މި މަހުގެ 20 ވަނަ ދުވަހު އިންޑިއާގެ އިރުމަތީގެ ކަލްކަތާ އަށް އެރި ބާރުގަދަ ތޫފާން އަމްފާންގެ ސަބަބުން އެ ސިޓީގެ ކްލަބުތަކަށް ބޮޑު ގެއްލުންތަކެއް ވެއްޖެ އެވެ.

މި ތޫފާނުގައި 22 މީހުން މަރުވިއިރު، ކަލްކަތާގެ 14 މިލިއަން މީހުންގެ އާބާދީގެ ތެރޭން ބޮޑު ބައެއް މިހާރު ތިބީ ކަރަންޓާއި މުވާސަލާތީ ޚިދުމަތުން މަހްރޫމްވެފަ އެވެ.

ކަލްކަތާގެ ބޮޑު ތިން ކްލަބު ކަމަށްވާ މޯހަން ބަގާން، އީސްޓް ބެންގާލް އަދި މުހައްމަދީން ސްޕޯޓިންގެ އިތުރުން އެހެނިހެން ކްލަބުތަކުގެ ދަނޑުތަކަށް ވަނީ ބޮޑެތި ގެއްލުން ތަކެއް ވެފައެވެ. އެގޮތުން މޯހަން ބަގާން އާއި އީސްޓް ބެންގާލް އިން ބޭނުން ކުރަމުން އަންނަ ސޯލްޓް ލޭކް ސްޓޭޑިއަމަށް ވަނީ ބޮޑެތި ގެއްލުންތަކެއް ވެފަ އެވެ. މީގެ އިތުރުން އެކި ކުޅިވަރުތައް ކުޅުމަށް ހާއްސަ ކޮށްފައިވާ ކަލްކަތާ މައިދާނަށް ވެސް ވަނީ ބޮޑެތި ގެއްލުންތަކެއް ވެފަ އެވެ.

ތޫފާން އަމްފާންގެ ސަބަބުން ކަލްކަތާގެ ކުޅިވަރު ދަނޑުތަކަށް ގެއްލުންތައް ވީއިރު، ކަލްކަތާގެ ބޮޑު ސަރަހައްދެއްގައި މި ތޫފާންގެ ސަބަބުން ފެންބޮޑުވި އެވެ. އަދި ގަސްތައް މުލުން ލުހި، ޓްރެފިކް ލައިޓްތައް ވެސް ވަނީ ވެއްޓިފަ އެވެ. އެއާޕޯޓުގެ ބޮޑު ސަރަހައްދެއްގައި ވެސް ފެންބޮޑުވިއިރު، ވެއްޓުނު ގަސްތަކުން އެތައް ވެހިކަލްތަކެއް ވަނީ ހަލާކުވެފަ އެވެ.

ތޫފާން އަމްފާން އަކީ 1999 ވަނަ އަހަރުގެ ފަހުން ބޭ އޮފް ބެންގާލުގައި އުފެދުނު ފުރަތަމަ ސުޕަ ތޫފާނެވެ.