އަންނަ ސީޒަނުގެ ނިޔަލަށް ބާސެލޯނާގައި އެޓީމުގެ ކެޕްޓަން ލިއޮނެލް މެސީ މަޑުކުރާނެކަން ކަށަވަރުވެއްޖެ އެވެ.

ބާސެލޯނާއާ އެކު 2017 ވަނަ އަހަރު މެސީ ހަދާފައިވާ އެއްބަސްވުމުގެ ދަށުން ކޮންމެ ސީޒަނެއް ނިމުމުން ވެސް މެސީ އަށް ހިލޭ ޓްރާންސްފަރއެއްގެ ދަށުން ކްލަބު ދޫކޮށްލުމުގެ ފުރުޞަތު ލިބެއެވެ. 2017 ވަނަ އަހަރު މެސީ އެއްބަސްވުން އާކޮށްފައިވަނީ ހަތަރު އަހަރުގެ މުއްދަތަށެވެ. އެހެންކަމުން އަންނަ އަހަރު މެސީގެ އެއްބަސްވުން ހަމަވާނެއެވެ.

މި ސީޒަން ނިމުމުން މެސީ ބާސާ ދޫކޮށްލަން އުޅޭ ކަމަށް އަޑުފެތުރުނު ނަމަވެސް، ހިލޭ ޓްރާންސްފަރއެއްގެ ދަށުން ކްލަބު ބަދަލުކުރަން މެސީ އަށް ލިބުނު ފުރުޞަތު މި ހަފުތާގައި ވަނީ ފަހަނައަޅައި ގޮސްފަ އެވެ. އެހެންކަމުން އަންނަ ސީޒަނުގެ ނިޔަލަށް މެސީ ބާސާ ގައި މަޑުކުރާނެކަން މިހާރު ވަނީ ކަށަވަރު ވެފައެވެ.

މި ސީޒަން ނިމުމުން އިޓަލީގެ އިންޓަ މިލާނަށް މެސީ ބަދަލުވާން އުޅޭކަމަށް ސްޕެއިންގެ ބައެއް މީޑިއާތަކުން މީގެ ކުރިން ރިޕޯޓު ކުރުމާއެކު، އެފަހަރު މެސީ ވަނީ އެކަން ދޮގު ކޮށްފަ އެވެ. މީގެ ކުރިން ބާސާގެ ކޯޗު ކިކޭ ސެޓިއެން ވަނީ މެސީ ބާސާ ދޫކޮށް ނުދާނެ ކަމަށެވެ. އަދި މެސީ އާއި ބާސާ އަބަދުވެސް އޮންނާނީ އެކުގައި ކަމަށް ސެޓިއެން ވަނީ ބުނެފަ އެވެ.

މެސީ ބާސާ ދޫކޮށްލާނެ ކަމަށް އެންމެ ފުރަތަމަ އަޑުފެތުރުނީ، ބާސާގެ ސްޕޯޓިން ޑިރެކްޓަރު އެރިކް އަބިދާލާއި މެސީއާ ދެމެދު މައްސަލަ ޖެހުމުންނެވެ. އެގޮތުން އަބިދާލް ވަނީ ބާސާގެ ކުރީގެ ކޯޗު އާނެސްޓޯ ވަލްވޭޑޭ މަގާމުން ވަކިކުރުމުގައި ކުޅުންތެރިންގެ ޒިންމާ ވެސް އެބައޮތް ކަމަށާއި، ބައެއް ކުޅުންތެރިން ވަލްވޭޑޭގެ ކޯޗުކަމުގައި އެކަށީގެންވާ ވަރަށް މަސައްކަތް ކޮށްފައިނުވާކަމަށް ތުހުމަތު ކޮށްފަ އެވެ.

އަބިދާލް އަށް ރައްދު ދެމުން މެސީ ބުނީ ކުޅުންތެރިންތަކެއް ބޮލުގައި ކޯޗަށް އެއްބާރުލުން ނުދޭ ކަމަށް ބުނެ ތުހުމަތުތަކެއް ކުރާއިރު، އެ ކުޅުންތެރިންގެ ނަން ހާމަކުރަން ޖެހޭނެ ކަމަށާއި، ކުޅުންތެރިންގެ ނަން ހާމަ ނުކުރާނަމަ އެ ތުހުމަތުކުރެވެނީ މުޅި ޓީމަށް ކަމަށެވެ. އަދި ވަކި ކުޅުންތެރިއެއްގެ ނަން ނުހިމަނާ އެފަދަ ވާހަކަތައް ދެއްކުމުން ދޮގު މަޢުލޫމާތު ފެތުރި ޓީމު ބަދުނާމުވާ ކަމަށްވެސް މެސީ ބުނެފައި ވެއެވެ.

ބާސާގެ ސީނިއަރ ޓީމުން 2004 ވަނަ އަހަރު ކެރިއަރު ފެށި މެސީ ވަނީ މިހާތަނަށް ބާސާއާއެކު ސްޕެނިޝް ލީގު 10 ފަހަރު ހޯދާފަ އެވެ. އަދި ޔުއެފާ ޗެމްޕިއަންސް ލީގު 4 ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް 6 ފަހަރު ހޯދާފައެވެ. މެސީ އަކީ މި އެވޯޑު އެންމެ ގިނައިން ހޯދި ކުޅުންތެރިޔާ އެވެ.