ޕާރމިޓް ދޫ ނުކުރެވިވާ 2207 ފަރާތަކަށް ބިޒްނަސް ޕާރމިޓް ދޫކޮށްފި
1 ޖޫން 2020 | ހޯމަ 08:14އިކޮނޮމިކް މިނިސްޓްރީގެ މިންގަނޑަށް ފެތޭ ހުރިހާ ސައްހަ އެޕްލިިކޭޝަންތަކަށް ހުއްދަ ދެވޭނެ
ބާޒާރުމަތީ ފިހާރައެއް - ކޮވިޑް-19ގައި މިހާލަތުގައި ބޭރަށް ނުކުމެވޭނީ ޚާއްސަ ހުއްދައާއެކު
ބިޒްނަސް ޕާރމިޓަށް ރިކުއެސްޓްކޮށްފައިވާ ފަރާތްތަކުގެ ތެރެއިން ޕާރމިޓް ދޫ ނުކުރެވިފައިވާ 2207 ފަރާތަކަށް ބިޒްނަސް ޕާރމިޓް ދޫކޮށްފިއެވެ.
މޯލްޑިވްސް ޕޮލިސް ސަރވިސްއިން ބުނީ ޕާރމިޓް ޕޯރޓަލް މެދުވެރިކޮށް ބިޒްނަސް ޕާރމިޓަށް ރިކުއެސްޓްކޮށްފައިވާ ފަރާތްތަކުގެ ތެރއިން ޕާރމިޓް ދޫ ނުކުރެވިވާ 2207 ފަރާތަކަށް މެއި 31 ވީ އާދިއްތަ ދުވަހު ބިޒްނަސް ޕާރމިޓް ދޫކުރެވިފައިވާ ކަމަށެވެ. ފުލުހުން ބުނީ ރިކުއެސްޓްކޮށްފައިވާ ވިޔަފާރިތަކަށް ބިޒްނަސް ޕާރމިޓްތައް ދޫކުރަން މިހާރު ފަށާފައިވާ ކަމަށާއި، އުއްމީދަކީ އިކޮނޮމިކް މިނިސްޓްރީގެ މިންގަނޑަށް ފެތޭ ހުރިހާ ސައްހަ އެޕްލިިކޭޝަންތައް ނިންމުން ކަމަށެވެ.
މެއި މަހުގެ 29 ވަނަ ދުވަހުން ފެށިގެން ލޮކްޑައުންގައި އަޅާފައިވާ ފިޔަވަޅުތަކަށް ލުއިތަކެއް ދީފައިވާއިރު، ވިޔަފާރި ކުރުމުގެ ހުއްދައަށް އެދި 8000 ފަރާތަކުން އެދިފައިވާ ކަމަށް ފުލުހުން ބުނެއެވެ.
އާންމުންނަށް ނިކުމެ އުޅުމުގައި ދެވޭ ލުއިތަކުގެ ތެރޭގައި ކޮންމެ ގޭބިސީއަކުން ދެ މީހަކަށް ދެ ގަޑިއިރަށް ބޭރަށް ދިއުމުގެ ފުރުސަތު ލިބޭއިރު ހުރިހާ ފަރާތަކަށް ވެސް މަގުމައްޗަށް ނިކުމެ އުޅެވޭނީ ފުލުހުންގެ ހުއްދަ ލިބިގެންނެވެ. ހުއްދަ ލިބިގެން ނިކުންނަ ފަރާތްތަކަށް ދެވޭ ސަރަހައްދުތައް ވެސް އިތުރުވާނެ އެވެ.
މިއާއިއެކު ގިނަ ބަޔަކު ވިޔަފާރިކުރުމުގެ ހުއްދައަށް އެދި ރިކުއެސްޓް ކޮށްފައިވާއިރު، ހުއްދަ ލިބުމުގައި ލަސްތަކެއް އުޅޭކަމަށް ބުނެ ގިނަ ބަޔަކު ކަންބޮޑުވުން ފާޅުކޮށްފައިވެސް ވެއެވެ.
ފުރަބަންދު ލުއި ދިނުމުގެ ކުރިން ކޮންމެ މީހަކަށް 1 ގަޑި އިރު ދޭއިރު، އެވަގުތު 2 ގަޑި އިރަށް މިހާރު ވަނީ ބަދަލުކުރެވިފައެވެ. ކުރިއާ ޚިލާފަށް ފިހާރަތައް ހުޅުވާފައިވާ ވަގުތަށް ބަދަލުތަކެއް ގެނެސްފައިވެއެވެ. އެ ބަދަލަކީ ހެނދުނު 9ން ރޭގަނޑު 9ށް ފިހާރަތައް ޢާންމު ރައްޔިތުން ބޭނުންވާ ޚިދުމަތްތައް ހޯދަން ހުޅުވާފައި ބެހެއްޓުމުގެ ހުއްދަ ދިނުމެވެ.
