ސިޓީ ސަސްޕެންޑް ކުރި މައްސަލައިގެ އަޑުއެހުންތައް ފަށައިފި

ޔުއެފާއިން މެންޗެސްޓަރ ސިޓީ ސަސްޕެންޑް ކުރި މައްސަލަ ކޯޓް އޮފް އާބިޓްރޭޝަން ފޮރ ސްޕޯޓްސް (ސީއޭއެސް) ގައި ފަށައިފި އެވެ.

މިދިޔަ ފެބްރުއަރީ މަހު ޔުއެފާއިން ވަނީ ފައިނޭންޝިއަލް ފެއަރ ޕްލޭ (އެފްއެފްޕީ) ގަވާއިދާ ސިޓީން ޚިލާފުވެފައި ވާތީ އެ ކްލަބު ޔޫރަޕުގެ މުބާރާތްތަކުން ސަސްޕެންޑް ކުރަން ނިންމާފަ އެވެ. ޔުއެފާއިން ކުރިއަށް އޮތް ދެ ސީޒަނަށް ސިޓީ ސަސްޕެންޑް ކުރުމުން، 2020/2021 އަދި 2021/2022 ވަނަ އަހަރުގެ ސީޒަނުގެ ޔޫރަޕް މުބާރާތްތަކުގައި އެޓީމަށް ނުކުޅެވޭނެ އެވެ. މީގެ އިތުރުން ޔުއެފާ އިން ވަނީ އެޓީމު 30 މިލިއަން ޔޫރޯ އިން ޖޫރިމަނާވެސް ކޮށްފަ އެވެ.

މީގެ ކުރިން ޔުއެފާގެ ކްލަބު ފައިނޭންޝިއަލް ކޮންޓްރޯލް ބޮޑީ (ސީއެފްސީބީ) އިން ވަނީ މި މައްސަލައިގައި ސިޓީން ފުރިހަމަ އެއްބާރުލުން ދީފައި ނުވާ ކަމަށްވެސް ބުނެފަ އެވެ.

އެކަމަކު ސިޓީން ވަނީ ސަސްޕެންޑްކުރި މައްސަލަ ސީއޭއެސް ގައި އިސްތިއުނާފު ކޮށްފަ އެވެ. ހޯމަ ދުވަހު ސީއޭއެސް އިން މި މައްސަލައިގެ އަޑުއެހުންތައް ފަށާފައި ވާއިރު، ބުދަ ދުވަހު މައްސަލަ ބަލާ ނިންމާނެ ކަމަށް ރިޕޯޓުތައް ބުނެއެވެ.

ޔުއެފާ އިން ސިޓީ ސަސްޕެންޑް ކުރި ނަމަވެސް، ސިޓީން އަންނަނީ އެއްވެސް ގޯހެއް ހަދާފައި ނުވާނެ ކަމަށް ތަކުރާރުކޮށް ބުނަމުންނެވެ. އަދި އެ ޓީމަށް ދީފައިވާ އަދަބަކީ އިންސާފުވެރިކޮށް ކޮށްފައިވާ ކަމެއް ނޫން ކަމަށް އެ ޓީމުން ބުނެ އެވެ.

ސިޓީގެ މި މައްސަލައިގައި ޔުއެފާ އިން އަދަބު ދިންއިރު، އިނގިރޭސި އެފްއޭ އިންވެސް އަންނަނީ މި މައްސަލަ ބަލަމުންނެވެ. އަދި އެފްއޭ އިން ކުރާ ތަހުގީގު ސިޓީގެ މައްޗަށް ސާބިތުވެއްޖެނަމަ، އެ ކްލަބުގެ އަތުން 2014 ވަނަ އަހަރުގެ ލީގު ތަށި ނެގުމުގެ ފުރުސަތު އެބައޮތް ކަމަށް ރިޕޯޓުތައް ބުނެއެވެ.