖެހޭ ކަމަށެވެ.
އީވާ ވިދާޅުވީ، މިދިއަ މަހުގެ ތެރޭގައި ފުލުހުން ޓޭޒަރ ގަން ބޭނުންކުރަން ބޭނުންވާ ކަމަށް އެދިފައިވާ ކަމަށެވެ. ނަމަވެސް ދިވެހި ފުލުހުން ޓޭޒަރ ގަން ބޭނުން ކުރުމަށް އެއްބަސްވާ ނުވަތަ ފުލުހުންނަށް އިތުބާރު ކުރި އެއްވެސް މީހަކާ ދިމާވެފައި ނުވާކަމަށްވެސް އީވާ ވިދާޅުވި އެވެ. ފުލުހުންގެ މުއައްސަސާ ރަނގަޅަށް ރިޕޯމްކޮށްފަ، އަދި ރައްޔިތުންގެ އިތުބާރު ހޯދުމަށްފަހު، ޓޭޒަރ ގަން ބޭނުން ކުރަން ބޭނުންވާ ކަމަށް ބުނިނަމަވެސް، ދިވެހިރައްޔިތުން ގަބޫލު ކުރާނެ ކަމަށް ގާބޫލު ކުރައްވާ ކަމަށް ވެސް އީވާ ވިދާޅުވި އެވެ.
