ފުލުހުން ބާރުގެ ބޭނުންކުރަން ޖެހޭނީ ގާނޫނީ އިމުގެ ތެރެއިން، އަނިޔާވެރިވުމަށް އެއްވެސް އުޒުރެއް ނޯންނާނެ: ސީޕީ
31 މެއި 2020 | އާދީއްތަ 11:12ބާރުގެ ބޭނުންކުރަން ޖެހޭނީ ހާލަތަށް ރިއާޔަތްކޮށް
ކޮމިޝަނަރ އޮފް ޕޮލިސް މުހައްމަދު ހަމީދު
ފުލުހުން ބާރުގެ ބޭނުންކުރަން ޖެހޭނީ ގާނޫނީ އިމުގެ ތެރެއިން ކަމަށާއި އަނިޔާވެރި ވުމަށް އެއްވެސް އުޒުރެއް ނޯންނާނެކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
އެމެރިކާގެ މިނިސޯޓާ ސްޓޭޓްގެ މިނިއެޕްލިސް ސިޓީގައި ކަޅު ނަސްލުގެ މީހެއް ހައްޔަރު ކުރުމުގައި ފުލުހުންގެ އަމަލުތައް ބެހެއްޓި ގޮތުން އޭނާ ވަނީ މަރުވެފަ އެވެ. ޢާންމުވެފައިވާ ވީޑިއޯ ތަކުން ފެންނަ މަންޒަރުތަކުން ފްލޮއިޑް ބިންމައްޗަށް ބަންޑުން ވައްޓާފައިލާފައި އޮތް އިރު، ފުލުހަކު އޭނާގެ ކަރަށް ކަކުލުން އަރައިގެން ހުރެއެވެ. އަދި ފްލޮއިޑް ނޭވާ ނުލެވޭކަމަށް ބުނެ އާދޭސް ކުރާ އަޑުވެސް އިވެއެވެ.
ފުލުހުންގެ މި އަމަލުތަކާއި ގުޅިގެން އެތައް ބަޔެއްގެ ފާޑުކިޔުން އަމާޒުވަމުންދާ ދަނޑިވަޅެއްގައި އެމެރިކާގެ އެ ފުލުހުންގެ އަމަލުތައް ކުށްވެރިކޮށް، ސީޕީ ހަމީދު ކުރެއްވި ޓުވީޓެއްގައި ވިދާޅުވީ، ބާރުގެ ބޭނުންކުރަން ޖެހޭނީ ހާލަތަށް ރިއާޔަތްކޮށް ގާނޫނީ އިމުގެ ތެރެއިން ކަމަށެވެ.
ސީޕީ ވިދާޅުވީ، ބާރުގެ ބޭނުންކުރަން ޖެހޭނީ މުޖުތަމައުގެ ރައްކާތެރިކަމާއި އާންމުންގެ ސަލާމަތާއި ރައްކާތެރިކަން ކަށަވަރުކުރަން އެހެން ގޮތެއް ނެތިގެން ކަމަށެވެ. އަދި އަނިޔާވެރި ވުމަށް އެއްވެސް އުޒުރެއް ނޯންނާނެ ކަމަށް އޭނާ ވަނީ ވިދާޅުވެފަ އެވެ.
