މިހާރު ހިނގަމުންދާ ލޯކަލް ކައުންސިލްތަކުގެ ދައުރު އަންނަ ޖޫން މަހުގެ ތިން ވަނަ ދުވަހަށް ހަމަވާތީ، އަންނަ ގާނޫނީ ހުސްކަން ނައްތާލުމަށްޓަކަައި، ގާނޫނުއަސާސޫއަށް ގެންނަން ރައްޔިތުންގެ މަޖިލީހަށް ހުށަހަޅަފައިވާ އިސްލާހު ބަލައިގަނެ، ދިރާސާކުރުމަށް ކޮމެޓީއަށް ފޮނުވައިފި އެވެ.

ސަރުކާރުގެ ފަރާތުން ބިލަތްދޫ ދާއިރާގެ މެމްބަރު އަހުމަދު ހަލީމު، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤަނޫނު) އަށް އިޞްލާޙު ގެނައުމުގެ ބިލު ރައްޔިތުންގެ މަލީހަން ބަލައިގަންނަން ފާސްކޮށްފައިވަނީ ވޯޓްގައި ބައިވެރިވެވަޑައިގެންނެވި 60 މެމްބަރުންގެ އިއްތިފާގުން ނެވެ.

މެމްބަރުން ބޭނުންފުޅުވި ގޮތަށް މުޅި މަޖިލީހުގެ ކޮމިޓީ އަށް މި ބިލު ދިރާސާކުރަން ފޮނުވުމަށް ވަނީ ފާސް ކުރެވިފަ އެވެ. މި ހުށައެޅުން ފާސްކުރި ވޯޓުގައި ބައިވެރިވި 61 މެމްބަރުންގެ އިއްތިފާގުންނެވެ.

މިބިލަކީ، މިދިއަ އޭޕްރީލް މަހުގެ 6 ވަނަ ދުވަހު ސަރުކާރުން ހުށައެޅި ބިލެކެވެ. މި ބިލާއި މެދު ސުވާލު އުފެދިފައިވާތީ މީގެ ކުރިންވެސް މަޖިލީހުން ބަހުސްކޮށްފައި ވެއެވެ. ނަމަވެސް ބިލް ރަސްމީކޮށް މަޖިޅީހުގެ ތަޅުމަށް ހުށަހަޅުއްވާފައިވަނީ މިމަހުގެ 26 ވަނަ ދުވަހު އެވެ. އެގޮތުން އަންގާރަ ދުވަހާއި ބުދަ ދުވަހުގެ ޖަލްސާގައިވެސް އެބިލާއިމެދު ގިނަ މެމްބަރުން ބަހުސްކުރައްވާފައިވާއިރު، މަޖިލީހުގެ މެމްބަރުންގެ މެދުގައި ވަނީ ހިޔާލު ތަފާތުވުންތަކެއް އުފެދިފަ އެވެ.

ލޯކަލް ކައުންސިލްތަކުގެ ދައުރު ދިގުކުރުމާ ގުޅޭގޮތުން، އެޓާރނީ ޖެނެރަލް އިބްރާހީމް ރިފްއަތު މަޖިލީހުގެ ލާމަރުކަޒީ ކޮމެޓީއަށް ލަފާ ދެއްވީ، ލާމަރުކަޒީ އުޞޫލުން ކައުންސިލްތައް ހިންގުމަށްޓަކައި ޤާނޫނުއަސާސީގެ 8 ވަނަ ބާބުގައި ތަރުތީބުކޮށް، ތަންޒީމުކޮށްފައިވާ އުޞޫލުތަކާއި އިޖުރާޢަތުތަކާ ޚިލާފު ނުވުމަށެވެ. އަދި 2020 އަހަރުގެ ޖޫން މަހުގެ 3 ވަނަ ދުވަހުގެ ކުރިން ލޯކަލް ކައުންސިލްތަކަށް މެންބަރުން އިންތިޚާބު ނުކުރެވިއްޖެނަމަ މެދުވެރިވާ ޤާނޫނީ ހުސްކަން ފޫބެއްދުމަށް، އަދި ލާމަރުކަޒީ އުޞޫލުން ކަންކަން ހިންގުމަށްޓަކައި ޤާނޫނުއަސާސީގެ 8 ވަނަ ބާބުގެ ރޫޙާއި، މަޤްޞަދު ޙާޞިލުކުރުމަށްޓަކައި ޢަމަލު ކުރެވެން އޮތްގޮތަކީ ޤާނޫނުއަސާސީގެ 5 ވަނަ އިޞްލާޙުގެ ގެނައުމުގެ ޤާނޫނު އިޞްލާޙު ކުރުން ކަމަށެވެ.

ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ އެ ބިލުގައިވާ ފަދައިން އެ ޤާނޫނުގެ 4 ވަނަ މާއްދާ އިޞްލާޙުކޮށް، ލޯކަލް ކައުންސިލްތަކަށް އާ މެންބަރުން އިންތިޚާބު ކުރެވެންދެން މިހާރު ކައުންސިލްތަކުގައި ތިބި މެންބަރުން އެ މަޤާމުތަކުގައި ދެމި ތިބެވޭނެކަމަށް ކަނޑައެޅުން ކަމުގައި ފެންނަ ވާހަކަ ދަންނަވާ ކަމަށް އެޓަރނީ ޖެނަރަލް ރިފްއަތު މަޖިލީހުގެ ލާމަރުކަޒީ ކޮމެޓީއަށް ފޮނުވާފައިވާ ލަފާފުޅުގައި ވިދާޅުވެފައި ވެއެވެ.

އެޓާރނީ ޖެނެރަލްގެ ލަފާދެއްވީ، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހަޅުއްވާފައިވާ "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރު ކުރުމުގެ ޚާއްޞަ ބިލު 2020" ލާމަރުކަޒީ ކޮމެޓީން ދިރާސާ ކުރުމުން ދިޔައިރު އެ ކޮމެޓީން ބޭނުންވެގެންނެވެ. މަޖިލީހުގެ ކައުންސެލް ޖެނެރަލް ވެސް ލަފާދެއްވީ އެގޮތަށެވެ.

ކޮވިޑް-19ގެ މިހާލަތުގައި ގާނޫނުއަސާސީ އިސްލާހުކުރުމާއި، ހަސަން ލަތީފް ހުށަހަޅުއްވާފައިވާ، ލާމަރުކަޒީ "ސަންސެޓް ބިލް" އާމެދު މަޖިލީހުގެ މެމްބަރުންގެ މެދުގައި ވަނީ ބޮޑެތި ހިޔާލު ތަފާތުވުންތަކެއް އުފެދިފަ އެވެ.

މިކަމާއި، ގުޅިގެން މަޖިލީހުން ބުދަ ދުވަހުގެ ރޭ ބޭއްވި ޖަލްސާއިން ވަނީ މިކަމުގައި އިސްތިޝާރީ ލަފަކަށް ސުޕްރީމް ކޯޓުގައި އެދުމަށް ވެސް ފާސްކޮށްފަ އެވެ.