ކޮވިޑް-19ގެ މި ޙާލަތުގައި ކުރީ ސަފުގައި ޙަރަކާތްތެރިވަމުންދާ ޞިއްޙީ ޚިދުމަތްތެރިންނަށް އެކި ބާވަތުގެ 200ށް ވުރެ ގިނަ ޙަމަލާ ދީފައިވާ ކަމަށް އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއަރްސީ) އިން ބުނެފި އެވެ.

ކޮވިޑް-19ގެ މި ޙާލަަތުގައި ދުނިޔޭގެ އެކި ކަންކޮޅުތަކުގައި އައިސީއާރްސީގެ ދައުރާއި އަދި ކުރަމުންދާ މަސައްކަތްތަކާއި، ހުރި ގޮންޖެހުންތައް، އދ ގެ ސަލާމަތީ މަޖިލީހުގައި ހިއްސާ ކުރައްވަމުން އެ ޖަމާއަތުގެ ރައީސް ޕީޓަރ މޯރަރ ވިދާޅުވީ، މިިދިޔަ މަރޗް މަހުން ފެށިގެން މިހާތަނަށް އާއިރު ޞިއްހީ ޚިދުމަތްތެރިންނަށް ޢަމާޒުކޮށް 208 ޙަމަލާއެއް ދީފައިވާކަން ރިކޯޑު ކުރެވިފައިވާ ކަމަށެވެ.

ޕީޓަރ ވިދާޅުވީ 13 ޤައުމަކުން ޞިއްހީ ޚިދުމަތްތެރިންނަށް ޙަމަލާ ދިނުމުގެ އިތުރުން ފުރައްސާރަ ކުރުމާއި، ޞިއްހީ އިދާރާތަކަށް ޙަމަލާ ދިނުމުގެ މައްސަލަތައް ރިޕޯޓު ކޮށްފައިވާ ކަމަށެވެ. އެގޮތުން، އެފްރިކާ، އޭޝިޔާ ޕެސިފިކް، މެދުއިރުމަތި، އަދި އެމެރިކާ ޞަރަޙައްދުގެ ޤައުމުތަކުން މި ފަދަ މައްސަލަ ރިކޯޑު ކުރެވިފައިވާ ކަމަށާއި، ރިޕޯޓު ނުކުރެވިވެސް މިފަދަ އެތައް ކަމެއް ހިނގާނެކަމަށް ޤަބޫލުފުޅު ކުރައްވާ ކަމުގަ ވިދާޅުވި އެވެ. އޭނާ ވިދާޅުވީ ޞިއްހީ ޚިދުމަތްތެރިންގެ އެންމެ ބޭނުން ޖެހިފައިވާ މި ދަނޑިވަޅުގައި އެ ފަރާތްތަކުގެ އަގު ވަޒަން ކުރުމުގެ ބަދަލުގައި، ގޯނާކޮށް ފުރައްސާރަކޮށް، ޖިސްމާނީ އަދި ނަފުސާނީ އަނިޔާ ދިނުމަކީ ބަލައިގަނެވޭނެ ކަމެއް ނޫން ކަމަށެވެ.

މީގެ އިތުރުން ބައެއް ޤައުމުތަކުގައި ޚިދުމަތްދޭ ތަންތަނަށް ވަދެ އެތަންތަން ރޯކޮށްލާ، އެތާނގައި މަސައްކަތް ކުރައްވާ ޚިދުމަތްތެރިންނަށް އަނިޔާކޮށް ބިރު ދެއްކުން ފަދަ ރިޕޯޓުތައް އައިސީއާރްސީއަށް ރިޕޯޓު ކުރެވިފައިވާ ކަމަށް ވެސް ޕީޓަރ ވިދާޅުވި އެވެ. އެގޮތުން މިހާތަނަށް ރިޕޯޓު ކުރެވިފައިވާ މައްސަލަތަކުގެ ތެރެއިން %23 އަކީ ޖިސްމާނީ ގޮތުން ދިން ޙަމަލާތައް ކަމަށާއި، %20 ޙަމަލާތަކަކީ ތަފާތުކުރުންތަކުގެ ތެރެއިން ދީފައިވާ ޙަމަލާތައް ކަމަށެވެ. އިތުރު ޙަމަލާތަކުގެ ތެރޭގައިި ފުރައްސާރަކުރުމުގެ ބަހުގެ ޙަމަލަތަކާއި ބިރު ދެއްކުން ފަދަ ނުރައްކާތެރި ޢަމަލުތައް ހިމެނޭ ކަމަށް ޕީޓަރ ވިދާޅުވެފައި ވެއެވެ.

ބުދަ ދުވަހުގެ ބައްދަލުވުމުގައި އައިސީއާރްސީއާއި ބައިނަލްއަޤުވާމީ ކަމާއި ގުޅުން ހުރި ޖަމާޢަތްތަކުން ވަނީ ގުޅިފައިވާ ޤަރާރެއް ނެރިފަ އެވެ. މި ޤަރާރުގައި ކޮވިޑް-19 ގެ އެކި ޙާލަތްތަކުގައި ޙަަރަކާތްތެރި ވަމުންދާ ޚިދުމަތް ތެރިންނަށް ހިތްވަރުދީ، އެ ފަރާތްތަކުގެ މަސައްކަތްތަކަށް ތަޢުރީފު ކޮށްފަ އެވެ. އަދި ޚިދުމަތްތެރިންނަށް ދެމުންގެންދާ އަނިޔާތަކާއި، ޙަމަލާތައް ހުއްޓާލާ، މަސައްކަތުގައި އެހީތެރިކަން ފޯރުކޮށް ދިނުމަށް ސަރުކާރުތަކަށާއި ވަކި ވަކި ފަރުދުންނަށް ގޮވާލާފައި ވެއެވެ. ވަކިން ޚާއްޞަކޮށް، ޞިއްޙީ ޚިދުމަތްތެރިންގެ ޙައްޤުތައް ހިމާޔަތްކޮށް ރައްކާތެރިކަން ކަށަވަރު ކުރުމަށް ޤަރާރުގައި ގޮވާލާފައި ވެއެވެ.