ލޯކަލް ކައުންސިލްތަކުގެ އިންތިޚާބު ނުބޭއްވި މިހާރު ތިބި ކައުންސިލްތަކުގެ ދައުރު ދަންމާލުމުގެ މައްސަލައިގައި ދެން ލަފައަކަށް އެހެން އޮތީ ސުޕްރީމް ކޯޓުން ކަމަށް މަޖިލީހުގެ ރައީސް އަދި ރައީސް މުހައްމަދު ނަޝީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ކައުންސިލްތަކުގެ ދައުރު އިތުރުކުރަން ޤާނޫނުއަސާސީއަށް ހުށަހެޅިފައިވާ އިޞްލާޙުގެ ބިލުގެ ބަހުޘްގައި އެމްޑީޕީގެ ބައެއް މެންބަރުން ވަނީ މިކަމުގައި ޤާނޫނުއަސާސީއަށް ބަދަލު ގެނެސްގެން މިކަން ކުރަން ނުފެންނަ ކަމަށް ވިދާޅުވެފަ އެވެ. އަދި ވަކިން ޚާއްޞަކޮށް މިފަދަ ދަނޑިވަޅެއްގައި ރައްޔިތުންގެ މަޖިލިސް އެއްވެ މިކަން ކުރަން އުޅުމާ ދެކޮޅަށް އެމްޑީޕީގެ ބައެއް މެންބަރުން ވަނީ ވާހަކަ ދައްކަވާފަ އެވެ.

ނަމަވެސް މިކަމުގައި ޤާނޫނުއަސާސީއަށް ހުށަހެޅިފައިވާ އިޞްލާޙުގެ ބިލު ސަރުކާރުން ހުށަހެޅިގޮތަށް ފާސްކުރަން, ސަރުކާރު ހިންގާ މައި ޕާޓީ، އެމްޑީޕީގެ ޕަރލިމެންޓްރީ ގްރޫޕުން ވަނީ އަންގާރަ ދުވަހުގެ ރޭ ނިންމާފަ އެވެ. އެހެން ނިންމާފައިވީ ނަމަވެސް އެމްޑީޕީ މެންބަރުން ވަނީ އެ ނިންމުމާ ދެކޮޅަށް ވާހަކަ ދައްކަވާފަ އެވެ.

މިކަމާއި ގުޅޭގޮތުން ވާހަކަ ދައްކަވަމުން ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވީ ޤާނޫނީ ލަފާ ދެން ހޯދެން އޮތް ތަނަކީ ސުޕްރީމް ކޯޓު ކަމަށެވެ.

ރައީސް ނަޝީދު ވިދާޅުވީ ސުޕްރީމް ކޯޓުގެ ލަފައަކަށް އެދުމުގެ ކަންކަން ކުރިއަށް ގެންދަންޖެހޭނީ މެންބަރުން ޤާނޫނުގައި ބުނެފައިވާ ގޮތަށް ކަމަށެވެ. އަދި ސުޕްރީމް ކޯޓުގެ ލަފައެއް ހޯދައިގެން މިކަމުގައި ވަގުތީ ޙައްލެއް ހޯދިދާނެ ކަމަށް ރައީސް ނަޝީދު ވިދާޅުވި އެވެ.

މީގެ އިތުރުން މަޖިލިސް ފައްޓަވަމުން ވާހަކަ ދައްކަވަމުން ރައީސް ނަޝީދު ވިދާޅުވީ ޤާނޫނުއަސާސީގެ 231 ވަނަ މާއްދާގެ (ހ)ގައި ކައުންސިލަރުން އިންތިޚާބު ކުރަން ޖެހޭނީ ރައްޔިތުންގެ ސިއްރު ވޯޓަކުންކަމަށް ބަޔާން ކޮށްފައިވާ ކަމަށެވެ. އަދި މުއްދަތު އިތުރު ކުރުމަށް ޤާނޫނުއަސާސީއަށް އިޞްލާޙު ގެންނަނީ މި މާއްދާ އެގޮތަށް އޮށްވާކަން ރައީސް ނަޝީދު ފާހަގަކުރެއްވި އެވެ.

ރައީސް ނަޝީދު ވިދާޅުވީީ ޤާނޫނުއަސާސީ އިޞްލާޙުކޮށް ނިމޭއިރު އަދި ޤާނޫނުއަސާސީ ގައި މުއްދަތު އިތުރުކުރާ އިތުރު މާއްދާއެއް 231 ވަނަ މާއްދާގެ (ހ) ވާ ކަމަށެވެ. އަދި ޤާނޫނުއަސާސީގެ އެއް މާއްދާ އަނެއް މާއްދާ އާ ފުށުއަރާގޮތަށް ނުބޭއްވޭނެ ކަމަށް ވިދާޅުވި އެވެ.