ޖިމްނާސިއާގެ އެއްބަސްވުން މަރަޑޯނާ އާކޮށްފި

އާޖެންޓީނާގެ ފުރަތަމަ ޑިވިޝަން ޓީމެއް ކަމަށްވާ ޖިމްނާސިއާގެ އެއްބަސްވުން ޑިއޭގޯ މަރަޑޯނާ އާކޮށްފި އެވެ.

މިދިޔަ އަހަރުގެ ސެޕްޓެމްބަރު މަހު މަރަޑޯނާ ޖިމްނާސިއާގެ ކޯޗުކަމާ ހަވާލުވިއިރު، ކުއްލި ގޮތަކަށް ނޮވެމްބަރު މަހުގެ ތެރޭގައި އޭނާ އެ ޓީމުގެ ކޯޗެއްގެ ގޮތުގައި ނުހުންނާނެކަން އެ ކްލަބްގެ ރައީސް ގަބްރިއެލް ޕެލެގްރީނޯ އިއުލާން ކުރެއްވި އެވެ. އެއާއެކު އެ ކްލަބުގެ ސަޕޯޓަރުން ހަޅުތާލުކުރުމުން، ދެ ދުވަސް ފަހުން މަރަޑޯނާ ވަނީ އަލުން އެ ކްލަބާ ހަވާލުވެފައެވެ.

އުމުރުން 59 އަހަރުގެ މަރަޑޯނާ ޖިމްނާސިއާގެ އެއްބަސްވުން ދާދި ފަހުން އާކުރިއިރު، އޭނާ އެ ކްލަބުގައި 2021 ގެ ނިޔަލަށް މަޑުކުރާނެ އެވެ. މީގެ ކުރިން މަރަޑޯނާ ޖިމްނާސިއާ އާއެކު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެ އެވެ.

އާޖެންޓީނާ އަށް 1986 ވަނަ އަހަރުގެ ފީފާ ވޯލްޑް ކަޕް ކާމިޔާބު ކޮށްދިން ކެޕްޓަން މަރަޑޯނާ އަކީ ފީފާ އިން ހޮވި 20 ވަނަ ގަރުނުގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ފުޓްބޯޅަ ލެޖެންޑެކެވެ. ކާމިޔާބު ފުޓްބޯޅަ ކެރިއަރެއް ނިންމާލާފައިވީ ނަމަވެސް މަރަޑޯނާގެ ކޯޗިން އަދި އެންމެ ފުރިހަމައެއް ނޫނެވެ. އޭނާ ވަނީ އާޖެންޓީނާ ގައުމީ ޓީމަށް 2010 ވަނަ އަހަރުގެ ވޯލްޑް ކަޕްގައި ކޯޗުކޮށްދީފަ އެވެ.

މަރަޑޯނާ ކޯޗުކަން ކޮށްދިން ޓީމުތަކަށް މާ ރަނގަޅު ނަތީޖާއެއް މިހާތަނަށް ނެރެވިފައި ނުވާއިރު، މިދިޔަ އަހަރުގެ ކުރީކޮޅު ކޯޗުކަން ކޮށްދިން މެކްސިކޯގެ ޑޮރަޑޯސް ވެސް އޭނާގެ ކޯޗުކަމުގައި ވަނީ ރެލިގޭޓް ވެފަ އެވެ. މަރަޑޯނާ އެ ޓީމުގެ ކޯޗު ކަމާ ހަވާލުވެ ހުރިއިރު، ސިއްހީ ހާލަތު ގޯސްވުމުން އޭނާ އަށް ވަނީ ގިނަ މެޗުތަކެއް ގެއްލިފަ އެވެ.