މިރޭ ބާއްވާ ކޮމިޓީ ބައްދަލުވުމަށް މިނިސްޓަރ ނަހުލާ ހާޒިރު ކުރަނީ
3 ޖޫން 2020 | ބުދަ 09:59މި ބައްދަލުވުން ބޭއްވުމަށް ހަމަޖެހިފައިވަނީ މިރޭ 21:00 ގައި
މިނިސްޓަރ ނަހުލާ، މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީގެ ބައްދަލުވުމުން
މިރޭ އޮންނަ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީއަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ބޭފުޅުން ހާޒިރު ކުރާގޮތަށް ހަމަޖެހިއްޖެއެވެ.
މިއީ ކޮވިޑް-19 އާއި ގުޅިގެން މިނިސްޓްރީގެ މަސައްކަތްތައް ކުރިއަށްގެންދާ ގޮތާމެދު މަޝްވަރާކުރުމަށް ބޭއްވޭ ބައްދަލުވުމެކެވެ. މި ބައްދަލުވުން ބޭއްވުމަށް ހަމަޖެހިފައިވަނީ މިރޭ 21:00 ގައެވެ.
މި ބައްދަލުވުމުގައި ޓްރާންސްޕޯޓު މިނިސްޓަރ އައިޝަތު ނަހުލާ ބައިވެރިވެވަޑައިގަންނަވާއިރު ސްޓޭޓް މިނިސްޓަރ އަހުމަދު ޒުހައިރު ބައިވެރިވެވަޑައިގަންނަވައެވެ. މީގެ އިތުރުން ވެސް މިނިސްޓްރީގެ ގެ ފަރާތުން އިތުރު ބޭފުޅުން މި ބައްދަލުވުމުގައި ބައިވެރިވެވަޑައިގަންނަވާނެއެވެ.
ކޮވިޑް-19 އާއި ގުޅިގެން މާލެ ސަރަހައްދު ލޮކްޑައުން ކުރުމާއެކު، މިނިސްޓަރ ނަހުލާ ހަރަކާތްތެރިވެވަޑައިގަންނަވާ މަންޒަރު ނުފެންނަކަމަށް ވިދާޅުވެ ރައްޔިތުންގެ މަޖިލީހުގެ ބައެއް މެމްބަރުން ވަނީ މީގެކުރިން ކަންބޮޑުވުން ފާޅުކުރައްވާފަ އެވެ.
