ދައުވާ ކުރުމަށް ނިންމީ 7 ޕްރޮސެކިއުޓަރުންގެ މައްޗަށް އެކުލެވޭ ޓިީމަކުން
ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން، ރާއްޖެޓީވީގެ ފަށާއިރު ޕްރޮގްރާމްގައި
ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު (އަބްދުﷲ ގާޒީ) ގިރިފުށީގައި ބަންދުކުރި މައްސަލައިގައި ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާ ކުރުމަށް ނިންމި ނިންމުމަކީ 'މިނިވަން ނިންމުމެއް' ކަމަށް ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން ވިދާޅުވެއްޖެއެވެ.
އަންގާރަ ދުވަހު ރާއްޖެޓީވީގެ 'ފަށާއިރު' ޕްރޮގްރާމަށް ދެއްވި ޚާއްސަ އިންޓަރވިއު އެއްގައި މުހުތާޒް ވަނީ ރައީސް ނަޝީދުގެ މައްޗަށް ކުރީގެ ރައީސް އަބްދުﷲ ޔާމީނުގެ ވެރިކަމުގެ ކުރެވުނު ދައުވާތައް ކުރެވިގެން ދިޔަ ގޮތް ތަފްސީލުކޮށްދެއްވާފައެވެ. އެގޮތުން އޭނާ ވިދާޅުވީ ރައީސް ނަޝީގެ މައްޗަށް ކުރެވުނު ދައުވާ އަނބުރާ ގެންދެވުމަށްފަހު ޓެރަރިޒަމްގެ ދައުވާ ކުރުމަށް ނިންމީ 7 ޕްރޮސެކިއުޓަރުންގެ މައްޗަށް އެކުލެވޭ ޓިީމަކުން ކަމަށެވެ. އަދި އެ ނިންމުން އެބޭޅުން ނިންމެވީ މިނިވަން ކަމާއިއެކު ކަމަށެވެ.
މުހުތާޒް ވިދާޅުވީ އެ ނިންމުމަށް އޭރުގެ ރައީސުލްޖުމްހޫރިއްޔާގެ ވެސް، އަދި އެހެން ސިޔާސީ ބޭފުޅެއްގެ ނުފޫޒެއްވެސް އެ ނިންމުން ނިންމުމުގައި ނޯންނާނެ ކަމަށެވެ.
ރައީސް ޔާމީންގެ ސަރުކާރުގައި ރައީސް ނަޝީދަށް ޓެރަރިޒަމްގެ ދައުވާ ސާބިތުވެ، 13 އަހަރަށް ޖަލަށްލި އެވެ. އެމަނިކުފާނު ވެރިކަމުގައި ހުންނެވި އިރު ކްރިމިނަލް ކޯޓުގެ އެއިރުގެ އިސްގާޒީ ގިރިފުށީގައި ބަންދުކުރި މައްސަލައިގައި ޓެރަރިޒަމްގެ ދައުވާ އުފުލާ، އެމަނިކުފާނުގެ މައްޗަށް ޖަލު ހުކުމް އިއްވާފައިވަނީ 2015 ވަނަ އަހަރުގެ މާޗް މަހުގެ 13 ވަނަ ދުވަހު އެވެ. އެއީ ރައީސް ޔާމީން ސިޔާސީ ނުފޫޒު ފޯރުވައިގެން ކުރެއްވި ސިޔާސީ ހުކުމެެއް ކަމަށް ރައީސް ނަޝީދު ވަނީ ވިދާޅުވެފައެވެ.
