ސިއްހީ ކުއްލި ނުރައްކަލުގެ ހާލަތުގެ ދަށުން އިއުލާންކޮށްފައިވާ ލޮކްޑައުންއާއި ހިލާފުވެގެން ބުރާސްފަތި ދުވަހު އެކަނި ވެސް 176 މީހަކު ޖޫރިމަނާ ކޮށްފިއެވެ.

ފުލުހުން އާންމުކޮށްފައިވާ ތަފާސް ހިސާބުތަކަށް ބަލާއިރު، ބުރާސްފަތި ދުވަހު މާލެއިން އެކަނި 167 މީހަކު ވަނީ ޖޫރިމަނާކޮށްފައެވެ. އަދި ހުޅުމާލެއިން 8 މީހަކު ޖޫރިމަނާ ކުރި އިރު ވިލިމާލެއިން އެކަކު ވަނީ ޖޫރިމަނާ ކޮށްފައެވެ.

ބުރާސްފަތި ދުވަހު 21 މީހަކު ވަނީ ހައްޔަރުކޮށްފައެވެ. ފުލުހުން ބުނީ މީގެ ތެރެއިން 20 މީހުން ހައްޔަރުކުރެވުނީ މާލެއިން ކަމަށާއި، އެކަކު ހައްޔަރު ކުރީ ހުޅުމާލެއިން ކަމަށެވެ.

މިހާތަނަށް ލޮކްޑައުންގެ އަމުރާއި ހިލާފުވެގެން 7151 މީހަކު ވަނީ ޖޫރިމަނާ ކޮށްފައެވެ. އެއީ މާލެއިން 6320 މީހުންނާއި، ހުޅުމާލެއިން 721 މީހުން އަދި ވިލިމާލެއިން 110 މީހުންނެވެ.

ހައްޔަރު ކުރެވުނު މީހުންގެ ތަފާސް ހިސާބުތައް ދައްކާގޮތުން ޖުމްލަ 405 މީހަކު ވަނީ ހައްޔަރުކޮށްފައެވެ. އޭގެ ތެރޭގައި ހިމެނެނީ މާލެއިން ހައްޔަރު ކުރި 363 މީހުންނާއި، ހުޅުމާލެއިން ހައްޔަރުކުރި 39 މީހެއްގެ އިތުރުން ވިލިމާލެއިން ހައްޔަރު ކުރި 3 މީހެކެވެ.

ލޮކްޑައުންގެ އަމުރާ ހިލާފުވެގެން ޖޫރިމަނާ ކުރާ މީހުން، ޖޫރިމަނާ ކުރަނީ 1000 ރުފިޔާއިންނެވެ. އެހެންކަމުން ޖޫރިމަނާކުރި 7151 މީހުން ޖޫރިމަނާގެ ގޮތުގައި ހަތް މިލިއަނަށްވުރެ ގިނަ ރުފިޔާ ދައުލަތަށް ދައްކަން ޖެހެއެވެ.