އިތުރު 101 މީހަކު ކޮވިޑް-19ށް ޕޮޒިޓިވް ވެއްޖެ

އިތުރު 101 މީހަކު ކޮވިޑް-19ށް ޕޮޒިޓިވްވެއްޖެ އެވެ.

އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވީ ހޮނިހިރު ދުވަހުގެރޭގެ ނޫސްވެރިންގެ ބައްދަލުވުމުގެ ފަހުން އާދީއްތަ ދުވަހުގެ ހަވީރު 6:00 އާ ހަމައަށް 101 މީހަކު ޕޮޒިޓިވްވެފައިވާ ކަަމަށެވެ. ބައްޔަށް ފަރުވާދެމުންދާ މީހުންގެ އަދަދަކީ 1313 އެވެ.

އެންމެ ފަހުން ފެނުނު ކޭސްތަކުގެ ތެރޭގައި އެއް ކްލަސްޓަރ އަކަށް ނިސްބަތްވާ 79 ކޭސް އެއް ހިމެނެ އެވެ. ކުރިން ދެނެގަނެވިފައިވާ އެއްވެސް ކްލަސްޓަރ އަކާއި ގުޅުން ނެތް، އިންޑިޕެންޑެންޓް، ކޭސްތަކުގެ އަދަދަކީ 2 އެވެ. އަދި ކޮންޓެއިންމަންޓް ސައިޓްތަކުން 12 ކޭސް އެއް ފެނިފައި ވެއެވެ.

ބައްޔަށް ބޭސްކުރަމުންދާ މީހުންގެ ތެރެއިން 453 މީހަކު ވަނީ ބަލިން ރަނގަޅުވެފައެވެ. އޭގެ ތެރޭގައި، މި ހިނގަމުންދާ 24 ގަޑި އިރު ތެރޭގައި ބަލިން ފަސޭހަވީ 52 މީހަކު ހިމެނެ އެވެ.

މިހާތަނަށް ރާއްޖެއިން 1773 މީހަކު ކޮވިޑް-19ށް ޕޮޒިޓިވްވެފައިވާ އިރު، ފަރުވާދެމުން ދަނީ 1313 މީހުންނަށެވެ. މިހާތަނަށް މި ބަލީގައި 5 މީހަކު ވަނީ މަރުވެފަ އެވެ. އެކި ފުލޫ ކްލިނިކްތަކުންނާއި އެކްޓިވް ސާމްޕަލް ނެގުމުގެ ތެރެއިން މިހާތަނަށް 24337 ސާމްޕަލެއް ވަނީ ނަގާފަ އެވެ.