މިދިޔަ ސަރުކާރުގައި ހިންގާފައިވާ ވައްކަމާއި ކޮރަޕްޝަނާއި އަދި މަރުގެ މައްސަލަތައް ކުރިޔަށް ގެންދިޔުމުގައި ކުރައްވަން ޖެހިވަޑައިގަންނަވާ ކަންކަން ކުރައްވާނެ ކަމުގެ ވަރަށް ބޮޑު ޔަގީން ކަމެއް ހޯމް މިނިސްޓަރ އައްޝއިޚް އިމްރާން އަބްދުﷲ ދެއްވާފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

އީދުގެ ތަހުނިޔާ ދަންނަވާ ކަމަށް ވިދާޅުވެ ރައީސް ނަޝީދު ކުރެއްވި ޓްވީޓެއްގައި ވިދާޅުވީ ހޯމް މިނިސްޓަރ ޝައިޚް އިމްރާން އާއި ގުޅުއްވި ކަމަށެވެ. އަދި މި މައްސަލަތައް ބައްލަވާނެ ކަމުގެ ޔަގީންކަން މިނިސްޓަރ ދެއްވާފައިވާ ކަމަށް ވިދާޅުވެ ރައީސް ނަޝީދު ވަނީ މިނިސްޓަރަށް ޝުކުރު އަދާކުރައްވާފަ އެވެ.

ރައީސް ނަޝީދު މި މޭރުމުން ޓްވީޓެއް ކުރައްވާފައި މިވަނީ އެމްއެމްޕީއާރުސީއާއި މަރު ކޮމިޝަންގެ މަސައްކަތްތައް ބައްލަވައި ދެއްވުމަށް އެދި ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު މަޖިލީހަށް ކުއްލި މައްސަލަ އެއް ހުށަހަޅުއްވާފައި ވަނިކޮށެވެ.

މިމައްސަލަ މެންބަރު ހުށަހަޅުއްވާފައި ވާއިރު މިހާރު ވަނީ މިކަމާއި ގުޅުން ހުރި ކޮމިޓީތަކަށް މިމައްސަލަ ފޮނުވާފައި ކަމަށް ރައްޔިތުންގެ މަޖިލީހުގެ އިދާރާއިން ވަނީ ބުނެފަ އެވެ.

މިކަމާއި ގުޅޭ އިތުރު ތަފުސީލު ދެމުން މަޖިލީހުގެ އިދާރާއިން ބުނެފައި ވަނީ އެމްއެމްޕީއާރްސީގެ ބޮޑު ޚިޔާނާތުގެ މައްސަލައާއި މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަނުން ކުރަމުންދާ މަސައްކަތް ބައްލަވާ ދެއްވުން އެދި ހުށަހަޅާފައިވާ މައްސަލަ، ޖުޑީޝަރީ ކޮމިޓީއަށާއި 241 ކޮމިޓީއަށް މަޖިލީހުގެ ރައީސް، ރައީސް މުހައްމަދު ނަޝީދު ފޮނުއްވާފައިވާ ކަމަށެވެ.

މަޖިލީހުގެ ރައީސް، ރައީސް މުހައްމަދު ނަޝީދަށް މުއިއްޒު ފޮނުއްވި ސިޓީގައި ވިދާޅުވެފައި ވަނީ މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތުގެ މައްސަލައާއި، ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތައް ތަޙްޤީޤުކޮށް އިންސާފު ހޯދައި ދިނުމަކީ އޭނާ ނިސްބަތްވާ ޕާޓީއާއި، ސަރުކާރުގެ ވައުދެއް ކަމަށެވެ.

އަދި ރައްޔިތުން ވޯޓު ދެއްވައި ރައްޔިތުންގެ މަޖިލީހަށް އިންތިޚާބު ކުރެއްވުމުގެ ސަބަބަކީވެސް އެއީ ކަމަށާއި، އެމްއެމްޕީއާރުސީ ގެ ބޮޑު ޚިޔާނާތުގެ މައްސަލައާއި ގެއްލުވާލާފައިވާ މީހުންނާއި ގޮތް ނޭނގޭގޮތަށް މަރާލާފައިވާ މީހުންގެ މައްސަލަތަކަކީ، އެކަމުގައި ޢާންމު މަސްލަޙަތު ހިމެނޭ މައްސަލަތަކެއް ކަމަށެވެ. އަދި އެ މައްސަލަތަކުގެ ތަޙްޤީޤުތަކާއި، ނުވަތަ ދައުވާ އުފުއްލެވުމާއި އަދި ޝަރީޢަތްތައް ހިނގާގޮތުގެ ޢުލޫމާތު ރައްޔިތުންނާ ޙިއްޞާ ކުރެއްވުން މަދުކަމަށް ޤަބޫލުކުރެއްވޭ ކަމަށް މި ސިޓީގައި ވިދާޅުވެފައި ވެއެވެ.

އަދި އެ މައްސަލަތައް މިހާރު ގޮސްފައިވާ ހިސާބު ސާފު ނުވާތީ، އެ މައްސަލަތައް ބެއްލެވުމުގެ މަސައްކަތް މިހާރު ގޮސްފައިވާ ހިސާބާއި، އެ މައްސަލަތައް ބެއްލެވުމާއި، ދަޢުވާ އުފުއްލެއްވުން ނުވަތަ ޝަރީޢަތް ހިންގެވުން ލަސްވުމަށް ހުރި ސަބަބުތަކާއި، ނުފޫޒެއް ނެތި އިތުބާރު ހިފޭ ނިޒާމެއްގެ ތެރެއިން، ނަތީޖާ ނެރެވޭނޭ ފަދައިން އެ ތަކާމެދު ޢަމަލުކުރެވެމު ދޭތޯ ޔަޤީންކުރުމަށް ބޭނުން ވާތީ، އެކަން ރައްޔިތުންގެ މަޖިލީހުން ބައްލަވައިދެއްވުމަށް އެދިވަޑައިގަންނަވާ ކަމަށް މުއިއްޒު ފޮނުއްވި ސިޓީގައި ވިދާޅުވެފައި ވެއެވެ.