އެއް މަސް ދުވަސް ފަހުން މަނަދޫ އާއްމު ހާލަތަށް

އެއް މަސް ފަހުން ނ. މަނަދޫ އާއްމު ހާލަތަށް ގެނެސްފި އެވެ.

ކޮވިޑް-19 ގެ ކޭސްތަކެއް ފެނުމާއިއެކު މަނަދޫ މޮނިޓަރިންގެ ހާލަތަށް ގެންގޮސްފައިވަނީ މޭ މަހުގެ އެއް ވަނަ ދުވަހު އެވެ. މަނަދޫ މޮނިޓަރިންގެ ހާލަތު އުވާލިކަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ރަށު ކައުންސިލަށް އަންގާފައެވެ.

އެ ރަށުން ނުވަ މީހަކު ކޮވިޑް-19 އަށް ޕޮޒިޓިވްވި އެވެ.

ޕޮޒިޓިވްވި އެންމެންވެސް ދެވަނަ ސާމްޕަލް ނެގެޓިވްވެފައިވާކަމަށް އެ ރަށުގެ ކައުންސިލުން ވަނީ ބުނެފަ އެވެ. މަނަދޫ އިން އެންމެ ފުރަތަމަ ޕޮޒިޓިވްވި ކަމަށް ރިޕޯޓް ކުރެވުނީ 80 އަހަރުގެ އަންހެނެކެވެ. އެކަމަކު އެމީހާ ވަނީ އެ ބަލިން ފަސޭހަވި ފަހުން ނިޔާވެފައެވެ.

ރާއްޖެއިން މިހާތަނަށް ކޮވިޑް-19 އަށް 1700ށް ވުރެ ގިނަ މީހުން ވަނީ ޕޮޒިޓިވްވެފަ އެވެ. އޭގެ ތެރެއިން 450 ށް ވުރެ ގިނަ މީހުން ވަނީ ބަލިން ފަސޭހަވެފަ އެވެ. ޕޮޒިޓިވްވި މީހުންގެ ތެރެއިން ގިނަ މީހުންނަކީ ބަންގްލަދޭޝް އަށް ނިސްބަތްވާ މީހުންނެވެ.