ސްޕެނިޝް ލީގު އަލުން ފަށާއިރު، ރެއާލް މެޑްރިޑްގެ މެޗުތައް އެ ކްލަބުގެ އަމިއްލަ ދަނޑު ކަމަށްވާ ސަންޓީއާގޯ ބާނަބައުގައި ނުކުޅެން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލި ސްޕެނިޝް ލީގު މިމަހުގެ 11 ވަނަ ދުވަހު އަލުން ފެށުމަށް މިހާރު ވަނީ ނިންމާފައެވެ. ލީގުގެ މެޗުތައް އަލުން ފަށާނީ ދަނޑަށް ސަޕޯޓަރުން ނުވައްދައި މެޗުތައް ކުޅޭ ގޮތަށެވެ.

ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވީ މި ސީޒަނުގައި ރެއާލުން ކުޅެން ހަމަޖެހިފައި ހުރި މެޗުތައް އެ ކްލަބުގެ ރަސްމީ ދަނޑު ކަމަށްވާ ސަންޓީއާގޯ ބާނަބައުގައި ނުކުޅޭނެ ކަމަށާއި، އޭގެ ބަދަލުގައި މެޗުތައް ކުޅޭނީ ތަމްރީނުކުރަން ބޭނުންކުރާ އަލްފްރެޑޯ ޑި ސްޓެފާނޯ ސްޓޭޑިއަމްގައި ކަމަށެވެ. މި ދަނޑަކީ 6،000 މީހުންގެ ޖާގައިގެ ދަނޑެކެވެ. ރެއާލުން މައުލޫމާތުދޭ ގޮތުގައި މެޗުތައް ފަށާއިރު މި ދަނޑުގައި ވެސް ވީޑިއޯ އެސިސްޓަންޓް ރެފްރީ (ވީއޭއާރް) ބޭނުން ކުރެވޭނެ އެވެ.

ބާނަބައުގައި މެޗުތައް ނުކުޅެން ނިންމީ އެ ދަނޑުގެ މަރާމާތުގެ މަސައްކަތްތައް ހުއްޓާނުލާ ކުރިއަށް ގެންދިޔުމަށް ކަމަށް ޕެރޭޒް ވަނީ ވިދާޅުވެފައެވެ. 2022 ވަނަ އަހަރުގެ ނިޔަލަށް ބާނަބައު ތަރައްގީ ކުރަން މީގެ ކުރިން ނިންމާފައިވީ ނަމަވެސް، ކޮވިޑް-19 އާ ގުޅިގެން އެ ދަނޑު އެއްކޮށް ތަރައްގީކޮށް ނިންމާލުން ލަސްވާނެ ކަމަށް ޕެރޭޒް ވިދާޅުވިއެވެ.

މާޗު މަހު މެދުކަނޑާލި ސްޕެނިޝް ލީގު މިމަހުގެ 11 ވަނަ ދުވަހު އަލުން ފަށާއިރު، ރެއާލުން އެންމެ ފުރަތަމަ މެޗެއް ކުޅޭނީ މިމަހުގެ 14 ވަނަ ދުވަހު އެވެ. އެ ދުވަހު ރެއާލް ނުކުންނާނީ އަމިއްލަ ދަނޑުގައި އެއިބާއާ ދެކޮޅަށެވެ.

ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސެލޯނާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާ އަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.